Vakarua 4 - Vakavakadewa Makawa

Sa vakaroti ira ko Mosese me ra talairawarawa, 1-40. Sa lesia e tolu na koro me dro kina na tamata sa vakamatea na kai nona, 41-43.

¹ Ia oqo, mo ni vakarorogo mada, na Isireli, ki nai lesilesi kei na lewa, ka'u sa vakavulica vei kemuni, mo ni cakava, mo ni bula kina, ka lako mo ni taukena na vanua sa solia vei kemuni ko Jiova na Kalou ni nomuni qase.

² Mo ni kakua ni kuria na vosa ka'u sa vakarota vei kemuni, mo ni kakua talega ni vakalailaitaka, mo ni vakabauta kina nai vakaro i Jiova na nomuni Kalou, ka'u sa vakarota vei kemuni.

³ Sa raica ga na matamuni na ka sa cakava ko Jiova e na vuku i Peali-piori: ni sa vakarusai ira kecega na tamata era muri Peali-piori, mai na kemuni maliwa, ko Jiova na nomuni Kalou.

⁴ Ia koi kemuni ka kabiti Jiova na nomuni Kalou, kemuni sa bula vakaaduaga e na siga oqo.

⁵ Raica, ka'u sa vakavulica vei kemuni eso nai lesilesi kei na lewa, me vaka ka vakarota vei au ko Jiova na noqu Kalou, mo ni kitaka vakakina e na vanua kemuni sa la'ki taukena.

⁶ Ia mo ni vakabauta ka muria; kemuni na vuku kina ka yalomatua kina e matadra na veimatanitu, era na rogoca nai lesilesi kecega oqo, a ra na kaya, E dina era sa tamata vuku ka yalomatua na matanitu levu oqo.

⁷ Ia ko cei na matanitu levu, sa dua na nodra kalou sa tiko voleka vei ira, me vakataki Jiova na noda Kalou e na ka kecega eda sa masuti koya kina?

⁸ Ia ko cei na matanitu levu, sa dodonu na kenai lesilesi kei na kena lewa, e tautauvata kei na vunau kecega oqo, ka'u sa tauca vei kemuni edaidai?

⁹ Ia mo ni qarauni kemuni ga, ka vakatawa vinaka na yalomuni, de ko ni guilecava na ka sa raica na matamuni, ka sa lako tani e na yalomuni e na veisiga kecega ko ni sa bula kina: ia mo ni vakavulica ga vei ira na luvemuni, kei ira na makubumuni;

¹⁰ io na siga ko a tu kina e na mata i Jiova na nomuni Kalou mai Orepi, ni sa kaya vei au ko Jiova, Mo soqoni ira vata na tamata vei au, me'u vakarogoya vei ira na noqu vosa, me ra vuli kina me ra rerevaki au e na veisiga kecega era na bula kina e dela i vuravura, me ra vakavulica talega vei ira na luvedra.

¹¹ Ia kemuni a toro mai, ka tu e ruku ni ulu-ni-vanua; a sa waqa tu e na buka ki na lomalagi na ulu-ni-vanua, e na butobuto, e na o, kei na butobuto loaloa.

¹² A sa vosa vei kemuni ko Jiova mai na loma ni bukawaqa: ko ni a rogoca na domo ni vosa, ia ko ni sa sega ni raica e dua nai vakatakarakara; na domo walega.

¹³ Ia sa cavuta vei kemuni ko koya na nona veiyalayalati, o koya sa vakarota vei kemuni mo ni cakava, io na vunau e tini; a sa vola ko koya e na vatu raraba e rua.

¹⁴ Sa vakaroti au talega ko Jiova e na gauna ko ya me'u vakavulica vei kemuni eso nai lesilesi kei na lewa, mo ni cakava e na vanua kemuni sa lako yani kina mo ni taukena.

