Vakarua 17 - Vakavakadewa Makawa

Me vinaka sara na manumanu mei soro, 1. Me vakamatei na tamata sa qarava na kalou tani, 2-7. Me lewa na ka dredre na bete kei na mataveilewai; ka me mate ko koya sa beca na lewa, 8-13. Ai valavala ni tui, 14-20.

¹ Mo ni kakua ni vakacabora mei soro vei Jiova na nomuni Kalou na pulumokau, se na sipi, sa ca e dua na tikina, se sa tauvi mate: ni sa ka vakasisila oqori vei Jiova na nomuni Kalou.

² Kevaka sa kune vei kemuni, e na dua na nomuni loma ni koro sa solia vei kemuni ko Jiova na nomuni Kalou, e dua na tagane se dua na yalewa sa caka ca e na mata i Jiova na nomuni Kalou, ni sa vakacataka na nona veiyalayalati,

³ a sa la'ki qarava eso na kalou tani, ka sa cuva kina, se na mata-ni-siga, se na vula, se dua na kalokalo mai lomalagi, na ka ka'u sa vunautaka me kakua;

⁴ a sa tukuni vei kemuni, ka ko ni sa rogoca, mo ni qai vakatarotaroga vakavinaka; ia, kevaka sa dina, ka sa vakadinadinataki, ni sa caka mai Isireli na ka vakasisila oqo;

⁵ ko ni na qai kauta mai na tagane ko ya, se na yalewa ko ya, sa kitaka na ka ca oqori, ki na nomuni matamata-ni-koro, io na tagane ko ya se na yalewa ko ya, ka vakavirika e na vatu, me mate kina.

⁶ O koya sa dodonu me mate, ena vakamatei ga ni sa vakadinadina e lewe rua se lewe tolu na tamata era kila: ena sega ni vakamatei ko koya ni sa vakadinadina e dua ga na tamata.

⁷ Na ligadra nai vakadinadina ena yaviti koya taumada me mate kina, ka na yaviti koya emuri na ligadra na tamata kecega. Ko ni na vakaotia kina na ca mai na kemuni maliwa.

⁸ Kevaka sa yaco e dua na ka e dredre mo ni lewa kina se ka e na vuku ni veivakamatei, se ka e veiletitaki, se na veiraravui, ni sa ka e veiletitaki e na nomuni lomanibai: mo ni qai tu, ka lako ki na yasana sa lesia ko Jiova na nomuni Kalou;

⁹ ia mo ni lako vei ira na bete na luve i Livai, kei na turaga ni lewa e na gauna ko ya, ka taroga; a ra na vakatakila vei kemuni na ka e lewai me caka:

¹⁰ ia ko ni na qai kitaka me vaka na lewa era na vakatakila vei kemuni ko ira e na yasana ko ya sa lesia ko Jiova; ia ko ni na kitaka me vaka na ka kecega era sa vakavulica vei kemuni:

¹¹ me vaka na vunau era sa vakavulica vei kemuni, ka vaka na lewa era sa tukuna vei kemuni, mo ni kitaka vakakina: mo ni kakua ni gole tani ki nai matau se nai mawi mai na lewa era sa tukuna vei kemuni.

¹² Ia na tamata sa cakacaka vakaviavialevu, me kakua ni vakarorogo kina vua na bete sa tu maikea me ia na veiqaravi e na mata i Jiova na nomuni Kalou, se vua na turaga ni lewa, na tamata ko ya ena mate. Ia ko ni na vakaotia kina na ca maivei Isireli.

¹³ A ra na rogoca na tamata kecega, ka ra na rere, ka sega tale ni cakacaka vakaviavialevu.

¹⁴ Ni kemuni sa yaco ki na vanua sa solia vei kemuni ko Jiova na nomuni Kalou, ka ko ni sa taukena, ka tiko kina, ka kaya, Au na lesia vei au e dua na tui, me vakataki ira na veimatanitu kecega era tiko vakavolivoliti au;

¹⁵ ko ni na qai lesia vakaidina me nomuni tui, na tamata sa na digitaka ko Jiova na nomuni Kalou: mo ni lesia e dua vei ira era wekamuni me nomuni tui: e tabu ni kemuni lesia na kai tani me lewai kemuni, o koya sa sega ni wekamuni.

¹⁶ Ia me kakua ga ni vakalevutaka na nona ose ko koya, se vakalesui ira na tamata ki Ijipita, me levu kina na nona ose: ni sa kaya oti vei kemuni ko Jiova, Mo ni kakua ni lesu tale e na sala ko ya.

¹⁷ Ia me kakua talega ni vakalevuqataka na watina, me kakua kina ni gole tani na yalona: me kakua talega ni vakalevutaka sara na nona siliva kei na nona koula.

¹⁸ Ia ni sa tiko ko koya e na nonai tikotiko vakatui, me qai vola ko koya nai vakaro oqo me nonai vola, me vaka ko ya sa nodra na bete na luve i Livai:

¹⁹ ia ena tu ga vua, ka me dauwilika ko koya e na veisiga sa bula kina: me vakavulici kina ko koya me rerevaki Jiova na nona Kalou, me vakabauta na vosa kecega ni vakaro oqo kei nai lesilesi kece oqo, ka me cakava:

²⁰ me kakua ni viavialevu kina vei ira na wekana, me kakua talega ni gole tani mai nai vakaro, ki nai matau se ki nai mawi: me balavu kina na nona bula ni sa tui ko koya, ko koya, kei iratou na luvena, e na kedra maliwa na Isireli.