Vakarua 31 - Vakavakadewa Makawa

Sa vosavaqaqataki ira na tamata ko Mosese, 1-6, kei Josua, 7,8. Sa solia na vunau vei ira na bete, 9-13,24-27. A vunau vei Josua, 14,15,23. Me vakavulica vei ira na tamata na sere i Mosese, 16-22. Sa kaya ko Mosese me ra soqoni vata me ra rogoca na nona sere, ni sa voleka na nona mate, 28-30.

¹ A sa lako ko Mosese ka tukuna na vosa oqo vei ira kecega na Isireli.

² A sa kaya vei ira, Sa dua na drau ka ruasagavulu na noqu yabaki e na siga oqo; sa dredre me'u daucuru tiko yani ka daucuru mai: a sa kaya vei au ko Jiova, O na sega ni qalo-kosova na Joritani oqo.

³ Ko Jiova na nomuni Kalou, ena liutaki kemuni ko koya, ena vakarusai ira ko koya na veimatanitu oqo e matamuni, ia ko ni na rawai ira: ko Josua, ena liutaki kemuni ko koya, me vaka sa kaya ko Jiova.

⁴ Ia ena cakava vei ira ko Jiova me vaka ka cakava vei Sioni kei Oki, na nodra tui na Amoraiti, ki na nodrau vanua talega, koi rau sa vakarusa ko koya.

⁵ Ia ena soli ira vei kemuni ko Jiova, mo ni kitaka vei ira me vaka nai vakaro kecega ka'u sa vakarota vei kemuni.

⁶ Mo ni kaukauwa ka qaqa, kakua ni rere se sautaninini e na vukudra: ni sa lako vata kei kemuni ko Jiova na nomuni Kalou, ena sega ni weletaki kemuni, se biuti kemuni.

⁷ A sa kacivi Josua ko Mosese, ka sa kaya vua e matadra kecega na Isireli, Mo kaukauwa ka qaqa: ko na lako kei ira na tamata oqo ki na vanua sa bubului kina ko Jiova vei ira na nodra qase me solia vei ira; ia ko na kauti ira me ra taukena.

⁸ Ia ko Jiova ga, sa liutaki iko, ena tiko vata kei iko ko koya, ena sega ni weletaki iko, se biuti iko mo kakua ni rere, se yalolailai.

⁹ A sa vola na vunau oqo ko Mosese, ka solia vei ira na bete na Livai, era daucolata na kato ni veiyalayalati i Jiova, vei ira talega na qase kecega ni Isireli.

¹⁰ A sa vakaroti ira ko Mosese, ka kaya, Ni oti na yabaki e vitu, e na gauna sa lokuci me yabaki ni veisereki, e na so levu ni vale taba ni kau,

¹¹ ni ra sa lako kecega mai na Isireli me rairai e na mata i Jiova na nomuni Kalou e na yasana sa digitaka ko koya, mo ni wilika na vunau oqo vei ira kecega na Isireli me ra rogoca.

¹² Mo ni vakasoqoni ira na tamata, na tagane, kei na yalewa, kei na gone lalai, kei na nomuni kai tani sa tiko e na nomuni lomanibai, me ra rogoca, ka me ra vuli kina, ka rerevaki Jiova na nomuni Kalou, ka vakabauta me ra cakava na vosa kecega ni vunau oqo:

¹³ ka me ra rogoca ko ira na luvedra era sa sega ni kila eliu, ka me ra vuli me ra rerevaki Jiova na nomuni Kalou, e na gauna kecega kemuni na bula kina e na vanua kemuni sa qalo-kosova kina na Joritani mo ni taukena.

¹⁴ A sa kaya vei Mosese ko Jiova, Raica, sa toro mai na nomu siga mo mate kina: kacivi Josua, ka la'ki vakaraitaki kemudrau e na vale ni veitavaki, me'u tauca vua nai vakaro. A rau a lako ko Mosese kei Josua, ka vakaraitaki rau e na vale ni veitavaki.

