Vakarua 18 - Vakavakadewa Makawa

Ko Jiova sa nodra i votavota na bete kei na Livai, 1,2. A kena tiki ni soro na bete, 3-5; a kedra na Livai, 6-8. Me biu na ka era vakasisila kina na veimatanitu, 9-14. Sa yalataki e dua na parofita levu, 15-19. Me vakamatei na parofita vakailasu, 20-22.

¹ Ko ira na bete na Livai, io ko ira kece na mataqali i Livai, ena sega na nodra tikina se nodra i votavota vata kei ira na Isireli: me ra kania ga na ka sa vakacabori vei Jiova e na bukawaqa, kei na nonai votavota.

² Era na sega kina ni votai e na kedra maliwa na wekadra: ko Jiova ga sa nodra i votavota, me vaka ka kaya vei ira.

³ Ia sa dodonu me nodra na bete mai vei ira na tamata, maivei ira era vakacabora nai soro, se na pulumokau se na sipi; me ra solia vua na bete na tabana, kei na baluna ruarua, kei na kato ni kena.

⁴ Ai sevu ni nomuni sila, na nomuni waini, kei na nomuni waiwai, kei na vutika na sipi sa koti taumada, mo ni solia vei koya.

⁵ Ni sa digitaki koya ko Jiova na nomuni Kalou mai na nomuni mataqali kecega, me tu me ia na veiqaravi e na yaca i Jiova, ko koya kei ira na luvena ka sega ni mudu.

⁶ Ia kevaka sa na lako mai na Livai mai na dua na nomuni koro e Isireli taucoko, sa tiko vulagi kina ko koya, a sa lako mai ni sa gu sara na lomana ki na yasana sa digitaka ko Jiova;

⁷ ena qai ia na veiqaravi e na yaca i Jiova na nona Kalou, me vakataki ira kecega na Livai na wekana, era sa dautu e na mata i Jiova.

⁸ Ena tautauvata na kedrai votavota me ra kania, ia ena kenai kuri talega vei ira yadua nai voli ni ka mai nona qase.

⁹ Ni kemuni sa yaco ki na vanua sa solia vei kemuni ko Jiova na nomuni Kalou, mo ni kakua ni muria na nodra i valavala vakasisila na veimatanitu ko ya.

¹⁰ Me kakua ni kune vei kemuni e dua me vakacabora na luvena tagane se na luvena yalewa e loma ni bukawaqa, se dua na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau,

¹¹ se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate.

¹² Ni ra sa tamata vakasisila vei Jiova ko ira kecega era sa kitaka na veika oqo: e na vuku talega ni veika vakasisila oqo sa vakasevi ira tani e matamuni ko Jiova na nomuni Kalou.

¹³ Mo ni yalodina sara vei Jiova na nomuni Kalou.

¹⁴ Ni ra sa vakarorogo vei ira era daudigitaka na siga eso, kei ira na rairai, ko ira na veimatanitu ko ni na taukena: ia koi kemuni, sa sega ni laivi kemuni ko Jiova na nomuni Kalou mo ni vakakina.

¹⁵ Ena vakatubura vei kemuni ko Jiova na nomuni Kalou e dua na parofita mai na kemuni maliwa, maivei ira na wekamuni, me vakataki au; ko ni na vakarorogo vei koya;

¹⁶ me vaka na ka kecega ko ni a kerea vei Jiova na nomuni Kalou mai Orepi, e na siga ni soqoni vata, ka kaya, Me'u kakua ni rogoca tale na domo i Jiova na noqu Kalou, me'u kakua talega ni raica tale na bukawaqa levu oqo, de'u mate kina.

¹⁷ A sa kaya vei au ko Jiova, Sa ka dodonu na ka era sa kaya:

¹⁸ au na vakatubura vei ira e dua na parofita maivei ira na wekadra, me vakataki iko, ia ka'u na vakacuruma na noqu vosa ki na gusuna; ia ena tukuna vei ira na ka kecega ka'u na vakarota vei koya:

¹⁹ ia na tamata sa na sega ni vakarorogo ki na noqu vosa sa na tukuna ko koya e na yacaqu, au na tarogi koya kina.

²⁰ Ia na parofita sa doudou me cavuta e dua na vosa e na yacaqu, na ka ka'u sa sega ni vakarota vua me vosataka, se sa vosa e na yaca ni kalou tani eso, ena mate ga na parofita ko ya.

²¹ Ia de ko ni kaya e lomamuni, Keitou na kila vakaevei na vosa sa sega ni cavuta ko Jiova?

²² ni sa vosa e dua na parofita e na yaca i Jiova, kevaka sa sega ni caka na ka, se yaco mai, sa qai sega ni cavuta na ka ko ya ko Jiova; sa cavuta vakaviavialevu na parofita: mo kakua ni rerevaki koya.