Vakarua 29 - Vakavakadewa Makawa

Sa vakadreti ira ko Mosese me ra talairawarawa, 1-9. Era tu vata me ia na veiyalayalati kei Jiova, 10-17. Sa na cudruvi ko koya sa vuki tani na yalona ga, 18-28. A ka vuni sa kila ga na Kalou, 29.

¹ Sa vakaoqo na vosa ni veiyalayalati, sa vakarota vei Mosese ko Jiova me caka kei ira na Isireli e na vanua ko Moapi, me kenai kuri ni veiyalayalati sa cakava kei ira mai Orepi.

² A sa kacivi ira kecega na Isireli ko Mosese, ka kaya vei ira: Kemuni sa kunea na ka kecega sa cakava ko Jiova e matamuni e na vanua ko Ijipita kivei Fero, vei ira talega na nona tamata kecega, ki na nona vanua kece talega;

³ na veivakatovolei sa kunea na matamuni, na veivakatakilakila, kei na veika-mana levu oqori:

⁴ ia ka sa sega ni solia vei kemuni ko Jiova na loma e kila ka, kei na mata rai, kei na daliga rogo, ka yacova na siga oqo.

⁵ Ia sa vasagavulu na yabaki ka'u sa tuberi kemuni voli kina mai na vanua liwa: a nomuni sulu kemuni sa vakaisulu kina sa sega ni madra mai, ka sa sega ni madra mai na nomuni vava e na yavamuni.

⁶ Kemuni sa sega ni kana madrai, kemuni sa sega talega ni gunuva na waini se na yaqona kaukauwa: mo ni kila kina ni sai au ko Jiova na nomuni Kalou.

⁷ Ia ni kemuni sa yaco ki na yasana oqo, sa lako mai me vala kei keda ko Sioni na tui Esiponi, kei Oki na tui Pasani, ia eda a yaviti rau:

⁸ eda sa rawata talega na nodrau vanua, ka solia vei ira na Rupeni me ra taukena, kei ira na Kata, kei na dua na kena wase ni mataqali i Manasa.

⁹ Ia mo ni vakabauta na vosa ni veiyalayalati oqo ka cakava, mo ni vinaka kina e na ka kecega kemuni sa cakava.

¹⁰ Kemuni sa tu kecega edaidai e na mata i Jiova na nomuni Kalou: na nomuni turaga e na nomuni veimataqali, na nomuni qase, kei na nomuni turaga lalai, na Isireli kecega,

¹¹ na nomuni lalai, na watimuni, kei na vulagi sa tiko e na nomuni tikotiko, ko koya sa dauta buka kei koya sa dautaki wai:

¹² mo ni vauci kina e na veiyalayalati i Jiova na nomuni Kalou: kei na nona bubului, sa cakava vei kemuni edaidai ko Jiova na nomuni Kalou:

¹³ me vakataudeitaki kemuni edaidai ko koya mo ni nona matanitu, ka me nomuni Kalou ko koya, me vaka ka kaya ko koya vei kemuni, me vaka talega na nona bubului vei iratou na nomuni qase, vei Eparaama, vei Aisake, kei Jekope.

¹⁴ Ia ka sega walega vei kemuni ka'u sa cakava na veiyalayalati oqo kei na bubului oqo;

¹⁵ ia vei koya sa tu vata kei keda edaidai e na mata i Jiova na noda Kalou, vei koya talega sa sega ni tu vata kei keda e na siga oqo:

¹⁶ (Ni kemuni sa kila na noda tiko mai Ijipita; kei na noda lako voli e na kedra maliwa na veimatanitu kemuni a lako voli kina;

¹⁷ ia kemuni a raica na nodra veika vakasisila kei na nodra veimatakau, na kau kei na vatu, na siliva kei na koula, sa tiko vei ira.)

¹⁸ De dua vei kemuni na tagane, se na yalewa, se na matavuvale, se na mataqali, sa vuki tani edaidai na yalona maivei Jiova na noda Kalou, me la'ki qaravi ira na kalou ni veimatanitu oqori; de dua vei kemuni na waka sa tubu maikina na gaga kei na gagaduvaduva;

¹⁹ ka sa yaco ni sa rogoca na vosa ni veicudruvi oqo, ka sa vosavakalougatataki koya e na yalona, ka kaya, Au na vinaka tikoga ni'u sa muria na ka sa nakita tiko na lomaqu; ka me kuria na viagunu e na mateni ko koya:

²⁰ ena bese ni vosoti koya ko Jiova, ia ena qai kubou mai na cudru i Jiova kei na nona vuvu ki na tamata ko ya, ia ena tauci koya na vosa ni veicudruvi kecega sa volai e nai vola oqo, ia ena bokoca laivi na yacana ko Jiova mai na ruku i lomalagi.

²¹ Ia ena tawasei koya ki na ca ko Jiova, mai na mataqali kecega ni Isireli, me vaka na vosa ni veicudruvi kecega ni veiyalayalati sa volai e nai vola ni vunau oqo.

²² Ia nai tabatamata era na muri kemuni na luvemuni, kei na kai tani sa lako mai na vanua yawa, era na kaya, ni ra sa raica na mate levu ni vanua ko ya, kei na mate sa vakayacora kina ko Jiova;

²³ ni sa sulifure ka masima na vanua taucoko, sa kama, sa sega ni tei, ka sa sega ni vua, se vakatubura na co, sa vaka ni sa vakarusai ko Sotoma kei Komora, ko Etima, kei Sepoimi, ko ira sa vakarusa ko Jiova e nona cudru kei na nona lesa:

²⁴ ia era na kaya na veimatanitu kecega, A cava sa cakava kina ko Jiova na ka oqo ki na vanua oqo? sa vakaevei na katakata ni cudru levu oqo?

²⁵ Ena qai kainaki, Ni ra sa biuta na veiyalayalati kei Jiova na Kalou ni nodra qase, sa kitaka kei ira ko koya ni sa kauti ira ko koya mai na vanua ko Ijipita:

²⁶ ni ra sa la'ki qaravi ira na kalou tani, ka soro kina, na veikalou era sega ni kila eliu, ka sa sega ni solia vei ira ko koya:

²⁷ a sa tubu kina na cudru i Jiova ki na vanua oqo, me vakayacora kina na vosa ni veicudruvi kecega sa volai e nai vola oqo:

²⁸ a sa cavuivuvutaki ira tani mai na nodra vanua ko Jiova, e na cudru, kei na lesa, kei na veilevaci levu, ka biuti ira ki na vanua tani, me vaka e na siga oqo.

²⁹ A ka sa vuni tu sa nei Jiova na noda Kalou; ia na ka sa tukuni mai sa noda kei na nodra na luveda ka tawa mudu, me da cakava kina na vosa kecega ni vunau oqo.