Taniela 2 - Vakavakadewa Makawa

Sa tadra ko Nepukanesa, 1. Ni sa guilecava na nona tadra era sa tarogi kina na tamata vuku, ka ra sa dredreta, 2-11. Era sa lewai me mate, kei iratou talega ko Taniela kei na nonai tokani, 12,13. Sa daro e na vakamamasu i Taniela, a sa kune na tadra ni ratou sa masu vua na Kalou, ka sa vakavinavinaka kina vua ko Taniela, 14-23. Sa tarova ko Taniela na nodra vakamatei na tamata vuku, a sa kau yani vua na tui, 24-26. Sa tukuna na tadra, 27-36, kei na kenai balebale, 37-45. Sa vakalevulevui kina ko Taniela, 46-49.

¹ Ia e nai karua ni yabaki ni lewa i Nepukanesa sa tadrataka e dua na tadra ko Nepukanesa, a sa kidroa kina na yalona, ia sa sega ni moce rawa.

² Sa qai kaya na tui me ra kacivi mai na daucaka mana, kei ira era dauvakarai mata ni lomalagi, kei ira era daucakai sausau, kei na kai Kalitia, me ra vakatakila vua na tui na nona tadra. Ka ra sa qai mai tu e na mata ni tui.

³ Sa qai kaya vei ira ko koya na tui, Au a tadrataka e dua na tadra, a sa kidroa kina na yaloqu me'u kila mada na tadra.

⁴ Era sa qai kaya vua na tui ko ira na kai Kalitia e na vosa vaka-Siria, Mo ni bula, na tui, ka sega ni mudu: mo ni tukuna mai na tadra kivei keitou na nomuni tamata, keitou na qai vakatakila na kenai balebale.

⁵ Sa qai kaya na tui vei ira na kai Kalitia, Na ka oqori sa takali vei au: ia kevaka dou na sega ni vakatakila vei au na tadra, kei na kenai balebale, dou na tavai bulabula vakalalai ia na nomudou veivale ena caka mei benubenu.

⁶ Ia kevaka dou na vakatakila na tadra, kei na kenai balebale, dou na rawata maivei au eso nai solisoli, kei nai yau, ka dou na dokai vakalevu: o koya oqo, dou vakatakila kina vei au na tadra, kei na kenai balebale.

⁷ Era sa baci vosa tale, ka kaya, Mo ni tukuna mai na tadra vei keitou na nomuni tamata, koi kemuni na tui, ia keitou na vakatakila na kenai balebale.

⁸ Sa qai kaya na tui, E dina, au sa kila ni dou sa via vakaberabera ga, ni dou sa raica sa takali vei au na ka oqori.

⁹ Ia kevaka dou sa sega ni vakatakila vei au na tadra, sa dua bauga na kena lewa vei kemudou: ni dou sa vakarautaka na vosa lasu ka ca mo dou tukuna vei au, me dua tani mada kina na gauna: o koya oqo, mo dou tukuna kina vei au na tadra, ka'u na qai kila ni dou sa vakatakila rawa vei au na kenai balebale.

¹⁰ Era sa kaya tale vei koya na tui ko ira na kai Kalitia, Sa sega na tamata e vuravura taucoko me na vakatakila rawa na ka oqo vei kemuni na tui: ka sa sega e dua na tui, se na turaga, se dua e lewa, me na taroga na ka vakaoqo vua e dua na daucaka mana, se na dauvakarai mata ni lomalagi, se na kai Kalitia.

¹¹ Ia na ka ko ni sa taroga na tui sa dredre, a sa sega e dua e vakatakila rawa vei kemuni na tui, o ira ga na kalou, era sega ni tiko vata kei na tamata.

¹² E na vuku ni ka oqo sa cudru kina na tui ka ninini vakalevu, ka vakarota me ra vakamatei ko ira kece na tamata vuku e Papiloni.

¹³ A sa tukuni yani na lewa me ra vakamatei na tamata vuku; ka ra la'ki qarai Taniela kei iratou na nonai tokani me ra vakamatei.

¹⁴ Ia ko Taniela sa qai vosa vakavuku vei Erioki na kapiteni ni valu ni tui, o koya sa lako yani me vakamatei ira na tamata vuku e Papiloni:

¹⁵ ka kaya vei Erioki na kapiteni ni valu ni tui, A cava sa vakariri kina na vosa mai vua na tui? Sa qai vakatakila ko Erioki na ka oqori vei Taniela.

