Vakarua 28 - Vakavakadewa Makawa

A ka ni veivakalougatataki vei ira sa talairawarawa, 1-14. A ka ni veivakarusai vei ira sa talaidredre, 15-68.

¹ Ia kevaka ko ni na vakarorogo vakaidina ki na vosa i Jiova na nomuni Kalou, mo ni vakabauta ka cakava na nonai vakaro kecega ka'u sa vakarota vei kemuni edaidai, ena qai laveti kemuni cake ko Jiova na nomuni Kalou mo ni uasivi vei ira kecega na matanitu e vuravura:

² ia ena yacovi kemuni na ka ni veivakalougatataki kecega oqo, ka vauci kemuni, kevaka ko ni na vakarorogo ki na vosa i Jiova na nomuni Kalou:

³ O ni na kalougata e na koro, ko ni na kalougata talega e na veiwere.

⁴ Ena kalougata na vua ni ketemuni, kei na vuata ni nomuni vanua, kei na vua ni nomuni manumanu e yavai va, na luve ni nomuni pulumokau, kei na nomuni qele ni sipi.

⁵ Ena kalougata na nomuni sova kei na nomuni lololo.

⁶ O ni na kalougata ni kemuni curu mai, ko ni na kalougata talega ni kemuni sa curu yani.

⁷ A nomuni meca era vala kei kemuni, ena soli ira ko Jiova me ra moku e matamuni: era na lako mai e na sala e dua me tavaki kemuni, ka kubu e matamuni e na sala e vitu.

⁸ Ena vakarota ko Jiova mo ni kalougata e na nomuni lololo, kei na ka kecega sa kitaka na ligamuni; ia ena vakalougatataki kemuni e na vanua sa solia vei kemuni ko Jiova na nomuni Kalou.

⁹ Ena vakataudeitaki kemuni ko Jiova mo ni nona matanitu tabu, me vaka ka bubului kina vei kemuni ko koya, kevaka ko ni na vakabauta na vunau i Jiova na nomuni Kalou, ka lako e na nona sala.

¹⁰ A ra na raica na matanitu kecega e vuravura ni sa vakatokai vei kemuni na yaca i Jiova; a ra na rerevaki kemuni.

¹¹ Ia ena vakalevutaka na nomuni yau ko Jiova, e na vua ni ketemuni, kei na vua ni nomuni manumanu e yavai va, kei na vuata ni nomuni vanua, e na vanua sa bubului kina ko Jiova vei ira na nomuni qase me solia vei kemuni.

¹² Ena dolava vei kemuni ko Jiova na nona lololo vinaka, na lomalagi, me vakatauca na uca ki na nomuni vanua e na vula e dodonu, ka me vakalougatataka na cakacaka kecega ni ligamuni: ka ko ni na soli ka me talevaki ki na matanitu e vuqa, ia kemuni ena sega ni kere ka.

¹³ Ia ena qisi kemuni ko Jiova mo ni uludra, ka sega ni buidra; ia ko ni daucecere ka sega ni lolovira; kevaka ko ni na vakarorogo ki nai vakaro i Jiova na nomuni Kalou, ka'u sa vakarota vei kemuni edaidai, mo ni vakabauta ka cakava:

¹⁴ ka ko ni na sega ni lako tani mai na dua na vosa ka'u sa vakarota vei kemuni edaidai, ki nai matau, se nai mawi, ka muria na kalou tani mo qaravi ira.

¹⁵ Ia kevaka ko ni na sega ni vakarorogo ki na vosa i Jiova na nomuni Kalou, mo ni vakabauta mo cakava na nona vunau kecega kei na nonai lesilesi ka'u sa vakaroti kemuni kina edaidai; ena qai yacovi kemuni ka vauci kemuni na ka ca kecega oqo:

¹⁶ O ni na cudruvi e na koro, ko ni na cudruvi talega e na veiwere.

¹⁷ O ni na cudruvi e na nomuni sova kei na nomuni lololo.

¹⁸ Ena cudruvi na vua ni ketemuni, kei na vuata ni vanua, na luve ni nomuni pulumokau, kei na nomuni qele ni sipi.

