Vakarua 33 - Vakavakadewa Makawa

Sa vosavakalougatataki ira na veimataqali ni Isireli ko Mosese, ni sa voleka na nona mate.

¹ Ia oqo na vosa ni veivakalougatataki sa vosavakalougatataki ira kina na Isireli ko Mosese, na tamata ni Kalou, ni sa voleka ni mate.

² A sa kaya: Sa lako mai Saineai ko Jiova, Ka tu cake mai Sia e na vukudra; Sa serau mai ko koya mai na ulu-ni-vanua ko Perana, A sa lako mai na kedra maliwa na le oba era sa savasava: Sa lako mai na ligana i matau e dua na bukawaqa, me vakavulici ira:

³ Ia sa lomani ira na lewe ni veivanua ko koya: Era tiko e ligamuni na nona tamata yalosavasava kecega; A ra sa tiko sobu mai na yavamuni; Era na rawata yadua na nomuni vosa.

⁴ Sa vakarota vei keda na vunau ko Mosese, Me ra taukena ko ira nai soqosoqo ni Jekope.

⁵ Ia sa tui ko koya vei Jesuruni, Ni ra sa soqoni vata ko ira sa turaga vei ira na tamata, Ko ira vata na veiyavusa ni Isireli.

⁶ Me bula ko Rupeni, ka sega ni mate, Ia me ra lewe lailai na nona tamata.

⁷ Ia oqo e na vuku i Juta: a sa kaya ko koya, Rogoca, kemuni Jiova, na domo i Juta, Ka kauti koya vei ira na kai nona: Me rauti koya na ligana; Ia mo ni vukei koya me rawai ira na nona meca.

⁸ A sa kaya ko koya e na vuku i Livai, Sa tiko na nomuni Cumimi kei na nomuni Urimi, kei koya na nomuni le dua yalosavasava, O koya ko ni a vakatovolea mai Masa, O koya ko ni a veivala kaya mai na wai ni Meripa,

⁹ O koya ka kaya e na vuku i tamana kei tinana, Au sa sega ni raici koya; Sa sega talega ni kilai ira na tuakana se na tacina, Se kilai ira na luvena: Ni ra sa nanuma na nomuni vosa, Ka vakabauta na nomuni veiyalayalati kei ira.

¹⁰ Era na vakavulica na nomuni lewa vei ira na Jekope, Kei na nomuni vunau kivei ira na Isireli: Era na viritura e matamuni na ka boi vinaka me vakamai, Kei nai soro e kama taucoko e dela ni nomuni cabocabo-ni-soro.

¹¹ Mo ni vakalougatataka, Jiova, na nonai yau, Ka donuya na cakacaka ni ligana: Mo ni yavita basika na tolodra era tu cake vakaivalu vei koya, Kei na nodra era cati koya, me ra kakua ni tu cake tale.

¹² E na vuku i Penijamini sa kaya ko koya, O ira sa lomana ko Jiova ena tiko vakacegu voleka vei koya; Ena vakarurugi koya e na siga kecega ka bogi ko koya, Ena tiko talega e na maliwa ni nona veibaba.

¹³ Ia e na vuku i Josefa sa kaya ko koya, Ena vakalougatataka na nona vanua ko Jiova, E na ka talei mai lomalagi, e na tegu, Kei na yasana titobu sa koto e ra,

¹⁴ Kei na ka talei sa vakayacora na mata-ni-siga, Kei na ka talei sa vakatubura na vula,

¹⁵ Kei na ka vinaka sara mai na veiulu-ni-vanua makawa, Kei na ka talei mai na veivanua cecere tawa mudu,

¹⁶ Kei na ka talei mai na vanua kei na ka sa sinai kina, Kei na yalololoma i Koya ka tiko e loma ni kau: Me tauca na ulu i Josefa, Kei na buradelana i koya sa tawase maivei ira na veitacini.

¹⁷ Sa nona na kaukauwa ni ulumatua ni pulumokau, Ka sa vaka nai leu ni iunikoni na nonai leu: Ena biliraki ira kina na veimatanitu kecega ki nai yalayala ni vanua: Ia ko ira oqo na oba ni Ifireimi, Kei ira oqo na oba ni Manasa.

¹⁸ Ia e na vuku i Sepuloni sa kaya ko koya, Mo ni reki, na Sepuloni, e na nomuni daulako yani; Kei na Isakari, e na nomuni veivale laca.

¹⁹ Era na kacivi ira na tamata ki na ulu-ni-vanua; Era na vakacabora maikea nai soro donu: Ni ra na gunuva nai yau ni wasawasa, Kei nai yau sa vuni tu e na nuku.

²⁰ Ia e na vuku i Kata sa kaya ko koya, Sa kalougata ko koya sa vakalevutaki Kata: Sa tiko ko koya me vaka na laioni, A sa dresulaka na liga kei na qavokavoka.

²¹ Sa vakarautaka nai lutua me kena, Ni sa maroroi nai votavota kei koya sa lewa; A sa lako mai kei ira na turaga ni tamata, Sa kitaka ko koya na cakacaka e dodonu vei Jiova, Kei na nona lewa vei ira na Isireli.

²² Ia e na vuku i Tani sa kaya ko koya, Sa luve ni laioni ko Tani: Sa rika mai Pasani.

²³ Ia e na vuku i Nafitalai sa kaya ko koya, I Nafitalai ko sa vakamamautaki e na loloma Ka sinai e na veivakalougatataki i Jiova: Mo kenai taukei mai ra mai na ceva talega.

²⁴ Ia e na vuku i Aseri sa kaya ko koya, Me kalougata ko Aseri ni sa vakaluveni; Me vinakati ko koya vei ira na wekana, Ka me tonidromuca na yavana e na waiwai.

²⁵ Sa na aironi kei na parasa na nomuni samugakagaka; Ia ena rauta na nomuni siga na nomuni kaukauwa.

²⁶ I Jesuruni, sa sega e tautauvata kei na Kalou, Sa vodo lako e dela ni lomalagi me vukei kemuni, Kei na o e nonai ukuuku vakaturaga.

²⁷ Sai drodro na Kalou e tawa tubu ka tawa mudu. A sa vueti kemuni na ligana tawa mudu: Ia sa vakasava tani na meca mai na matamuni ko koya; Ka sa kaya, Mo ni vakarusa.

²⁸ Sa qai tiko duadua vakacegu na Isireli: Ena raica na vanua ni sila kei na waini na matadra na Jekope; Ena miri talega mai na nona lomalagi na tegu.

²⁹ O ni sa kalougata, na Isireli: O cei sa tautauvata kei kemuni, a matanitu sa vakabula ko Jiova, O koya nai sasabai me vukei kemuni, Kei nai seleiwau ko ni sa vakaiukuuku kina! Era na vakamalumalumu vei kemuni ko ira na nomuni meca; Ia ko ni na butuka na nodra veiyasana cecere.