Taniela 1 - Vakavakadewa Makawa

Sa vakabobulataki ko Jioiakimi, 1,2. Ko Esipinasi, sa kauti iratou ko Taniela, kei Enanaia, kei Misaeli, kei Asaraia, 3-7. Ni ratou sa bese ni kania na kakana sa votai vei ira mai na kena na tui Papiloni, sa qai yaga vei iratou na kakana ni were, kei na wai ni gunu, 8-16. Eratou sa uasivi cake e na vuku, 17-21.

¹ E nai katolu ni yabaki ni lewa i Jioiakimi na tui Juta sa lako mai ko Nepukanesa na tui Papiloni ki Jerusalemi, ka sa buku na kena druadrua.

² Ia na Turaga sa soli Jioiakimi na tui Juta ki na ligana, ka so nai yaya ni vale ni Kalou: ka sa kauta ko koya ki na vanua ko Saina ki na nona bure kalou; ka sa kauta nai yaya ki na vale ni yau ni nona kalou.

³ A sa kaya na tui vei Asipinasi na turaga ni nona matanivanua, me kauti ira eso na Isireli, ka so era kawa ni tui, ka so era tamata turaga;

⁴ na cauravou sa sega e dua na tikidra e ca, sa matavinaka, ka yalomatua e na vuku kecega, ka daukila ka, ka lomamacala e na vuli ka, ka tamata e kilikili me mai tu e na vale ni tui, ka me ra vakavulici e nai vola kei na vosa ni kai Kalitia.

⁵ A sa lewa na tui me dua na kedrai votavota e na veisiga mai na nona kakana ka dua na medra waini mai na waini sa gunu kina ko koya: ka me vakani ira tiko ka yabaki tolu, ka oti me ra qai mai tu e na mata ni tui.

⁶ Ka sa so vei iratou maivei ira na Juta, ko Taniela, kei Enanaia, kei Misaeli, kei Asaraia;

⁷ a sa vakayacani iratou na turaga ni matanivanua: sa vakayacani Taniela ko Pelitisasari; kei Enanaia, ko Setareki; kei Misaeli, ko Mesaki; kei Asaraia, ko Apeti-niko.

⁸ A sa lewa oti e lomana ko Taniela me kakua ni vakadukadukalitaki koya e nai votavota ni kakana ni tui, se na waini sa gunuva: a sa kerekere ko koya vua na turaga ni mata ni vanua me kakua ni vakadukadukalitaki koya kina.

⁹ Ia na Kalou sa vagolea na yalona na turaga ni matanivanua me vinakati Taniela ka me lomani koya sara.

¹⁰ A sa kaya vei Taniela na turaga ni matanivanua, Au sa rerevaka na noqu turaga na tui, o koya sa lewa na kemudou kei na memudou: de raica ko koya na matamudou ni sa ca ka vinaka na matadra na cauravou dou sai taba vata; ia dou sa vu ni noqu cala vua na tui ka'u sa mate kina.

¹¹ Sa qai kaya ko Taniela vei Melisa, o koya ka lesia na turaga ni matanivanua me vakaraici Taniela, kei Enanaia, kei Misaeli, kei Asaraia,

¹² Mo vakatovolei keitou mada na nomu tamata, ka bogi tini; ia me soli ga vei keitou na kakana e tubu e na were me keitou kania, kei na wai ni gunu me keitou gunuva.

¹³ Mo qai raica na mata i keitou, kei na matadra na cauravou era kania nai votavota mai na kakana ni tui: ka me vaka na ka ko sa raica, mo qai lewa vakakina kivei keitou na nomu tamata.

¹⁴ A sa vakarorogo vei iratou ko koya e na ka oqo, ka vakatovolei iratou ka bogi tini.

¹⁵ Ia ka oti na bogi tini, sa rairai na matadratou me vinaka ka vakalewe, ka ca na matadra na cauravou kecega era kania nai votavota mai na kakana ni tui.

¹⁶ A sa kauta tani ko Melisa na kedratou i votavota ni kakana, kei na medratou waini; ka sa solia vei iratou na kakana ni were.

¹⁷ Ia sa solia na Kalou vei iratou na cauravou vava oqo na lomavuku kei na kila ka: ka sa vuku ko Taniela ka sa rawata me tukuna nai balebale ni raivotu kecega kei na tadra.

¹⁸ Ia ni sa oti na gauna sa vosa kina na tui me ra kau kina vua, sa qai kauti ira yani na turaga ni matanivanua kivei Nepukanesa.

¹⁹ Ka sa veivosaki kei iratou ko koya na tui; ia sa sega na tamata e kune vei ira kecega me tautauvata kei Taniela, kei Enanaia, kei Misaeli, kei Asaraia: o koya oqo eratou sa mai tu kina e na mata ni tui.

²⁰ Ia e na kila vuku kecega kei na kila ka sa tarogi iratou kina na tui, sa kunei iratou ni ratou vuku vakatini cake vei ira kecega na daucaka mana, kei na dauvakarai mata ni lomalagi, era tiko e na nona matanitu taucoko.

²¹ A sa tiko ga ko Taniela ka yacova nai matai ni yabaki i Sairusi na tui.