¹⁹ O ni na cudruvi ni kemuni curu mai, ko ni na cudruvi talega ni kemuni curu yani.

²⁰ Ena vakayacora vei kemuni ko Jiova na rarawa, kei na lesavi, kei na cudru, e na ka kecega ko ni sa cakava e na ligamuni, ka mo ni kawaboko sara mada, ka rusa vakasauri; e na vuku ni ca ni nomuni valavala, ko ni sa biuti au kina.

²¹ Ena vakabita vei kemuni ko Jiova na mate ca, ka me vakaoti kemumi sara ko koya mai na vanua, ko ni sa lako kina me taukena.

²² Ena yaviti kemuni ko Jiova e na lila balavu, kei na katakata, kei na karovisa katakata, kei na waqawaqa ni yago, kei nai seleiwau, kei na cagi todra, kei na vu ni malai; a ra na muri kemuni tiko mo ni rusa mada.

²³ Ia na lomalagi e cake sa donuya na ulumuni ena parasa, kei na qele e yavamuni ena aironi.

²⁴ Ena cakava ko Jiova na uca ni nomuni vanua me nuku ka kuvu ni qele: ena tauci kemuni mai lomalagi, ka mo ni vakarusai mada.

²⁵ Ena soli kemuni ko Jiova mo ni moku e na matadra na nomuni meca; ko ni na lako yani e na dua na sala me vala kei ira, ka kubu e na sala e vitu e matadra: ia ko ni na veikauyaki ki na matanitu kecega e vuravura.

²⁶ Ia na yagomuni mate ena kedra kakana na manumanu vuka kecega, kei na manumanu tawa lasa ni vanua, ka sega na tamata me vakasava tani.

²⁷ Ena vakayacora vei kemuni ko Jiova na bo ni Ijipita, kei na somunadara, kei na bu ca, kei na milamila, ko ni na sega ni vakabulai rawa kina.

²⁸ Ena yaviti kemuni ko Jiova mo ni lialia, ka mataboko, me kidacala talega na lomamuni:

²⁹ ia ko ni na vakayayamo voli e na siga levu, me vaka sa vakayayamo voli na mataboko e na butobuto, ia ena sega ni yaco na ka ko ni cakava: ia ko ni na vakasaurarataki, ka daukovei tikoga, ia ena sega nai vakabula.

³⁰ O ni na vosaka na yalewa me watimuni, ia ena moce kaya na tamata tani: ko ni na tara na vale, ia ko ni na sega ni tiko kina: ko ni na tea na veivaivaini, ia ko ni na sega ni tauca na vuana.

³¹ A nomuni pulumokau ena vakamatei e matamuni, ia ko ni na sega ni kana kina: a nomuni asa ena koveraki tani e matamuni, ka sega ni vakasukai vei kemuni: a nomuni sipi ena soli yani vei ira na nomuni meca, ia ena sega e dua me kauta tale mai vei kemuni.

³² A luvemuni tagane kei na luvemuni yalewa era na soli ki na kai tani, ia ena rai matua tiko na matamuni, ka oca e na vukudra e na siga ka bogi: ia ena malumalumu na ligamuni.

³³ Era na kania na vuata ni nomuni vanua, kei na nomuni cakacaka kecega, e dua na matanitu ko sa sega ni kila; ia ko ni na vakasaurarataki ga ka butuqaqi tikoga:

³⁴ ia ko ni na lialia mai e na vuku ni ka ena rairai ki na matamuni, a ka ko na raica.

³⁵ Ena yavita na durumuni kei na yavamuni ko Jiova, e na bo rarawa sa sega ni vakabulai rawa, mai na qeteqete ni yavamuni ka cavaraka na buradelamuni.

³⁶ Ena kauti kemuni ko Jiova, kei na nomuni tui ko ni na bulia me lewai kemuni, ki na dua na matanitu ko sa sega ni kila, koi kemuni, se ko ira na nomuni qase; ia ko ni na qarava maikina na kalou tani, na kau kei na vatu.

