Vakarua 26 - Vakavakadewa Makawa

Na veivakatusa i koya sa vakacabora nai sevu, 1-11. A masumasu ni sa kau nai katini ni ka vua na Kalou, 12-15. Na veiyalayalati ni Kalou kei ira na tamata, 16-19.

¹ Ia ni kemuni sa lako mai ki na vanua sa solia vei kemuni ko Jiova na nomuni Kalou mei votavota, ka ko ni sa taukena, ka tiko kina;

² ko ni na kauta nai sevu ni vuata kecega ni vanua, ko na kauta mai na nomuni vanua sa solia vei kemuni ko Jiova na nomuni Kalou; ka tugana ki na sova, ka lako ki na yasana sa digitaka ko Jiova na nomuni Kalou me vakatikora kina na yacana.

³ Ia ko ni na lako vua ka bete e na gauna ko ya, ka kaya vua, Au sa vakatusa e na siga oqo vei Jiova na nomuni Kalou, ni'u sa yaco mai ki na vanua sa bubului kina ko Jiova vei ira na noda qase me solia vei keda.

⁴ Me na qai taura na sova ko koya na bete mai na ligamuni, ka tauca e na mata ni cabocabo-ni-soro i Jiova na nomuni Kalou.

⁵ Ia ko ni na qai vosa e na mata i Jiova na nomuni Kalou, ka kaya, A kai Siria na tamaqu, ka sa voleka ni rusa ka sa lako sobu ki Ijipita ko koya, ka tiko vulagi kina ko koya, ko ira talega era lewe lailai, a sa tubu maikea me matanitu levu, sa kaukauwa, ka lewe vuqa:

⁶ a ra sa vakacacani keimami ko ira na kai Ijipita, ka vakararawataki keimami, ka lesi keimami ki na cakacaka ni bobula sa dredre:

⁷ ia ni keimami sa tagi vei Jiova na Kalou ni neimami qase, sa rogoca na domo i keimami ko Jiova, ka raica na neimami rarawa, kei na neimami cakacaka, kei na neimami veivakasaurarataki:

⁸ a sa kauti keimami tani mai Ijipita ko Jiova e na liga kaukauwa, kei na liga sa dodo yani, kei na ka rerevaki dina, kei nai vakatakilakila eso, kei na cakacaka mana eso:

⁹ a sa kauti keimami mai ki na yasana oqo, ka sa solia vei keimami na vanua oqo, a vanua sa dave kina na wai-ni-sucu kei na oni:

¹⁰ Ia oqo, kemuni Jiova au sa kauta mai nai sevu ni vuata ni vanua ko ni sa solia mai vei au. Ia ko ni na tauca e na mata i Jiova na nomuni Kalou, ka lotu e na mata i Jiova na nomuni Kalou:

¹¹ ia ko ni na rekitaka na ka vinaka kecega sa solia vei kemuni ko Jiova na nomuni Kalou, ka vei ira talega na nomuni lewe-ni-vale, koi kemuni, kei na Livai, kei na vulagi sa tiko kei kemuni.

¹² Ni kemuni sa wasea oti nai katini ni nomuni vuata e nai katolu ni yabaki, na yabaki sa wase kina nai katini ni ka, ni qai solia vei ira na Livai, kei na vulagi, kei ira sa sega na tamadra, kei na yada, me ra kana e nomuni lomanibai, ka mamau;

¹³ ko ni na qai kaya e na mata i Jiova na nomuni Kalou, Au sa kauta mai vale na ka sa vakatabui, ka sa solia talega vei ira na Livai, kei na vulagi, vei ira sa sega na tamadra, kei na yada, me vaka na nomuni vakaro kecega ko ni sa vakarota vei au: au sa sega ni vakacataka na nomuni vunau, au sa sega talega ni guilecava:

¹⁴ au sa sega ni kana kina ni'u sa tagi yaso, ka'u sa sega ni vakayagataka e na ka sa sega ni savasava, se'u vakacabora ki na mate: au sa vakarorogo ki na vosa i Jiova na noqu Kalou; au sa kitaka me vaka na ka kecega kemuni sa vakarota vei au.

¹⁵ Mo ni rai sobu mai na nomuni tikotiko tabu, mai lomalagi, ka vakalougatataki ira na nomuni tamata na Isireli, kei na vanua kemuni sa solia vei keimami, me vaka kemuni a bubului kina vei ira na neimami qase, a vanua sa dave kina na wai-ni-sucu kei na oni.

¹⁶ E na siga oqo sa vakaroti kemuni ko Jiova na nomuni Kalou mo ni cakava nai lesilesi kei na lewa oqo: mo ni vakabauta kina ka cakava e na lomamuni taucoko, kei na yalomuni taucoko.

¹⁷ O ni sa tukuni Jiova edaidai me nomuni Kalou, ka ni kemuni na lako e nona sala, ka me vakabauta na nonai lesilesi, kei na nonai vakaro, kei na nona lewa, ka vakarorogo ki na nona vosa:

¹⁸ ka sa tukuni kemuni edaidai ko Jiova mo ni nona matanitu talei, me vaka sa yalataka vei kemuni, ka mo ni vakabauta kina na nonai vakaro kecega;

¹⁹ me laveti kemuni talega mo ni cecere vei ira na matanitu kecega sa cakava ko koya, ni kemuni sa vakavinavinakataki, ka sa rogo, ka sa vakarokorokotaki; ka mo ni matanitu tabu me nei Jiova na nomuni Kalou, me vaka na nona vosa.