Vakarua 14 - Vakavakadewa Makawa

Me ra kakua ni vakacacana na yagodra, 1,2. A ka sa tara kei na ka sa tabu ni kani, 3-27. E dua na ka ni loloma vei ira na dravudravua, 28,29.

¹ Oi kemuni sa luve i Jiova na nomuni Kalou: mo ni kakua ni tavai kemuni, se tasia na yadremuni, e na vukudra na mate.

² Ni kemuni sa matanitu savasava vei Jiova na nomuni Kalou, a sa digitaki kemuni ko Jiova maivei ira na matanitu kecega sa tiko e dela i vuravura, mo ni nona matanitu talei.

³ Mo ni kakua ni kania e dua na ka sa vakasisila.

⁴ Oqo na manumanu e yavai va mo ni kania: na pulumokau, na sipi kei na me,

⁵ na ati, na kaseli, na ropuki, na me kila, na paisoni, na anitilope, kei na samoi.

⁶ Kei na manumanu e yavai va kecega sa wase na kena ququ, ka sa sei sara me wase rua, ka sa mama vakarua na kena, mo ni kania oqo vei ira na manumanu e yavai va.

⁷ Ia ko ira oqo vei ira sa mama vakarua na kena, kei ira sa wase na kena ququ, dou kakua ni kania; na kameli, kei na eri, kei na koni: ka ni ra sa mama vakarua na kedra, ka sa sega ni wase na kedra ququ; era sa tabu vei kemuni.

⁸ Kei na vuaka, ni sa wase na kena ququ, ka sa sega ni mama vakarua na kena, sa tabu vei kemuni: mo ni kakua ni kania na lewedra, mo ni kakua talega ni tara na yagodra ni sa mate.

⁹ Na ika oqo e tara mo ni kania: na ika kecega sa vakatutuna ka vakavarina mo ni kania.

¹⁰ Ia na ika kecega sa sega ni vakatutuna ka sega ni vakavarina mo ni kakua ni kania; sa tabu vei kemuni.

¹¹ A manumanu vuka kecega sa savasava mo ni kania.

¹² Ia na manumanu oqo mo ni kakua ni kania: na mataqali ikeli e tolu,

¹³ kei na veimataqali vulituri,

¹⁴ kei na mataqali reveni kecega,

¹⁵ kei na ositereji, kei na mataqali lulu kecega, kei na manulevu,

¹⁶ io na lulu tabu, kei na lulu tani,

¹⁷ kei na veimataqali suani,

¹⁸ kei na veimataqali belo, kei na upupa, kei na beka.

¹⁹ Ia na manumanu vuka kecega sa dauqasi sa tawa savasava vei kemuni: e tabu ni ra sa kani.

²⁰ Na manumanu vuka kecega sa savasava e tara mo ni kania.

²¹ E tabu ni kemuni kania e dua na ka sa mate loa: mo ni solia vua na vulagi sa tiko e nomuni lomanibai, me kania ko koya; se mo ni volitaka vua na kai tani: ni kemuni sa matanitu savasava vei Jiova na nomuni Kalou. Mo ni kakua ni vakasaqa na luve ni me e na wai-ni-sucu i tinana.

²² Mo ni solia vakaidina na kenai katini ni vua ni nomuni teitei kecega, sa vuataka na veiwere e na veiyabaki.

²³ Ia mo ni kania nai katini ni nomuni sila, na nomuni waini, kei na nomuni waiwai, kei na ulumatua ni nomuni pulumokau kei na nomuni sipi, e na mata i Jiova na nomuni Kalou, e na yasana sa digitaka ko koya me vakatikora kina na yacana; mo ni vakavulici kina mo rerevaki Jiova tikoga na nomuni Kalou.

²⁴ Ia kevaka sa balavu vei kemuni na sala, sa dredre kina mo ni kauta, ni sa yawa vei kemuni na yasana sa digitaka ko Jiova na nomuni Kalou me vakatikora kina na yacana, ni sa vakalougatataki kemuni ko Jiova na nomuni Kalou:

²⁵ mo ni qai volitaka me kenai sau nai lavo, ka vauca nai lavo e na ligamuni, ka lako ki na yasana sa digitaka ko Jiova na nomuni Kalou:

²⁶ mo ni qai solia nai lavo ko ya me rawa kina na ka kecega sa garova na yalomuni, se na pulumokau, se na sipi, se na waini, se na yaqona kaukauwa, se na ka tani kecega sa garova na yalomuni: ia mo ni kana maikea e na mata i Jiova na nomuni Kalou, ka reki, koi kemuni, kei ira na nomuni lewe-ni-vale;

²⁷ ia na Livai sa tiko e nomuni lomanibai, mo ni kakua ni biuta; ni sa sega na nona tikina se nonai votavota vata kei kemuni.

²⁸ Ni sa cava na yabaki e tolu mo ni kauta mai nai katini ni nomuni vuata kecega e na yabaki ko ya, ka binia e nomuni lomanibai:

²⁹ ia na Livai, ni sa sega na nona tikina se nonai votavota vata kei kemuni, kei na kai tani, kei ira sa sega ni vakatamani, kei na yada, sa tiko e nomuni lomanibai, me ra lako ga mai, ka kana ka mamau: me vakalougatataki kemuni kina ko Jiova na nomuni Kalou e na cakacaka kecega ko ni sa kitaka.