Vakarua 34 - Vakavakadewa Makawa

Sa raici Kenani ko Mosese mai na ulu-ni-vanua, 1-4. Sa ciba maikina, 5-8. Sa mai kenai sosomi ko Josua, 9. A parofita levu ko Mosese, 10-12.

¹ A sa lako cake ko Mosese mai na vanua cecelevu mai Moapi ki na ulu-ni-vanua ko Nipo, ki na dela i Pisika, sa donui Jeriko. A sa vakaraitaka vua ko Jiova na vanua taucoko ko Kiliati, ka yacovi Tani,

² kei Nafitalai taucoko, kei na vanua nei Ifireimi, kei Manasa, kei na vanua taucoko nei Juta, ka yacova na waitui mai ra,

³ kei na vanua ki na ceva, kei na cecelevu mai na buca mai Jeriko, na koro ni balabala, ka yacovi Soa.

⁴ A sa kaya vua ko Jiova, Oqori na vanua ka'u a bubului kina vei Eparaama, kei Aisake, kei Jekope, ka kaya, Au na solia vei ira na nomu kawa: au sa vakaraitaka e matamu, ia ko na sega ga ni lako yani kina.

⁵ A sa mate maikea ko Mosese nai talatala i Jiova e na vanua ko Moapi, me vaka na vosa i Jiova.

⁶ A sa buluti koya ko koya e na buca e na vanua ko Moapi, sa donui Peci-piori: ia sa sega na tamata sa kila na nonai bulubulu ka yacova na siga oqo.

⁷ Sa dua na drau ka ruasagavulu na yabaki i Mosese ni sa mate: sa sega ni buawa mai na matana, ka sa sega ni malumu sobu na nona kaukauwa.

⁸ A ra sa tagicaki Mosese ko ira na Isireli mai na vanua cecelevu ni Moapi ka bogi tolusagavulu: sa qai oti na bogi era tagi kina ni ra yasovaki Mosese.

⁹ Ia ko Josua na luve i Nuni sa sinai e na yalo vuku; ni sa tabaki koya oti e na ligana ko Mosese: a ra sa vakarorogo vua na Isireli, ka kitaka na ka sa vakarota vei Mosese ko Jiova.

¹⁰ A sa sega ni tubu emuri e Isireli e dua na parofita me tautauvata kei Mosese, o koya sa veirai mata kaya ko Jiova,

¹¹ e nai vakatakilakila kecega kei na cakacaka mana, sa talai koya kina ko Jiova me cakava e na vanua ko Ijipita kivei Fero, vei ira kecega na nona tamata, kei na nona vanua taucoko,

¹² e na ligana kaukauwa, kei na vakadomobulataki levu sa cakacaka kina ko Mosese e matadra kecega na Isireli.