Vakarua 12 - Vakavakadewa Makawa

Me vakacacani sara na ka kecega ni soro vakatani, 1-3. A vunau e na yasana sa na digitaka ko Jiova me ra soro kina na tamata, 4-28. Me ra qarauni ira me ra kakua ni muri ira na veimatanitu sa sega ni lotu, 29-32.

¹ Oqo nai lesilesi kei na lewa, mo ni vakabauta ka cakava e na vanua sa solia vei kemuni ko Jiova na Kalou ni nomuni qase, mo ni taukena, e na veisiga kecega kemuni sa bula kina e vuravura.

² Mo ni vakacacana sara na tikina kecega era a qarava kina na nodra kalou na veimatanitu kemuni na taukena, e dela ni veiulu-ni-vanua cecere, kei na dela ni veivanua cecere, kei na ruku ni kau drokadroka kecega:

³ ia kemuni na vakacacana talega na nodra i cabocabo-ni-soro, ka musulaka na nodra matakau, ka vakama na nodra kalouyalewa ni veikau e na bukawaqa; ia mo ni taya sobu na matakau ni nodra kalou sa ceuti, ka vakaotia na yacadra mai na yasana ko ya.

⁴ Ia mo ni kakua ni kitaka vakakina vei Jiova na nomuni Kalou:

⁵ Ia na tikina ga sa digitaka ko Jiova na nomuni Kalou mai na nomuni veimataqali kecega, me vakatikora kina na yacana, io, na nonai tikotiko mo ni dauqarava, ka dausoqoni kina:

⁶ ka mo ni kauta kina na nomuni soro kama, kei na nomuni manumanu sa na vakacabori, kei nai katini ni nomuni veika, kei nai soro mo ni lavelaveta, kei na veika kemuni a bubului kina, kei nai soro sa lomamuni ga mo ni vakacabora, kei na ulumatua ni nomuni pulumokau, kei na nomuni sipi:

⁷ ia kemuni na kana maikea e na mata i Jiova na nomuni Kalou, koi kemuni, kei ira na nomuni lewe-ni-vale, ka rekitaka na ka kecega sa cakava na ligamuni, ka sa vakalougatataki kemuni kina ko Jiova na nomuni Kalou.

⁸ Kemuni na sega ni cakava me vaka na ka kecega eda sa cakava eke e na siga oqo, ka ni sa cakava na tamata yadua na ka kece sa vinaka vua.

⁹ Ni kemuni sa sega ni yaco edaidai ki nai vakavakacegu kei nai votavota, sa solia vei kemuni ko Jiova na nomuni Kalou.

¹⁰ Ia ni kemuni sa yaco ki tai kadua ni Joritani, ka tiko e na vanua sa solia vei kemuni, mo ni taukena, ko Jiova na nomuni Kalou, ka sa vakacegui kemuni maivei ira kecega na nomuni meca sa vakavolivoliti kemuni, ka mo ni tiko vakacegu;

¹¹ ena qai dua na yasana sa digitaka ko Jiova na nomuni Kalou, me vakatikora tikoga kina na yacana; mo ni kauta mai kina na ka kecega ka'u sa vakarota vei kemuni; na nomuni soro kama, kei na nomuni manumanu sa vakacabori, kei nai katini ni nomuni veika, kei nai soro ni ligamuni e lavelaveti, kei na ka talei kecega kemuni sa bubului kina vei Jiova:

¹² ia kemuni na reki e na mata i Jiova na nomuni Kalou, koi kemuni, kei ira na luvemuni tagane, kei ira na luvemuni yalewa, kei ira na nomuni tamata, kei ira na nomuni vada; kei na Livai sa tiko e na nomuni lomanibai, ka ni sa sega na nona tikina se nonai votavota vata kei kemuni.

¹³ Mo ni qarauni kemuni mo ni kakua ni vakacabora na nomuni soro kama e na yasana kecega ko ni sa raica:

¹⁴ ia e na yasana ga sa digitaka ko Jiova e na dua na nomuni mataqali, mo ni vakacabora kina na nomuni soro kama, ka cakava maikina na ka kecega ka'u sa vakarota vei kemuni.

¹⁵ Ia sa tara ga mo ni vakamatea ka kania na lewe ni manumanu e na nomuni lomanibai kecega, a ka kecega sa garova na yalomuni, me vaka nai loloma i Jiova na nomuni Kalou, sa solia ko koya vei kemuni: me kania ga ko koya sa sega ni savasava kei koya sa savasava, me vaka sa daukani na teira lasa kei na teira kila.

¹⁶ Ia na dra ga mo ni kakua ni kania; ni livia ga ki na qele me vaka na wai.

¹⁷ E sega ni tara mo ni kania e na nomuni lomanibai nai katini ni nomuni sila, se na nomuni waini, se na nomuni waiwai, se na ulumatua ni nomuni pulumokau kei na nomuni sipi, se dua na ka ko ni sa bubului kina, se nai soro sa lomamuni ga mo ni vakacabora, se nai soro ni ligamuni e lavelaveti;

¹⁸ ia mo ni kania ga e na mata i Jiova na nomuni Kalou e na yasana sa digitaka ko Jiova na nomuni Kalou, koi kemuni, kei na luvemuni tagane, kei na luvemuni yalewa, kei na nomuni tamata, kei na nomuni vada, kei na Livai ka tiko e na nomuni lomanibai: ia ko ni na reki e na mata i Jiova na nomuni Kalou e na ka kecega sa cakava na ligamuni.

¹⁹ Mo ni qarauni kemuni mo ni kakua ni biuta na Livai e na nomuni siga kecega e vuravura.

²⁰ Ni sa vakalevutaka na nomuni vanua ko Jiova na nomuni Kalou, me vaka ka yalataka vei kemuni, ka ko sa kaya, Au na kana lewe ni manumanu, ni sa kusikusima na yalomuni; e tara mo ni kana manumanu, me vaka na ka kecega sa kusikusima kina na yalomuni.

²¹ Kevaka sa yawa vei kemuni na yasana sa digitaka ko Jiova na nomuni Kalou, me vakatikora kina na yacana, sa qai tara mo ni vakamatea eso na nomuni pulumokau kei na nomuni sipi, sa solia vei kemuni ko Jiova na nomuni Kalou, me vaka ka'u sa vakarota vei kemuni, ia ko ni na kania e na nomuni lomanibai na ka kecega sa kusikusima kina na yalomuni.

²² Ia mo ni kania me vaka sa daukani na teira lasa kei na teira kila: ena kania ko koya sa sega ni savasava, kei koya talega sa savasava.

²³ Ia mo ni raica vinaka mo ni kakua ni kania na dra: ni sa kena bula na dra; a sa tabu mo ni kania vata na kena bula kei na lewena.

²⁴ Mo ni kakua ni kania; mo ni livia ki na qele me vaka na wai.

²⁵ Mo ni kakua ni kania: me yacovi kemuni kina na ka vinaka, kei ira na luvemuni era sa muri kemuni, ni ko sa caka dodonu e na mata i Jiova.

²⁶ Ia na nomuni veika ga e tabu, kei na veika kemuni sa bubului kina, mo ni kauta, ka lako ki na yasana sa na digitaka ko Jiova:

²⁷ ia mo ni vakacabora na nomuni soro kama, na lewena kei na dra, e dela ni cabocabo-ni-soro i Jiova na nomuni Kalou: ena livi yani talega na dra ni nomuni soro e dela ni cabocabo-ni-soro i Jiova na nomuni Kalou, ia na lewena mo ni kania.

²⁸ Mo ni nanuma ka vakarogoca na vosa kecega oqo ka'u sa vakarota vei kemuni, me yacovi kemuni kina na ka vinaka, kei ira na luvemuni era na taravi kemuni, ka sega ni mudu, ni kemuni sa caka dodonu ka vinaka vei Jiova na nomuni Kalou.

²⁹ Ni na muduka tani e matamuni ko Jiova na nomuni Kalou na veimatanitu ko ni sa lako kina mo ni taukena, ka ko ni sa kedrai sosomi, ka tiko e nodra vanua;

³⁰ mo ni qarauni kemuni mo ni kakua ni tao kina mo ni muri ira, ni ra sa vakarusai oti e matamuni; ia mo ni kakua talega ni vakatarotaroga na nodra kalou, ka kaya, Era a qarava vakaevei na nodra kalou na veimatanitu oqo? au na kitaka vakakina ko au.

³¹ Mo ni kakua ni cakacaka vakakina vei Jiova na nomuni Kalou: ni ra sa kitaka ki na nodra kalou na ka kecega sa vakasisilataka ko Jiova, ka sa cata ko koya; ia na luvedra tagane kei na luvedra yalewa era sa vakama e na bukawaqa ki na nodra kalou.

³² A ka kecega ka'u sa vakarota vei kemuni, mo ni vakabauta ka cakava: mo ni kakua ni kuria, se vakalailaitaka.