¹⁶ Ia sa qai curu vua na tui ko Taniela, ka masuti koya me vakaberabera mada vakalailai, ena qai vakatakila vua na tui nai balebale ni tadra.

¹⁷ Sa qai lako ko Taniela ki na nona vale, ka tukuna na ka oqo vei Enanaia, kei Misaeli, kei Asaraia, na nonai tokani:

¹⁸ ka me ratou kere loloma talega vua na Kalou ni lomalagi e na vuku ni ka vuni oqo; me ratou kakua ni rusa vata ko Taniela kei ira na nonai tokani, kei ira kece na tamata vuku e Papiloni.

¹⁹ Sa qai vakaraitaki na ka vuni oqo vei Taniela e na raivotu e na bogi. Ka sa vakavinavinaka vua na Kalou ni lomalagi ko Taniela.

²⁰ Sa kaya ko Taniela, Me vakavinavinakataki tiko ka sega ni mudu na yaca ni Kalou: ni sa nona ga na vuku kei na kaukauwa:

²¹ ka sa vukica ko koya na yabaki kei na gauna: sa vakasivoi ira na tui, ka sa lesi ira na tui: sa solia na vuku vei ira na lomavuku, kei na kila ka vei ira na yalomatua:

²² sa vakaraitaka ko koya na ka titobu ka vuni tu: sa kila ko koya na ka sa tiko e na butobuto, ia na rarama sa tiko ga vua.

²³ Au sa vakavinavinaka vei kemuni na Kalou ni noqu qase, ka vakacaucautaki kemuni, ni kemuni sa solia vei au na vuku kei na kaukauwa, ka sa vakatakila vei au oqo na ka keitou a kerea vei kemuni: ni kemuni sa vakatakila vei keitou na ka sa bale vua na tui.

²⁴ Ia sa qai la'ki curu ko Taniela vei Erioki, o koya ka lesia na tui me vakamatei ira na tamata vuku e Papiloni, ka la'ki kaya vua; Mo kakua ni vakamatei ira na tamata vuku e Papiloni: mo kauti au mada vua na tui, ia ka'u na vakatakila vua na kenai balebale ni tadra.

²⁵ Ia sa qai kauti Taniela vakatotolo vua na tui ko Erioki, ka kaya vakaoqo vua, Au sa kunea e dua na tamata vei ira na bobula ni Juta: o koya sa vakatakila rawa vua na tui nai balebale ni tadra.

²⁶ Sa qai kaya na tui vei Taniela, na yacana talega ko Pelitisasari, Ko sa rawata li mo vakatakila vei au na tadra ka'u a raica, kei na kenai balebale?

²⁷ Sa kaya ko Taniela vei koya na tui, Na ka vuni ko ni sa taroga na tui, era sa sega ni vakatakila rawa vei kemuni ko ira na tamata vuku, se ko ira na dauvakarai mata ni lomalagi, se ko ira na daucaka mana, se ko ira na dauparofisai vakailasu;

²⁸ ia sa dua na Kalou mai lomalagi sa vakaraitaka na ka vuni, ka sa vakatakila rawa vei kemuni na tui ko Nepukanesa na ka ena yaco e na gauna maimuri. A nomuni tadra kei na raivotu ko ni a raica e na nomuni mocemoce, sa vakaoqo:

²⁹ A nanuma ni lomamuni kemuni na tui, e na nomuni mocemoce sa bale ki na ka ena yaco maimuri: ia ko koya sa vakaraitaka na ka vuni sa vakatakila vei kemuni na ka ena yaco mai.

³⁰ Ia sa sega ni vakaraitaki vei au na ka vuni oqo ni ka'u sa vuku cake vei ira kece na tamata bula, ia sa vu ga vua na Kalou me vakaraitaki vei kemuni na tui na kenai balebale ni tadra, ka mo ni kila rawa na tui na nanuma ni lomamuni.

³¹ Koi kemuni na tui, ko ni a vakararai, ka raica e dua na matakau levu. A matakau levu ko ya, ka uasivi cake na kena serau, sa wavu tu e matamuni; ia na kenai rairai sa ka rerevaki.

³² Na uluna na matakau ko ya sa koula dina, na serena kei na ligana sa siliva, a ketena kei na sagana sa parasa,

³³ a temo ni yavana sa aironi, ia sa so na tiki ni yavana e aironi, ka so na tikina e tete.