³⁷ Ia ko ni na yaco me ka ni veivakurabuitaki, nai bole ca, kei na ka e dredrevaki, e na kedra maliwa na matanitu kecega sa kauti kemuni kina ko Jiova.

³⁸ E levu na sore ni sila ko ni na kauta yani ki na nomuni were, ka lailai na ka ko ni na yauta tale mai; ni ra na kania na vodre.

³⁹ O ni na tea na veivaivaini, ka samaka, ia ko ni na sega ni gunuva na waini, se kumuna vata na vuana; ni na kania na baca.

⁴⁰ Ena so na nomuni vu ni olive e na nomuni yasana kecega, ia ko ni na sega ni lumuti kemuni e na kena waiwai; ni na qeqera na vua ni nomuni olive.

⁴¹ Ena sucu vei kemuni na gonetagane kei na goneyalewa, ia era na sega ni tiko dei vei kemuni; ni ra na kau vakabobula.

⁴² Ena kania na nomuni kau kecega kei na vuata ni nomuni vanua na vodre.

⁴³ Na kai tani sa tiko kei kemuni ena tubu cake me cecere sara vei kemuni, ia koi kemuni, ko ni na lako sobu me lolovira sara.

⁴⁴ Ena solia vei kemuni ko koya me talevaki, ka ko ni na sega ni solia vua me talevaki: ena ulumuni ko koya, ia koi kemuni ko ni na buina.

⁴⁵ Ia na ca kecega oqo ena yacovi kemuni, ka muri kemuni, ka vauci kemuni, ka mo ni vakarusai mada; ni kemuni a sega ni vakarorogo ki na vosa i Jiova na nomuni Kalou, mo ni vakabauta na nonai vakaro kei na nonai lesilesi sa vakarota vei kemuni ko koya:

⁴⁶ ia era na tiko vei kemuni mei vakatakilakila, kei na ka ni veivakidacalataki, vei ira talega na nomuni kawa ka tawa mudu.

⁴⁷ Ni kemuni a sega ni qaravi Jiova na nomuni Kalou e na marau, kei na reki ni yalomuni, e na vuku ni sa levu tu na ka kecega;

⁴⁸ o koya ko ni na qaravi ira kina na nomuni meca sa tala ko Jiova me vala kei kemuni, ni ko sa viakana, ka viagunu, ka sa luvawale, ka sa dravudravua e na ka kecega: ia era na vauca ki domomuni nai vau kaukamea, ka me vakarusai kemuni mada.

⁴⁹ Ena kauta mai ko Jiova e dua na matanitu mai na vanua yawa me vala kei kemuni, io mai nai yalayala kei vuravura, me vaka na vuka ni ikeli; a matanitu ko ni sa sega ni kila na kena vosa;

⁵⁰ a matanitu sa mata lisoliso, sa na sega ni dokai ira na qase, se lomani ira na cauravou:

⁵¹ ia era na kania na nomuni luveni pulumokau, kei na vuata ni nomuni vanua, ka mo ni vakarusai mada: ena sega talega ni vakavoca vei kemuni na sila, na waini, se na waiwai, se na nomuni luve ni pulumokau, se na nomuni qele ni sipi, ka me vakarusai kemuni mada:

⁵² Ia era na bukuya na druadrua e na nomuni veikoro kecega, ka me bale sobu mada na nomuni bai cecere ka kaukauwa, na ka ko ni a vakararavi kina, e na nomuni vanua taucoko: ia era na bukuya na druadrua vei kemuni e na nomuni veikoro kecega e na nomuni vanua kecega, sa solia vei kemuni ko Jiova na nomuni Kalou.

