Vakarua 15 - Vakavakadewa Makawa

A yabaki ni veisereki, 1-6. Me ra lomani na dravudravua, 7-11. A vunau e na vuku ni tamata sa voli, 12-18. Sa nei Jiova na ulumatua tagane, 19-23.

¹ Ni sa oti na yabaki vitu mo ni dauia e dua na veisereki.

² Sa vakaoqo nai valavala ni veisereki: A tamata yadua sa soli talevaka na ka vua na kai nona, me qai sereka ka me kakua ni saumi; me kakua ni taroga vua na kai nona, se na wekana: ni sa kacivaki na veisereki i Jiova.

³ E dodonu mo ni taroga vua na kai tani: ia na nomuni ka sa tu vua na wekamuni mo sereka ka me kakua ni saumi.

⁴ Ia ena sega e dua na tamata dravudravua vei kemuni; ni na vakalougatataki kemuni vakalevu ko Jiova e na vanua sa solia vei kemuni ko Jiova na nomuni Kalou mei nomuni votavota mo ni taukena;

⁵ kevaka ko ni sa vakarorogo vakavinaka ki na domo i Jiova na nomuni Kalou, mo ni nanuma mo cakava nai vakaro kecega oqo ka'u sa vakarota vei kemuni edaidai.

⁶ Ni na vakalougatataki kemuni ko Jiova na nomuni Kalou, me vaka ka kaya vei kemuni: ia ko ni na soli talevaka vei ira na veimatanitu e vuqa, ia ko ni na sega ni kerekere: ko ni na lewa talega na matanitu e vuqa, a ra na sega ni lewai kemuni.

⁷ Kevaka sa tiko vei kemuni na tamata dravudravua, e dua vei ira na wekamuni, e na dua na nomuni lomanibai, e na nomuni vanua sa solia vei kemuni ko Jiova na nomuni Kalou, mo ni kakua ni vakaukauwataka na yalomuni, se qumia na ligamuni vua na wekamuni dravudravua:

⁸ ia mo ni dedeka sara ga na ligamuni vei koya, ka soli talevaka sara vua na ka sa via rawata ka me ganita na nona dravudravua.

⁹ Mo ni qarauni kemuni de dua na nanuma ca e na yalomuni, ka vaka, Sa voleka mai nai kavitu ni yabaki, na yabaki ni veisereki; ka sa ca na matamuni vua na wekamuni dravudravua, ka ko ni sega ni cakacaka vakayalololoma vua; a sa tagi vei Jiova e na vukumuni ko koya, ka ko ni sa cala kina.

¹⁰ Mo ni solia dina vua na ka ni loloma, mo ni kakua talega ni yalo ca ni kemuni sa soli ka vua: ia e na vuku ni ka oqo ena vakalougatataki kemuni ko Jiova na nomuni Kalou e na nomuni cakacaka kecega, kei na ka kecega sa cakava na ligamuni.

¹¹ Ni na sega ni mudu na tamata dravudravua mai na vanua: o koya ka'u sa vakaroti kemuni kina, ka kaya, Mo ni dedeka sara na ligamuni vua na wekamuni, ki na nomuni tamata wale; kei na nomuni tamata dravudravua, e na nomuni vanua.

¹² Kevaka sa volitaki vei kemuni e dua na wekamuni, sa Iperiu tagane, se sa Iperiu yalewa, a sa qaravi kemuni ka yabaki ono; mo ni qai sereki koya me lako tani vei kemuni ka veitalia ga, e nai kavitu ni yabaki.

¹³ Ia ni kemuni sa laiva me lako tani vei kemuni, mo ni kakua ni laivi koya me lako wale yani:

¹⁴ mo ni solia vakayauyau vei koya mai na nomuni sipi, ka mai na nomuni sila, ka mai na nomuni waini: mo ni solia vei koya mai na ka sa vakalougatataki kemuni kina ko Jiova na nomuni Kalou.

¹⁵ Ia mo ni nanuma ni kemuni a bobula mai na vanua ko Ijipita, a sa vakabulai kemuni ko Jiova na nomuni Kalou: o koya ka'u sa vakarota kina na ka oqo vei kemuni edaidai.

¹⁶ Ia kevaka sa kaya vei kemuni ko koya: Au na sega ni lako tani vei kemuni; ka ni sa lomani kemuni kei na nomuni lewe-ni-vale, ni sa tiko vinaka kei kemuni;

¹⁷ mo ni qai taura nai cula, ka cula na daligana ka veituituitaka kei nai sogo ni vale, ena qai nomuni bobula ka sega ni mudu. Ia mo ni kitaka talega vakakina vua na nomuni vada.

¹⁸ Me kakua ni vaka na ka sa dredre vei kemuni mo ni sereki koya me lako tani vei kemuni ka me veitalia ga; ni sa tautauvata na nona qaravi kemuni e na yabaki e ono kei na nona qaravi kemuni e na yabaki e tinikarua na tamata sa voli na nona cakacaka: ia ena vakalougatataki kemuni ko Jiova na nomuni Kalou e na ka kecega ko ni sa cakava.

¹⁹ A ulumatua tagane kecega ni nomuni pulumokau kei na nomuni sipi, mo ni vakatabuya me nei Jiova na nomuni Kalou: mo ni kakua ni vakayagataka na ulumatua ni nomuni pulumokau e na dua na cakacaka, mo ni kakua talega ni kotiva na ulumatua ni nomuni sipi.

²⁰ Mo ni kania ga, koi kemuni kei na nomuni lewe-ni-vale, e na mata i Jiova na nomuni Kalou, e na veiyabaki, e na yasana sa digitaka ko Jiova.

²¹ Ia kevaka sa ca e dua na tikina, ke sa lokiloki, se mataboko, se dua na tikina e ca, mo ni kakua ni vakacabora vei Jiova na nomuni Kalou.

²² Mo ni kania e nomuni lomanibai: ko koya sa sega ni savasava vata kei koya sa savasava, me vaka na keseli kei na ati.

²³ Ia na kena dra ga mo ni kakua ni kania; mo ni livia ki na qele me vaka na wai.