Sefanaia 3 - Vakavakadewa Makawa

Sa ra vunauci na kai Jerusalemi e na vuku ni nodra i valavala ca, 1-7. Sa vakaroti ko ira na yalododonu me ra waraka na lewa ni Kalou, 8-13, ka rekitaka ni sa vakayacori, 14-20.

¹ Ena ca ko koya sa yalobese ka yalodukadukali, na koro ni valavala vakaukauwa!

² Sa sega ni vakarorogo ki na domona, sa bese ni vakavulici; sa sega ni vakararavi vei Jiova; sa sega ni toro vua na nona Kalou.

³ Era sa laioni dautagi ko ira na nona turaga; ko ira na nona turaga ni lewa era sa wolifa ni yakavi; ni ra quru sui, era sega ni sigavaka.

⁴ O ira na nona parofita era sa yalodauveidokadokai, era sa tamata dauveivakaisini: ko ira na nona bete era sa vakacataka na ka e tabu, era sa kauta vakatani na vunau.

⁵ Sa tiko kina ko Jiova na yalododonu; sa sega ni cakava na ka e sega ni dodonu ko koya; e na mataka kecega sa vakarairaitaka na nona lewa dodonu, sa sega ni wele mai ko koya; ia sa sega ni kila na madua ko koya sa sega ni dodonu.

⁶ Au sa muduka laivi na veimatanitu: sa vakacacani na nodra veivale ni valu; au a vakalalataka na sala ni nodra koro, me sega e dua e lakova: sa rusa na nodra veikoro, sa sega ga na lewena, sa sega e tiko kina.

⁷ Au a kaya, Ko na rerevaki au ga, ko na vakavulici; me kakua kina ni muduki tani na nodra i tikotiko, me vaka na ka kece ka'u a lesia me yaco vua: e na mataka ga era souta, era sa cakava kecega na nodra cakacaka me ca.

⁸ Ia mo dou waraki au ga, sa kaya ko Jiova, me yaco mada na siga ka'u na tu cake kina me ia na veitokitaki: ni sa noqu lewa me'u vakasoqoni ira na lewe ni veivanua, me'u soqoni ira vata na lewe ni veimatanitu, me'u sovaraka vei ira na noqu cudru, me oti kece na noqu cudru katakata: ni na vakayavuni ko vuravura taucoko e na bukawaqa ni noqu vuvu.

⁹ Ni'u na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.

¹⁰ Mai na tai kadua ni veiuciwai ni Iciopea, o ira era masuti au, era na kauta mai na noqu i madrali, io ko koya na goneyalewa ni noqu mataqali sa vakasevi.

¹¹ E na siga ko ya ko na sega ni madua e na vuku ni nomu i valavala kecega, ko a talaidredre kina vei au: ni'u na qai kauti ira tani maivei iko na kai nomu era yalodaumarau vakaqaciqacia; ia ko na sega ni viavialevu tale e na noqu ulu-ni-vanua tabu.

¹² Au na vakavoca ga vei iko e dua na mataqali yalomalumalumu ka dravudravua, ka ra na vakararavi e na yaca i Jiova.

¹³ A kedra vo na Isireli era na sega ni cakava nai valavala e sega ni dodonu, se vosataka na ka lasu; ena sega talega ni kune e na gusudra na yame dauveivakaisini; ni ra na kana ka koto sobu, ka na sega e dua me vakarerei ira.

¹⁴ Mo sere mada, na goneyalewa ni Saioni; dou kaikaila, na Isireli; mo reki ka marau e na vu ni yalomu, ko iko na goneyalewa ni Jerusalemi.

¹⁵ Sa kauta tani ko Jiova na nomu veicudruvi, sa biuti ira tani na nomu meca: ko koya na tui Isireli, io ko Jiova, sa tiko e na kemudou maliwa: ko na sega tale ni kunea na ka rarawa.

¹⁶ E na siga ko ya ena kainaki ki Jerusalemi, Mo kakua ni rere; ki Saioni talega, Me kakua ni wadamele na ligamu.

¹⁷ Ko Jiova na nomu Kalou ka tiko kei iko sa kaukauwa ko koya, ena ia na veivakabulai; ena rekitaki iko ko koya e na marau, ena vakacegu e na nona loloma; ena marautaki iko e na sere.

¹⁸ Au na vakasoqoni ira mai ko ira na kai nomu era tagi e na vuku ni soqoni tabu, ko ira sa bitaki e na veivakalialiai e na vuku i Saioni.

¹⁹ Raica, au na cakacaka vei ira kecega e na gauna ko ya era vakararawataki iko; ia ka'u na vakabulai koya sa lokiloki, o ira talega sa vakasevi ka'u na soqoni ira mai; ia ka'u na cakava me ra vakacaucautaki ka rogo e na veivanua kece era a vakamaduataki kina.

²⁰ E na gauna ko ya au na kauti kemudou mai, io, e na gauna ko ya au na vakasoqoni kemudou kina; ni'u na cakava mo dou rogo ka vakacaucautaki vei ira na veimataqali kecega e vuravura, ni'u na vakalesui kemudou mai na nomudou veivakabobulataki, sa kaya ko Jiova.