Vakarua 32 - Vakavakadewa Makawa

A sere i Mosese, 1-43. Sa vakaroti ira me ra nanuma vinaka, 44-47. Sa kaya vua ko Jiova me cabeta na ulu-ni-vanua me mate, 48-52.

¹ Mo ni vakatu daliga, na lomalagi, ia ka'u na vosa; Ia me rogoca ko vuravura, na vosa ni gusuqu.

² Ena tau na noqu i vakavuvuli me vaka na uca, Ena mimiri na noqu vosa me vaka na tegu, Me vaka na uca mimiri ki na co sa qai tubu, Ka vaka na uca tau bi ki na co:

³ Ni'u na tukuna na yaca i Jiova; Dou vakalevulevuya na noda Kalou.

⁴ A Uluvatu! sa sega ni cala na nona cakacaka: Ni sa dodonu na nonai valavala kecega: A Kalou vosa dina, ka sega ni ca, Sa yalododonu ka daucaka dodonu ko koya.

⁵ Era sa vakacacani ira vakai ira, era sa sega ni luvena, e na vuku ni nodra ca: Era kawa veve ka yalovakatani.

⁶ Kemuni sa saumi Jiova vakaoqo, ne, Oi kemuni na tamata lialia ka sega ni vuku? Sa sega beka ni tamamuni ko koya, na kemuni taukei? Sa buli kemuni, ka vakataudeitaki kemuni.

⁷ Nanuma na gauna eliu sara, Mo ni vakasama na yabaki ni tabatamata e vuqa: Taroga na tamamuni, ka na vakatakila vei kemuni ko koya; Ko ira na nomuni qase, ka ra na tukuna vei kemuni.

⁸ Ni sa solia vei ira na veimatanitu ko Koya sa cecere sara na nodra i votavota, Ni sa wasei ira na luve i Atama ko koya, Sa qai lesia na veiyalayala ni veimatanitu Me ganita na kedrai wiliwili na Isireli.

⁹ Ni sai yau i Jiova ko ira na nona tamata; Na Jekope nai votavota sa taukena ko koya.

¹⁰ Sa kunei ira ko koya e na vanua sa lala, E na vanua liwa sa levu kina na tagi; Sa kauti ira voli, sa vakavulici ira, Sa maroroi ira me vaka na loa ni matana.

¹¹ Me vaka na ikeli ni sa seuta nai oviovi ni luvena, Sa cakurobaroba e matadra na luvena, Sa vakatetaba, sa kauti ira, Sa vukataka e na tabana;

¹² Sa tuberi ira vakakina ko Jiova duadua, Ka sa sega kaya na kalou tani.

¹³ Sa vakavodoki ira me ra lako e na veiyasana cecere e vuravura, Me ra kania na vuata ni veiwere; A sa vagunuvi ira e na oni mai na uluvatu, Kei na waiwai mai na uluvatu qiwa:

¹⁴ Na uro ni wai-ni-sucu ni pulumokau, kei na wai-ni-sucu ni sipi, Kei na uro ni lami Kei na sipi tagane ni Pasani, kei na me, Kei na uto ni witi vinaka; Ia ko ni a gunuva na waini, na dra ni vaini.

¹⁵ Ia sa levulevu mai ko Jesuruni, ka caqe: O ni sa levulevu mai, ko ni sa yagolevu, ko ni sa tabonaki e na uro; Era sa qai biuta na Kalou ka buli ira, Ka ra beci koya na Uluvatu era sa bula kina.

¹⁶ Era sa vakavuvutaki koya e na ka tani eso, Era sa vakacudrui koya e na ka vakasisila eso.

¹⁷ Era soro ki na tevoro eso, ka sega vua na Kalou; Ki na kalou eso era a sega ni kila, Sa ka vou sa qai tubu walega mai, Era sega ni rerevaka ko ira na nomuni qase.

¹⁸ O ni sa sega ni nanumi koya na Uluvatu ko ni sa tubu maikina, A sa guilecava na Kalou sa buli kemuni.

¹⁹ A sa raica ko Jiova, ka vakasisilataki ira, E na vuku ni nodra vakacudrui koya na luvena tagane, kei na luvena yalewa.

²⁰ A sa kaya ko koya, Au na vunia vei ira na mataqu, Au na raica na kedrai otioti: Ni ra sa kawa dauyalovakatani ko ira, Na gone sa dau sega ni dina.

²¹ Era sa vakavuvutaki au e na vuku ni ka sa sega ni Kalou; Era sa vakacudrui au e na nodra veika vakailasu: Ia ka'u na vakavuvutaki ira e na vukudra era sega ni noqu tamata: Au na vakacudrui ira e na matanitu sesewa.

²² Ni sa vakawaqaci na buka e na noqu cudru, Ena kama talega me yacova na ca-vuni era, Ka kania na vuravura kei na vuana, Ka vakamai ira na vu ni veiulu-ni-vanua.

²³ Au na binia vei ira na ka rarawa; Au na vakaotia vei ira na noqu veigasau.

²⁴ Era na suivotu e na dausiga, ka kani e na katakata levu, Kei na veivakamatei gaga; Au na tala talega vei ira na bati ni manumanu tawa lasa, Kei na weli gaga ni gata ni qele.

²⁵ Ai seleiwau e tautuba, Kei na rere levu eloma, Ena vakamatea na cauravou kei na goneyalewa, Na gone sa sucu tiko, kei na tamata e sika na uluna.