³⁴ Kemuni a vakaraica tiko, ka sa kavida mai e dua na vatu ka sega ni ta e na ligana e dua, a sa lauta na yava ni matakau sa aironi ka tete, ka vurumemeataka.

³⁵ Sa qai vorolaki vata na aironi, na tete, na parasa, na siliva, kei na koula, ka sa yaco me tautauvata kei na qa ni sila e na rara ni sila e na vula i matua; ka sa dui cagina tani yani, me sega ni kune tale: ia na vatu ka lauta na matakau, sa tubu me ulu-ni-vanua levu, ka roboti vuravura taucoko.

³⁶ Oqo na tadra; ia na kenai balebale keitou na tukuna vei kemuni na tui.

³⁷ Sai kemuni, na tui, na nodra tui na tui: ia ko koya na Kalou ni lomalagi sa solia vei kemuni na matanitu, kei na kaukauwa, kei na gumatua, kei na lagilagi.

³⁸ Ia na vanua kecega era tiko kina na luve ni tamata, na manumanu ni vanua, kei na manumanu vuka, sa solia ko koya ki na ligamuni, a sa lesi kemuni mo ni lewai ira kecega. Sai kemuni na ulu koula oqo.

³⁹ Ka sa na tubu mai me veitaravi kei kemuni, e dua tani tale na matanitu e lailai sobu vei kemuni, ka dua tani tale, na kenai katolu ni matanitu, o koya ka parasa, ka sa na lewai vuravura taucoko.

⁴⁰ Ia nai kava ni matanitu ena kaukauwa ga me vaka na aironi: ia na aironi sai koya sa vurumemeataka ka butuvoroka na ka kecega: ka me vaka sa vorolaka na ka kece oqo na aironi, sai koya ena vurumemeataka vakakina ka vorolaka.

⁴¹ Ia ko ni a raica na yavana kei nai qaqalo ni yavana, ni sa tete eso na tikina, ka aironi eso na tikina, sa macala kina ena veisei na matanitu ko ya; ia na kaukauwa ni aironi ena tu ga kina, ka ni kemuni sa raica na aironi ni sa buli vata kei na tete lolobo.

⁴² Ia me vaka sa aironi e dua na tiki ni qaqalo ni yavana, ka tete e dua na tikina, sa na vakakina na matanitu ko ya, e dua na tikina ena kaukauwa, ka dua na tikina ena vuru rawarawa.

⁴³ Ia ni kemuni sa raica na aironi ni sa buli vata kei na tete lolobo, era na dua vata vakakina kei na kawa ni tamata wale: ia era na sega ga ni veikabiti, me vaka na aironi ni sa sega ni veikabiti rawa kei na tete.

⁴⁴ Ia e na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.

⁴⁵ Ia ni kemuni a raica na vatu ni sa kavida mai na ulu-ni-vanua ka sega ni ta e na ligana e dua, ka sa vurumemeataka na aironi, na parasa, na tete, na siliva, kei na koula: sa vakatakila kina vua na tui ko koya na Kalou levu na ka ena yaco maimuri: ni sa ka dina na tadra, ka macala na kenai balebale.

⁴⁶ Sa qai cuva vakatoboicu ko Nepukanesa na tui, ka vakarokoroko vei Taniela, ka sa vakarota ko koya me ra vakacabora vua nai madrali kei na ka boi vinaka.

⁴⁷ A sa kaya vei Taniela na tui, Sa dina ga sa uasivi na nomu Kalou vei ira kece na kalou, ka sa nodra Turaga na tui, ko koya talega ka vakaraitaka na ka vuni, ni ko sa vakaraitaka rawa na ka vuni oqo.

⁴⁸ Ia sa qai vakalevulevui Taniela ko koya na tui, ka solia vua e vuqa na ka ni loloma levu, a sa lesi koya me lewa na yasana taucoko vaka-Papiloni, ka me liu talega vei ira na turaga ni tamata vuku kecega e Papiloni.

⁴⁹ Sa qai kerekere vua na tui ko Taniela, ka sa lesi ko Setareki, kei Mesaki, kei Apeti-niko, me ratou vakaitavi e na cakacaka vakamatanitu e na yasana vaka-Papiloni: ia ko Taniela sa tiko ga e na matamata-ni-koro ni tui.