Taniela 9 - Vakavakadewa Makawa

Ko Taniela, ni sa vakananuma nai loku ni kenai otioti ni nodra veivakabobulataki, 1,2, sa vakatusa na nodra i valavala ca, ka sa masu me ra kau tale ki Jerusalemi, 3-19. Sa mai tukuna ko Keperieli na wiki e vitusagavulu, 20-27.

¹ E nai matai ni yabaki i Taraiase na luve i Easuerosi, na kawa ni kai Mitia, o koya ka buli me tui ni matanitu ni kai Kalitia;

² e nai matai ni yabaki ni nona lewa, koi au ko Taniela, ka'u a kila mai nai vola nai wiliwili ni yabaki, sa yaco kina na vosa vei Jeremaia na parofita, ni na vitusagavulu mada na yabaki na kena lala tu ko Jerusalemi.

³ Ia ka'u a vaqara na mataqu vua na Turaga na Kalou, me'u vakasaqarai koya e na masumasu, kei na kere loloma, e na lolo, kei nai sulu taga, kei na dravusa:

⁴ ia ka'u a masu vei Jiova na noqu Kalou, ka vakatusa vua, ka kaya, Kemuni na Turaga, na Kalou levu ka rerevaki, ka vakabauta tiko na veiyalayalati kei na loloma vei ira sa lomani koya, kei ira sa vakabauta na nona vunau;

⁵ keimami sai valavala ca, ka sa cala, ka sa caka ca, ka sa talaidredre, ni keimami sa vuki tani mai na nomuni vunau kei na nomuni lewa;

⁶ keimami sa sega talega ni vakarorogo vei ira na nomuni talatala na parofita, era vosa e na yacamuni vei ira na neimami tui, kei na neimami turaga, kei na neimami qase, kei ira kecega na lewe ni vanua.

⁷ Sa nomuni, Turaga, na cakacaka dodonu, a sa neimami na mata madua, me vaka e na siga oqo; io koi keimami na kai Juta kei na lewe i Jerusalemi, kei na Isireli kecega, ko ira sa voleka, kei ira sa yawa; e na veivanua kece ko ni sa dui vakasevi ira yani kina, e na vuku ni nodra talaidredre era sa talaidredre kina vei kemuni.

⁸ Kemuni na Turaga, sa dina ga me keimami mata madua, kei ira talega na neimami tui, kei na neimami turaga, kei na neimami qase, ni keimami sai valavala ca vei kemuni.

⁹ Sa nei koya na Turaga na neimami Kalou na yalololoma kei na dauvakabokoci ni valavala ca ia sa dina keimami sa talaidredre ga vua;

¹⁰ keimami a sega talega ni vakarorogo ki na domo i Jiova na neimami Kalou, me keimami muria na nona vunau, sa tauca vei keimami e na gusudra na nonai talatala na parofita.

¹¹ Ia ko ira kece na Isireli era sa talaidredre ga ki na nomuni vunau, ni ra sa gole tani, me ra kakua ni vakarorogo ki na nomuni vosa; o koya oqo sa sovaraki kina vei keimami na cudru kei na vosa ni bubului sa volai e na vunau i Mosese nai talatala ni Kalou, ni keimami sai valavala ca vua.

¹² A sa vakadinadinataka ko koya na nona vosa ni veicudruvi ka baleti keimami, kei ira na neimami turaga ni lewa era sa lewai keimami, ni sa vakayacora kina vei keimami na ca levu: ni sa sega ni caka e ruku i lomalagi taucoko me vaka na ka sa caka i Jerusalemi.

¹³ Me vaka na ka sa volai e na vunau i Mosese, sa yacovi keimami na ca kece oqo: ia keimami a sega ga ni ia na neimami masumasu e na mata i Jiova na neimami Kalou, ka me keimami lesu tani mai na neimami caka cala, ka kila sara na nomuni vunau dina.

¹⁴ O koya oqo sa vakananuma kina na ca ko Jiova, me vakayacora vei keimami: ni sa yalododonu ko Jiova na neimami Kalou e na nona cakacaka kecega sa cakava: ni keimami sa sega ni vakarorogo ki na nona vosa.