¹⁵ O koya mo ni qarauni kemuni vinaka kina; kemuni a sega ni raica e dua nai vakatakarakara e na siga ka vosa kina vei kemuni ko Jiova mai Orepi mai na loma ni bukawaqa:

¹⁶ de kemuni sa vakadukadukalitaki kemuni, ka cakava vei kemuni e dua na matakau ceuceu, nai vakatakarakara ni dua na kalou, nai vakatakarakara ni tagane se yalewa,

¹⁷ nai vakatakarakara ni dua na manumanu e yavai va e dela i vuravura, nai vakatakarakara ni manumanu vakatabana sa vuka voli e cake,

¹⁸ nai vakatakarakara ni dua na ka sa yaqa e dela ni vanua, nai vakatakarakara ni dua na ika e na wai mai na yasa ni vanua:

¹⁹ ia de ko ni ta cake ki lomalagi, ka raica na mata-ni-siga, kei na mata-ni-vula, kei na veikalokalo, nai vavakoso kecega mai lomalagi, kemuni sa qai vecei tani me sorova, ka qarava, na veika oqori sa solia ko Jiova na nomuni Kalou ki na veimatanitu kecega e ruku ni lomalagi taucoko:

²⁰ ia sa tauri kemuni ko Jiova, ka kauti kemuni tani mai loma ni lovo kaukamea, io mai Ijipita, mo ni matanitu me taukena ko koya, me vaka e na siga oqo.

²¹ A sa cudru vei au ko Jiova e na vukumuni, ka sa bubului, me'u kakua ni qalo-kosova na Joritani, ia me'u kakua ni butuka na vanua vinaka ko ya, sa solia vei kemuni ko Jiova na nomuni Kalou mo ni taukena:

²² ia ka'u na mate ga e na vanua oqo, au na sega ni qalo-kosova na Joritani: ia kemuni na qalo-kosova, ka taukena na vanua vinaka oqori.

²³ Mo ni qarauni kemuni, de ko ni sa guilecava na veiyalayalati i Jiova na nomuni Kalou sa kitaka ko koya kei kemuni, ka ko ni na cakava vei kemuni e dua na matakau ceuceu, nai vakatakarakara ni dua na ka sa vakatabuya vei kemuni ko Jiova na nomuni Kalou.

²⁴ Ni sa bukawaqa katakata ko Jiova na nomuni Kalou, io sa Kalou vuvu.

²⁵ Ni sa sucu vei kemuni eso na gone, kei na luvedra na luvemuni, ka kemuni sa tiko vakadede e na vanua, a sa vakadukadukalitaki kemuni, ka sa cakava vei kemuni e dua na matakau ceuceu nai vakatakarakara ni dua na ka, ka sa caka ca e na mata i Jiova na nomuni Kalou, me vakacudrui koya:

²⁶ au sa kacivi lomalagi kei vuravura edaidai me kila e na vukumuni, ni kemuni na kawayali vakusakusa mai na vanua kemuni sa qalo-kosova na Joritani mo ni taukena; ena sega ni balavu kina na nomuni bula, ia kemuni na kawayali vakaidina ga.

²⁷ Ena vakasevi kemuni voli ko Jiova ki na veimatanitu, ia kemuni na le vica walega e vo e na kedra maliwa na veimatanitu sa kauti kemuni yani kina ko Jiova:

²⁸ Ia kemuni na qarava maikea na kalou eso, na cakacaka ni liga ni tamata, na kau kei na vatu, era sega ni rai, se rogo, se kana, se boiboi rawa.

²⁹ Ia kevaka ko ni sa qarai Jiova na nomuni Kalou maikina, ko na kunea, kevaka ko ni sa qarai koya e na lomamuni taucoko kei na yalomuni taucoko.

³⁰ Ni kemuni sa rarawa, ka sa yacovi kemuni na ka kecega oqo, e na siga maimuri, kevaka ko ni sa lesu mai vei Jiova na nomuni Kalou, ka sa talairawarawa ki na domona;

³¹ (ni sa Kalou yalololoma ko Jiova na nomuni Kalou;) ena sega ni weletaki kemuni, se vakarusai kemuni, se guilecava na veiyalayalati kei ira na nomuni qase sa bubului kina vei ira ko koya.

³² Ia mo ni taroga mada na gauna sa oti, ka liu vei kemuni, mai na gauna ka bulia kina na tamata e vuravura na Kalou, ia mai na vu ni lomalagi e dua ka yacova na vu ni lomalagi kadua, se sa caka e dua na ka me tautauvata kei na ka levu oqo, se sa rogoci me vakakina?

