Vakarua 6 - Vakavakadewa Makawa

Sa vunau tiko ko Mosese, me ra dautalairawarawa ki na vunau ni Kalou.

¹ Sa vakaoqo na vunau, nai lesilesi, kei na lewa, sa vakarota ko Jiova na nomuni Kalou me vakavulica vei kemuni, mo ni cakava e na vanua ko ni sa lako yani kina mo ni taukena:

² mo ni rerevaki Jiova kina na nomuni Kalou, mo ni vakabauta na nonai vakaro kecega kei na nona vunau ka'u sa vakarota vei kemuni, koi kemuni, kei na luvemuni, kei na luvena na luvemuni, e na veisiga kecega ko ni sa bula kina; ia me dede kina nomuni bula.

³ Ia mo ni rogoca mada, na Isireli, ka vakabauta mo ni cakava; me yacovi kemuni na ka vinaka, ia mo ni tubu me lewe levu sara, me vaka sa yalataka vei kemuni ko Jiova na Kalou ni nomuni qase, e na vanua sa dave kina na wai-ni-sucu kei na oni.

⁴ Mo ni rogoca, na Isireli: O Jiova na noda Kalou ko Jiova sa dua bau:

⁵ Ia mo ni lomani Jiova na nomuni Kalou e na lomamuni taucoko, kei na yalomuni taucoko, kei na nomuni kaukauwa taucoko.

⁶ Ia na vosa oqo, ka'u sa vakarota vei kemuni e na siga oqo, me tiko ga e na lomamuni:

⁷ ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.

⁸ Ia mo ni vauca mei vakatakilakila e na ligamuni, ia me ra vaka nai ukuuku e na maliwa ni matamuni.

⁹ Mo ni vola talega e na duru ni sogo ni nomuni vale, kei nai sogo ni nomuni matamata-ni-koro.

¹⁰ Ia ni sa vakayacori kemuni ko Jiova na nomuni Kalou ki na vanua sa bubului kina ko koya vei iratou na nomuni qase, vei Eparaama, vei Aisake, kei Jekope, me solia vei kemuni, io ki na veikoro lelevu ka vinaka, ko ni a sega ni tara,

¹¹ kei na veivale sa oso e na ka vinaka kecega, ko a sega ni vakasinaita, kei na veikeli-wai ko a sega ni kelia, na veivaivaini kei na veiolive, ko a sega ni tea; ka ni kemuni sa kana ka mamau;

¹² mo ni qarauni kemuni, de ko ni guilecavi Jiova, ko koya ka kauti kemuni mai na vanua ko Ijipita, mai na vale ni veivakabobulataki.

¹³ Mo ni rerevaki Jiova ga na nomuni Kalou, ka qaravi koya, ka cavuta na yacana ga ni kemuni sa bubului.

¹⁴ Mo ni kakua ni muria na veikalou tani, na nodra veikalou na veimatanitu sa tiko vakavolivoliti kemuni;

¹⁵ (ni sa Kalou vuvu ko Jiova na nomuni Kalou e na kemuni maliwa) de waqa vei kemuni na cudru i Jiova na nomuni Kalou, ka vakawabokotaki kemuni mai na dela i vuravura.

¹⁶ Mo ni kakua ni vakatovolei Jiova vakaca na nomuni Kalou, me vaka ko ni a vakatovolea vakaca mai Masa.

¹⁷ Mo ni vakabauta vakavinaka na vunau i Jiova na nomuni Kalou, kei na nonai vakaro, kei na nonai lesilesi, sa vakarota vei kemuni ko koya.

¹⁸ Ia mo ni cakava na ka e dodonu ka vinaka e na mata i Jiova: me yacovi kemuni kina na ka vinaka, ia mo ni yaco kina mo ni taukena na vanua vinaka sa bubului kina ko Jiova vei ira na nomuni qase,

¹⁹ me vakaseva tani e matamuni na nomuni meca kecega, me vaka sa yalataka ko Jiova.

²⁰ Ni ra sa tarogi kemuni na luvemuni e na gauna maimuri, ka vaka, Sa vakaevei nai vakaro, kei nai lesilesi, kei na lewa, sa vakarota vei kemuni ko Jiova na noda Kalou?

²¹ ko na qai kaya vua na luvemuni tagane, Eda a bobula vei Fero mai Ijipita; a sa kauti keda tani mai Ijipita ko Jiova e na liga kaukauwa:

²² a sa vakayacora ko Jiova eso nai vakatakilakila, kei na cakacaka mana e levu ka rarawa, ki Ijipita, kivei Fero, kei na nona lewe-ni-vale kece, e matada:

²³ a sa kauti keda tani maikina, me vakayacori keda, me solia vei keda na vanua sa bubului kina ko koya vei ira na noda qase.

²⁴ A sa vakaroti keda ko Jiova me cakava nai lesilesi kecega oqo, me da rerevaki Jiova na noda Kalou, me yacovi keda tikoga na ka vinaka, ka me vakabulai keda, me vaka e na siga oqo.

²⁵ Ia na ka oqo eda na dodonu kina, ni da sa vakabauta ka cakava nai vakaro kecega oqo e na mata i Jiova na noda Kalou, me vaka sa vakaroti keda ko koya.