¹⁵ Ia koi kemuni, Jiova na neimami Kalou, ko ni a kauti keimami na nomuni tamata mai na vanua ko Ijipita e na ligamuni kaukauwa, ka sa rogo sara kina na yacamuni me vaka e na siga oqo; keimami sai valavala ca, keimami sa caka ca ga.

¹⁶ Kemuni na Turaga, me vaka na nomuni cakacaka dodonu kece, me suka tani mada ga na nomuni cudru kei na nomuni lesa mai na nomuni koro ko Jerusalemi, na nomuni ulu-ni-vanua tabu: ia na neimami valavala ca, kei na nodra caka ca na neimami qase, sa vuna na kena vakarogocataki ko Jerusalemi kei ira na nomuni tamata vei ira kece era tiko vakavolivoliti keimami.

¹⁷ Ia mo ni rogoca mada, na neimami Kalou, na masumasu ni nomuni tamata, kei na nona kere loloma, ia e na vuku ni Turaga, me cila mai na matamuni ki na nomuni tikotiko tabu sa lala tu.

¹⁸ Kemuni na noqu Kalou, mo ni vakalakala daligamuni, mo ni rogoca; me yadra na matamuni, mo ni raica na neimami vanua sa lala, kei na koro sa vakatokai e na yacamuni: ni keimami sa sega ni tauca na neimami masumasu e matamuni e na vuku ni neimami cakacaka dodonu, e na vuku ga ni nomuni yalololoma levu.

¹⁹ Kemuni na Turaga, mo ni rogoca; Kemuni na Turaga, mo ni vakabokoca na ca; Kemuni na Turaga, mo ni vakarorogo ka cakacaka; e na vukumuni ga, na noqu Kalou, mo ni kakua kina ni vakaberabera, ni sa vakatokai e na yacamuni ga na nomuni koro, kei ira na nomuni tamata.

²⁰ Ia ni'u a vosa tiko, a masu, ka vakatusa na noqu i valavala ca, kei na nodra i valavala ca na kai noqu na Isireli, ka ni'u sa tauca na noqu kere loloma e na mata i Jiova na noqu Kalou e na vuku ni ulu-ni-vanua tabu ni noqu Kalou:

²¹ io, ni'u a masu tiko, sa vuka sara mai na tamata ko Keperieli, o koya ka'u a raica e na raivotu e nai vakatekivu, ka sa tarai au e na tiki ni yakavi sa vakacabori kina nai soro.

²² A sa vakamacalataka mai, ka vosa vei au, ka kaya, I Taniela, au sa qai lako mai me'u vakavukui iko, ka mo kila ka mada.

²³ Ni sa tekivu na nomu kere loloma sa yaco mai na vosa, ia ka'u sa lako mai me'u tukuna vei iko; ni ko sa tamata daulomani: o koya oqo mo kila kina na vosa, ka vakasamataka na raivotu.

²⁴ Sa loku e vitusagavulu na wiki vei ira na kai nomu kei na nomu koro tabu, me qai tarovi na talaidredre, ka bokoci nai valavala ca, ka sorovaki na caka cala, ka vakayacori mai na cakacaka dodonu e sega ni mudu, ka me dregati na raivotu kei na parofisai, ka me lumuti ko Koya sa Yalosavasava sara.

²⁵ Ia mo kila ka vakasama, mai na gauna sa tukuni yani kina me vakavoui ka tara tale ko Jerusalemi ka yacova na Mesaia na Turaga, ena vitu na wiki: kei na wiki e onosagavulu ka rua, ena qai vakavoui ka caka tale na salatu, kei nai keli ni koro, io, e na gauna ni ca.

²⁶ Ia ni sa oti e onosagavulu ka rua na wiki, ena qai muduki na Mesaia, ka segai e na vukuna: ia ko ira na nona tamata na turaga ena lako mai era na vakarusa na koro kei na tikina tabu; ia na kenai otioti ena yaco vata kei na dobui, ena yacova talega nai otioti ni valu na dauveivakarusai sa lesi.

²⁷ Ia ena vakadeitaka ko koya na veiyalayalati kei ira e lewe vuqa ka me dua na kena wiki: ia e na veimama ni wiki, ena vakaotia ko koya nai soro kei nai madrali, ia e na taba ni tikina tabu ena tu kina na ka vakasisila sa dauveivakarusai, io, me yacova nai vakataotioti, ia na ka sa lesi ena sovaraki vua na dauveivakarusai.