³³ Sa dua li na matanitu sa rogoca na domo ni Kalou ni sa vosa mai loma ni bukawaqa, me vaka ko ni sa rogoca, ka sa bula tiko?

³⁴ Se sa vakatovolea eliu na Kalou me la'ki kauta vua e dua na matanitu mai na kedra maliwa na matanitu tani, e na veivakatovolei, e na veivakatakilakila, kei na veika-mana, kei nai valu, kei na liga kaukauwa, kei na liga sa dodo yani, kei na ka rerevaki vakaidina, me vaka na ka kecega sa cakava ko Jiova na nomuni Kalou e na vukumuni mai Ijipita?

³⁵ Sa vakatakilai vei kemuni, mo ni kila kina ni sa Kalou ko Jiova; ka sega tale e dua, ko koya ga.

³⁶ Sa rogo mai vei kemuni na domona mai lomalagi, me vakavulici kemuni kina ko koya: a sa vakaraitaka vei kemuni ko koya e vuravura na nona bukawaqa levu; ia ko ni a rogoca na nona vosa mai loma ni bukawaqa.

³⁷ Ia ni sa lomani ira na nomuni qase ko koya, sa digitaka kina na nodra kawa, ka kauti kemuni tani mai Ijipita e matana, e nona kaukauwa levu;

³⁸ ka me vakaseva tani e matamuni eso na matanitu sa levu ka kaukauwa, ka malumalumu koi kemuni, me kauti kemuni kina, ka me solia vei kemuni na nodra vanua mo ni taukena, me vaka e na siga edaidai.

³⁹ Mo ni kila mada e na siga oqo, ka vakanananu kina e lomamuni ni sa Kalou ko Jiova mai lomalagi e cake, kei vuravura e ra: sa sega tale e dua.

⁴⁰ Ia mo ni vakabauta mada na nonai lesilesi, kei na nonai vakaro, ka'u sa vakarota vei kemuni e na siga oqo, me yaco kina vei kemuni na ka vinaka, vei ira talega na luvemuni, ka me dede kina na nomuni bula e na vanua, sa solia vei kemuni ko Jiova na nomuni Kalou, me sega ni mudu.

⁴¹ Sa qai wasea tani ko Mosese e tolu na koro e na tai ni Joritani oqo, vaka ki nai cadracadra ni mata-ni-siga;

⁴² ka me dro kina ko koya sa vakamatea na kai nona ni sa sega ni nakita, ka sa sega ni cati koya eliu; ka me bula kina ni sa dro ki na dua na koro oqori:

⁴³ ko Peseri mai na vanua liwa, mai na vanua bucabuca, ka nodra na Rupeni; kei Remoci mai Kiliati, ka nodra na Kata; kei Kolani mai Pasani, ka nodra na Manasa.

⁴⁴ Ia oqo na vunau sa solia ko Mosese vei ira na Isireli:

⁴⁵ oqo nai vakaro, kei nai lesilesi, kei na lewa, sa vosataka ko Mosese vei ira na Isireli, ni ra sa lako tani mai Ijipita,

⁴⁶ e na tai mai oqo ni Joritani, e na vanua cecelevu sa donui Peci-piori, e na vanua i Sioni na nodra tui na Amoraiti, ko koya ka tiko mai Esiponi, ko koya ka mokuta ko Mosese kei ira na Isireli, ni ra sa lako tani mai Ijipita:

⁴⁷ a ra sa taukena na nona vanua, kei na vanua nei Oki na tui Pasani, na tui ruarua vei ira na Amoraiti, e na tai ni Joritani oqo, vaka ki nai cadracadra ni mata-ni-siga;

⁴⁸ mai Aroeri, ko ya mai na bati ni uciwai ko Arinoni, ka yaco ki na ulu-ni-vanua ko Saioni, ko ya ko Erimoni,

⁴⁹ kei na vanua cecelevu kecega e na bati ni Joritani oqo vaka ki na tu-i-cake, ka yacova na wasawasa mai na vanua cecelevu, mai na veimata-ni-wai mai Pisika.