¹⁵ A sa rairai mai ko Jiova e na Vale tabu e na duru o: a sa tu na duru o ka donuya na katuba ni Vale tabu.

¹⁶ A sa kaya vei Mosese ko Jiova, Raica, ko na moce vata kei ira na nomu qase: ia na tamata oqo era na lako vakatani ni ra muria na veikalou tani ni lewe ni vanua era la'ki tiko e na kedra maliwa, ia era na biuti au, ka vakacataka na noqu veiyalayalati ka'u a cakava kei ira.

¹⁷ Ena qai waqa mai na noqu cudru vei ira e na siga ko ya, ia ka'u na biuti ira, ka vunia vei ira na mataqu, a ra na kani, ia ena yacovi ira na ka ca e vuqa kei na rarawa; era na kaya kina e na siga ko ya, Sa sega li ni yacovi keda na ka ca kecega oqo, ni sa sega ni tiko kei keda na noda Kalou?

¹⁸ Ia ka'u na vunia vakaidina na mataqu e na siga ko ya, e na vuku ni ka ca kecega era sa cakava, ni ra sa vuki ki na kalou tani eso.

¹⁹ Ia oqo, mo vola me nomudou na sere oqo, ka vakavulica vei ira na Isireli: mo tauca ki na gusudra, me kenai vakadinadina vei au na sere oqo e na vukudra na Isireli.

²⁰ Ni'u sa kauti ira oti ki na vanua sa dave kina na wai-ni-sucu kei na oni, ka'u a bubului kina vei ira na nodra qase; a ra sa kana ka mamau, ka ra levulevu mai; era na qai vuki ki na kalou tani eso, ka qaravi ira, ka beci au, ka vakacataka na noqu veiyalayalati.

²¹ Ia ni sa yacovi ira na ka ca kei na ka rarawa e vuqa, ena qai tukuni ira na sere oqo me vaka nai vakadinadina; ni na sega ni guileca mai na gusu ni nodra kawa: ni'u sa kila na nodra i naki era sa veinanuyaka tiko e na gauna oqo, ni'u sa bera ni kauti ira ki na vanua ka'u a bubului kina.

²² A sa vola na sere oqo ko Mosese e na siga ko ya, ka vakavulica vei ira na Isireli.

²³ A sa vakaroti Josua na luve i Nuni, ka kaya, Mo kaukauwa ka qaqa: ni ko na kauti ira na Isireli ki na vanua ka'u a bubului kina vei ira: ia ka'u na tiko vata kei iko.

²⁴ Ni sa vola oti na vosa ni vunau oqo e na dua nai vola ko Mosese, me oti sara,

²⁵ sa qai vakarota ko Mosese vei ira na Livai era daucolata na kato ni veiyalayalati i Jiova, ka kaya,

²⁶ Ni taura nai vola ni vunau oqo, ka tugana ki yasa e loma ni kato ni veiyalayalati i Jiova na nomuni Kalou, me toka maikina me beitaki kemuni.

²⁷ Ni'u sa kila na nomuni talaidredre, kei na nomuni domoqa: raica, ni'u sa bula tiko kei kemuni e na siga oqo, ko ni sa talaidredre ga vei Jiova; ia ena vakaevei na kena levu cake ni'u sa mate!

²⁸ Ni vakasoqoni ira vata vei au na qase kecega ni nomuni veimataqali, kei ira na nomuni turaga lalai, me'u tukuna e daligadra na vosa oqo, ka cavuti lomalagi kei vuravura me kilai ira ni ra sa ca.

²⁹ Ni'u sa kila, ni'u sa mate, kemuni na vakacacani kemuni sara, ka lesu tani mai na sala ka'u sa vakarota vei kemuni; ena yacovi kemuni talega na ca e na gauna maimuri; ni kemuni na caka ca e na mata i Jiova, me vakacudrui koya e na cakacaka ni ligamuni.

³⁰ A sa cavuta na vosa ni sere oqo ko Mosese e daligadra kecega nai soqosoqo ni Isireli, me oti sara: