Vakarua 10 - Vakavakadewa Makawa

Sa vola tale na vatu ko Jiova, 1-5. A mate i Eroni, 6,7. Sa tawase ko ira na luve i Livai, 8,9. Sa rogoci Mosese ko Jiova ni sa masulaki ira na Isireli, 10,11. Sa vakadreti ira ko Mosese me ra talairawarawa, 12-22.

¹ Ena gauna ko ya sa kaya vei au ko Jiova, Mo taya e rua na vatu raraba, me vaka na kena eliu, ka cabe mai vei au ki na ulu-ni-vanua, ka cakava talega e dua na kato kau:

² ia ka'u na vola e na vatu raraba na vosa sa volai e na vatu raraba eliu, o koya ko a vorolaka, ia mo qai virinoca ki loma ni kato me no kina.

³ Ia ka'u a cakava e dua na kato e na kau sitimi, ka taya e rua na vatu raraba sa vaka na kena eliu, ka'u sa cabeta na ulu-ni-vanua, ka taura tiko na vatu raraba ruarua e na ligaqu.

⁴ A sa vola ko koya ki na vatu raraba, me tautauvata kei nai vola sa volai eliu, na vunau e tini, ka cavuta vei kemuni ko Jiova mai na ulu-ni-vanua mai loma ni bukawaqa e na siga ni soqoni levu: a sa solia mai vei au ko Jiova.

⁵ Au a qai gole ka siro sobu mai na ulu-ni-vanua, ka tugana na vatu raraba ki loma ni kato ka'u a cakava; a rau sa no kina, me vaka ka vakarota vei au ko Jiova.

⁶ A ra sa lako tani ko ira na Isireli, mai Pieroci era sa taukena na luve i Jeekani, me la'ki Mosera: ka sa ciba kina ko Eroni, a sa bulu maikea; a sa vakaisosomitaki koya ko Eliesa na luvena e na cakacaka vakabete.

⁷ Era sa lako tani maikea ki Kutikota; ka ra lako tani mai Kutikota ki Jotipaci, a vanua sa levu kina na uciwai.

⁸ E na gauna ko ya sa wasea tani na mataqali i Livai ko Jiova, me ra colata na kato ni veiyalayalati i Jiova, me ra tu talega e na mata i Jiova ka me ra qaravi koya, ka me ra ia na vosa ni veivakalougatataki e na yacana, ka yacova na siga oqo.

⁹ O koya sa sega kina na nodra tikina se ra vakaivotavota kei ira na wekadra ko ira na Livai: o Jiova ga sa nodra i votavota, me vaka sa kaya vei ira ko Jiova na nomuni Kalou.

¹⁰ Ia ka'u a tiko e na ulu-ni-vanua, me vaka eliu, me siga vasagavulu ka bogi vasagavulu; a sa vakarogoci au ko Jiova e na gauna talega ko ya; ka me sa sega ni via vakarusai kemuni ko Jiova.

¹¹ A sa kaya vei au ko Jiova, Mo cavu tu, ka lako mo liutaki ira na tamata, me ra lako kina ka taukena na vanua ka'u a bubului kina kivei ira na nodra qase me'u solia vei ira.

¹² Ia oqo, kemuni na Isireli, a cava na ka sa taroga vei kemuni ko Jiova na nomuni Kalou, mo ni rerevaki Jiova ga na nomuni Kalou, ka mo ni lako e na nona sala kecega ka lomani koya, ka qaravi Jiova na nomuni Kalou, e na lomamuni taucoko kei na yalomuni taucoko,

¹³ mo ni vakabauta nai vakaro i Jiova, kei na ka sa lesia ko koya, ka'u sa vakarota vei kemuni e na siga oqo, me yaco vei kemuni na ka vinaka?

¹⁴ Raica, sa nei Jiova na nomuni Kalou na lomalagi, kei na lomalagi e cake sara, na vuravura, kei na ka kecega sa tu kina:

¹⁵ ia sa marautaki ira ga na nomuni qase ko Jiova ka me lomani ira, ka sa digitaki kemuni na nodra kawa, io koi kemuni, mai vei ira na matanitu kecega, me vaka e na siga oqo.

¹⁶ Ia mo ni ciliva na vuso ni yalomuni, ka mo ni kakua ni vakadomoqataki kemuni tiko.

¹⁷ Ni sa Kalou duaduaga vei ira na kalou ko Jiova na nomuni Kalou, ka sa Turaga vei ira kece na turaga, a Kalou levu, ka kaukauwa, ka rerevaki, ko koya sa sega ni digitaka vakailoa na tamata, se taura nai tautauri:

¹⁸ sa dauia na lewa e na vukudra era sega ni vakatamani kei na yada, ka sa lomana na vulagi, ka me dausolia vua na kakana kei nai sulu.

¹⁹ Ia mo ni lomani ira na vulagi: ni kemuni a vulagi mai na vanua ko Ijipita.

²⁰ Mo rerevaki Jiova na nomuni Kalou; mo ni qaravi koya, ka kabiti koya, ka bubului e na yacana.

²¹ O koya ga sa kemuni ukuuku, ka sa nomuni Kalou ko koya, sa cakava vei kemuni na ka levu ka rerevaki oqo, sa kunea na matamuni.

²² Era a lako sobu ki Ijipita na nomuni qase, a ra sa lewe vitusagavulu ga na tamata; ia oqo, sa qisi kemuni ko Jiova na nomuni Kalou mo ni lewe levu me vaka na veikalokalo mai lomalagi.