⁵³ Ia ko ni na kania na vua ni ketemuni, na lewe ni luvemuni tagane kei na luvemuni yalewa, ko ira sa solia vei kemuni ko Jiova na nomuni Kalou, ni sa buku na druadrua e na vuku talega ni leqa era na vakaleqaleqai kemuni kina na nomuni meca:

⁵⁴ na tamata vei kemuni sa daurere ka bati digidigi sara, ena dua tani na matana vua na wekana, vei koya talega na watina sa daulomana sara, ka vei ira na luvena era sa vo tiko vua:

⁵⁵ sa sega kina ni solia vua e dua vei ira e dua na tiki ni luvena sa kana kina ko koya: ni sa sega ni vo vua e dua na ka e na vuku ni buku ni druadrua, kei na leqa sa na vakaleqai kemuni kina ko ira na nomuni meca e na nomuni veikoro kecega:

⁵⁶ Na yalewa vei kemuni sa dauyalolokomi ka bati digidigi, sa sega ni via tara na qele e na qeteqete ni yavana, e na vuku ni daulumaluma kei na dauyalolokomi ena ca na matana vua na wati ni lomaserena, vua talega na luvena tagane, kei na luvena yalewa,

⁵⁷ ki nai tokatoka-ni-gone talega sa lako mai na ketena; vei ira talega na luvena sa vakasucuma ko koya: ni na kania vuni ko koya ni sa dravudravua e na ka kecega, e na vuku ni buku ni druadrua, kei na leqa sa na vakaleqai kemuni kina na nomuni meca e na nomuni veikoro.

⁵⁸ Kevaka ko ni sa bese ni vakabauta ka cakava na vosa kecega ni vunau oqo sa volai e nai vola oqo, ka mo ni rerevaka na yaca rogo ka rerevaki oqo, KO JIOVA NA NOMUNI KALOU;

⁵⁹ ena qai cakava ko Jiova me ka e veivakidacalataki na ka ko ni yaviti kina kei na ka ena yaviti kina na nomuni kawa, ni kemuni sa yaviti vakalevu ka vakadede, ka mate rarawa ka vakadede.

⁶⁰ Ena vakayacora talega vei kemuni na mate kecega ni Ijipita ko sa daurerevaka; ia ena kabiti kemuni.

⁶¹ Ia na mate kecega, kei na rarawa kecega, sa sega ni vola i nai vola ni vunau oqo, ena vakayacora vei kemuni ko Jiova, ka mo ni vakarusai mada.

⁶² Ia kemuni ka vo tiko ena lewe lailai, ia eliu kemuni sa vaka na veikalokalo ni lomalagi e na kemuni lewe vuqa; ni kemuni a bese ni vakarorogo ki na vosa i Jiova na nomuni Kalou.

⁶³ Ia me vaka ka rekitaki kemuni eliu ko Jiova me caka vinaka vei kemuni, ka me vakalewevuqataki kemuni; ena qai reki vakakina ko Jiova me vakarusai kemuni, ka vakawabokotaki kemuni; ia kemuni na cavuraki tani mai na vanua ko ni sa lako kina mo ni taukena.

⁶⁴ Ia ena dui vakasevi kemuni ko Jiova vei ira na matanitu kecega, mai na dua nai yalayala kei vuravura ka yacova na kenai yalayala kadua; ia ko ni na qarava maikea na kalou tani, ko ni a sega ni kila, koi kemuni se ko ira na nomuni qase, io na kau kei na vatu.

⁶⁵ Ia ko ni na sega ni tiko vinaka e na veimatanitu oqo, ka na sega ni vakacegu na qeteqete ni yavamuni: ia ena vakayacora vei kemuni ko Jiova na yalo e sautaninini, kei na mata e rai cala, kei na loma rarawa:

⁶⁶ ia kemuni na vakabekataka na nomuni bula; ia ko ni na rere e na siga kei na bogi, ka sega ni dinata ni kemuni na bula:

⁶⁷ e na mataka ko ni na kaya, Isa lei na Kalou, Me yakavi mada! ia e na yakavi ko ni na kaya, Isa lei na Kalou, Me mataka mada! e na vuku ni rere ni lomamuni ko ni sa rere kina, kei na ka ena raica na matamuni.

⁶⁸ Ia ena kauti kemuni tale ki Ijipita ko Jiova e na veiwaqa ki na yasana ka'u a kaya kina vei kemuni, Ko ni na sega ni raica tale: ia kemuni na volitaki maikea vei ira na nomuni meca me tagane bobula, ka yalewa bobula, ia ena sega e dua me voli kemuni.