²⁶ Au a kaya, Au na vakasavi ira ki na tikina vuni, Au na muduki ira me ra kakua ni nanumi tale vei ira na tamata:

²⁷ Kevaka ka'u sa sega ni rerevaka na cudru ni meca, De ra nanuma cala ko ira era vakasaurarataki ira, Io de ra kaya, Sa cecere na ligada, A sa sega ni kitaka na ka oqo ko Jiova.

²⁸ Ni ra sa matanitu sa yali vei ira na vuku, Ka sa sega vei ira na yalomatua.

²⁹ Isa lei me ra vuku mada, me ra kila vinaka na ka oqo, Me ra vakanananu ki na kedrai otioti!

³⁰ Ena qai vakasava rawa e dua na udolu e le dua vei ira, Ka vakasava e tini na udolu e lewe rua, Kevaka sa sega ni volitaki ira ko koya na nodra Uluvatu, Ka sogolati ira ga ko Jiova?

³¹ Ia na nodra uluvatu sa sega ni tautauvata kei na noda Uluvatu, Oqo sa nodra lewa ko ira na noda meca.

³² Ni sa vaini ni Sotoma na nodra vaini, Ka mai na vanua kei Komora: A nodra vua ni vaini sa vua ni vaini gaga, Ka sa gaga na nodra soso vua ni vaini;

³³ A nodra waini na weli gaga ni gata levu, Kei na gaga katakata ni gata ca sara.

³⁴ Sa sega li ni bini vei au, Ka dregati tu kei na noqu i yau,

³⁵ Me noqu na veicudruvaki, kei na veisausaumi? E na gauna me tidara kina na yavadra: Ni sa toro mai na siga me ra ca kina, A sa kusarawa mai na ka ena yacovi ira.

³⁶ Ena lewai ira na nona tamata ko Jiova, Ka veivutuni e na vukudra na nonai talatala, Ni sa raica sa oti na nodra kaukauwa, Ka sa sega e dua sa sogolati se dua sa lako voli.

³⁷ Ni na kaya ko koya, Evei na nodra kalou, Na Uluvatu era sa dauvakararavi kina,

³⁸ Sa daukania na uro ni nodra i soro, Ka gunuva na waini ni nodra i madrali liviraki? Me ra tu cake mada ka vukei kemudou, Me ra vakarurugi kemudou.

³⁹ Dou raica mada ni sai au, io, koi au duaduaga, Ka sega tale e dua sa kalou vata kei au: Au sa ia na veivakamatei, ka'u sa ia talega na veivakabulai; Au sa ia na veivuetaki, ka'u sa ia na veivakamavomavo: Ka sa sega e dua me kovea rawa mai na ligaqu.

⁴⁰ Ni'u sa dodoka yani na ligaqu vaka ki lomalagi, Ka kaya, Oi au, ka'u sa bula ka tawa mudu.

⁴¹ Kevaka ka'u sa vagatara na noqu i seleiwau e makamakalivata, A sa taura na lewa na ligaqu; Au na qai vakayacora na noqu cudru vei ira na noqu meca, K a sauma vei ira era cati au.

⁴² Au na vagunuva na noqu veigasau me mateni e na dra, Ena kania talega na lewe ni tamata na noqu i seleiwau; E na dra ni moku kei na bobula, Vei ira sa liu, era turaga ni meca.

⁴³ Dou reki vata, na veimatanitu, kei ira na nona tamata: Ni sa cudruvaka ko koya na nodra dra na nonai talatala; Ka na saumi ira na nona meca, Ka vakadonuya nai bulubulu e na vuku ni nona vanua, io ko ira na nona tamata.

⁴⁴ A sa lako mai ko Mosese, ka cavuta kecega na vosa ni sere oqo e na daligadra na tamata, ko koya, kei Josua na luve i Nuni.

⁴⁵ Ia ni sa cavuta oti na vosa kecega oqo ko Mosese vei ira kecega na Isireli:

⁴⁶ sa qai kaya vei ira, Ni vaqara na lomamuni ki na vosa kecega ka'u sa tukuna vei kemuni e na siga oqo, mo ni vakaroti ira kina na luvemuni me ra vakabauta ka cakava, na vosa kecega ni vunau oqo.

⁴⁷ Ni sa sega ni ka wale vei kemuni, sa ka ga mo ni bula kina: ia e na ka oqo ena balavu kina na nomuni bula e na vanua, ko ni sa qalo-kosova kina na Joritani mo ni taukena.

⁴⁸ A sa vosa vei Mosese ko Jiova e na siga dina ko ya, ka kaya,

⁴⁹ Mo cabeta na ulu-ni-vanua oqo ko Aparimi, io na ulu-ni-vanua ko Nipo, e na vanua ko Moapi, sa donui Jeriko; ka raica na vanua ko Kenani, ka'u sa solia vei ira na Isireli me ra taukena:

⁵⁰ ia ko na mate e na ulu-ni-vanua ko sa cabeta, ia ko na toki yani kivei ira na kai nomu; me vaka sa mate ko Eroni na tuakamu mai na ulu-ni-vanua ko Ori, a sa toki yani vei ira na kai nona:

⁵¹ ni drau a talaidredre vei au e na kedra maliwa na Isireli mai na wai ni Meripa-Ketesa, mai na vanua liwa ko Sini; ni drau a sega ni vakarokorokotaki au e na kedra maliwa na Isireli.

⁵² Ia ko na raica ga na vanua; ia ko na sega ni lako yani kina, ki na vanua ka'u sa solia vei ira na Isireli.