Vakarua 23 - Vakavakadewa Makawa

Ko ira sa tabu ni curuma nai soqosoqo i Jiova, kei ira sa tara vei ira, 1-8. Me savasava na matai valu, 9-14. A tamata sa dro, 15,16. A ka eso sa vakasisila vei Jiova, 17,18. A veivoli lavo, 19,20. A bubului, 21-23. Sa tara me kania na vuata ni kai nomuni, ka sa tabu me kauta tani, 24,25.

¹ O koya sa mavoa na sore ni nona, se koya sa mudu na nona ka vakatagane, me kakua ni curu ki nai soqosoqo i Jiova.

² A luve ni butako e tabu ni curu ki nai soqosoqo i Jiova; ia ka yacova nai katini ni nonai tabatamata, e tabu me ra curu ki nai soqosoqo i Jiova.

³ Na kawa i Amoni se na kawa i Moapi era na sega ni curu ki nai soqosoqo i Jiova; ia me yacova nai katini ni nodra i tabatamata, ena tabu ni ra curu ki nai soqosoqo i Jiova ka tawa mudu:

⁴ ni ra sega ni kauta na madrai kei na wai, ka la'ki tavaki kemuni e na sala, ni kemuni a lako tani mai Ijipita; ka ni ra voli Pelami na luve i Piori na kai Picori mai Mesopotemia, me vatonaki kemuni.

⁵ Ia sa bese ga ni vakarorogo vei Pelami ko Jiova na nomuni Kalou; a sa vukica na vatovato ni ca ko Jiova na nomuni Kalou me vosa ko ni sa kalougata kina, ka ni sa lomani kemuni ko Jiova na nomuni Kalou.

⁶ Mo ni kakua ni qara na ka me ra sautu kina se na ka me ra vinaka kina, e na nomuni veisiga kecega, ka sega ni mudu.

⁷ Mo ni kakua ni cata na kai Itomi; ni sa wekamuni ko koya: mo ni kakua ni cata na kai Ijipita: ni kemuni a tiko vulagi e na nona vanua.

⁸ A luvedra sa sucu vei ira, era na curuma nai soqosoqo i Jiova e nai katolu ni nodra i tabatamata.

⁹ Ni sa lako yani na nomuni matai valu me veivala kei ira na nomuni meca, mo ni qarauni kemuni mai na ka ca kecega.

¹⁰ Kevaka sa dua na tamata vei kemuni sa sega ni savasava e na vuku ni dua na ka sa yaco loa vua e na bogi, me qai lako tani ko koya ki nai bili ni tikotiko, me kakua ni lako mai ki loma ni tikotiko:

¹¹ ia ni sa toro mai na yakavi, ena sili ko koya e na wai: ia ni sa dromu na mata-ni-siga, me qai curu mai ki nai tikotiko ko koya.

¹² Ia me dua na nomuni tikina mai nai bili ni tikotiko, ko na lako yani kina:

¹³ ka me dua na mata ni sau e na nomuni yaragi ni valu; ia ena yaco ni kemuni sa la'ki wai, mo ni qai kelia na qele ka buluta na ka e lako maivei kemuni:

¹⁴ ni sa lako voli e na nomuni tikotiko ko Jiova na nomuni Kalou, me vakabulai kemuni, ka me soli ira na nomuni meca vei kemuni; o koya me savasava kina na nomuni tikotiko: me kakua kina ni raica ko koya na ka ca vei kemuni, ka gole tani maivei kemuni.

¹⁵ Mo ni kakua ni solia tale vua na turaga na tamata sa dro kivei kemuni mai vua na nona turaga:

¹⁶ ena tiko ga kei kemuni ko koya, io e na kemuni maliwa, e na yasana sa digitaka ko koya e na dua na nomuni koro, sa vinakata ko koya: mo ni kakua ni vakasaurarataki koya.

¹⁷ Me kakua e dua na yalewa ni Isireli me dautagane, se dua vei ira na tagane ni Isireli me veivakasisilataki.

¹⁸ Mo ni kakua ni kauta nai voli ni yalewa dautagane, se nai voli ni koli sa veivakasisilataki, ki na vale i Jiova na nomuni Kalou, e na vuku ni dua na bubului: ni sa ka vakasisila koi rau ruarua oqo vei Jiova na nomuni Kalou.

¹⁹ Mo ni kakua ni solia e dua na ka vua na wekamuni mo ni taura tale kei na kenai kere, sei lavo, se kakana, se dua na ka sa dautauri tale kei na kenai kere.

²⁰ E tara mo ni solia na ka vua na kai tani mo ni taura tale kei na kenai kere; ia sa tabu ga mo ni soli ka ki na wekamuni mo ni taura tale kei na kenai kere: me vakalougatataki kemuni kina ko Jiova na nomuni Kalou e na ka kecega sa cakava na ligamuni, e na vanua ko ni sa lako yani kina mo ni taukena.

²¹ Ni kemuni sa bubului vei Jiova na nomuni Kalou, mo ni kakua ni berabera ni vakayacora: ni na taroga dina vei kemuni ko Jiova na nomuni Kalou; o ni na qai cala kina.

²² Ia kevaka ko sa kua ni bubului, ena qai sega ni ca vei kemuni.

²³ A vosa sa lako mai na gusumuni mo ni vakabauta ka vakayacora; io nai soro sa lomamuni ga mo vakacabora, me vaka ko ni sa bubului vei Jiova na nomuni Kalou, na ka sa yalataka na gusumuni.

²⁴ Ni kemuni sa curu ki na nona veivaivaini na kai nomuni, e tara mo ni kania loa na vua ni vaini mo ni mamau kina; ia e tabu mo ni tugana ki na nomuni kato.

²⁵ Ni kemuni sa lako ki loma ni were ni sila ni kai nomuni, e tara mo vetia na kena sola e na ligamuni; ia sa tabu mo ni vakacuruma nai sele ni sila ki na sila ni kai nomuni sa tu ga.