Sefanaia 1 - Vakavakadewa Makawa

Ena cudruvi sara ko ira na Juta ni sa ka levu na nodra i valavala ca, 1-18.

¹ A vosa i Jiova ka yaco vei Sefanaia na tagane na luve i Kusi, na luve i Kitalaia ka tagane, na luve i Amaraia ka tagane, na luve i Esekaia ka tagane, e na gauna i Josaia na luve i Emoni, na tui Juta.

² Au na vakarusa laivi sara na ka kecega mai na dela ni vanua, sa kaya ko Jiova.

³ Au na vakarusa na tamata kei na manumanu; au na vakarusa na manumanu vuka, kei na ika ni waitui, kei na veika era tarabe kina, kei ira talega na tamata ca; ia ka'u na muduka tani na tamata mai na vanua, sa kaya ko Jiova.

⁴ Au na dodoka talega na ligaqu me'u tabaki ira na Juta, kei ira kecega na kai Jerusalemi; ia ka'u na muduka tani mai na yasana oqo na tamata sa vo vei Peali, kei na yacadra na Kimerimi, ko ira vata kei na bete;

⁵ kei ira era sa soro e na dela ni veivale ki na kalokalo ni lomalagi; kei ira era sa soro ka bubului vei Jiova, ka bubului vei Malikami;

⁶ kei ira era sa vuki tani vei Jiova; ka ra sa sega ni vakasaqarai Jiova, se tarogi koya.

⁷ Mo tiko lo e na mata ni Turaga ko Jiova: ni sa voleka mai na siga i Jiova: ni sa vakarautaka ko Jiova e dua me vakamatei, ka sa lesi ira sa sureta ko koya.

⁸ Ia ena yaco e na siga ni veivakamatei i Jiova, au na cudruvi ira na turaga kei ira na gone vakaturaga, kei ira kecega era vakaisulu e nai sulu ni kai tani.

⁹ E na siga talega ko ya au na cudruvi ira kece era ladeva nai lago ni katuba, ka vakasinaita na veivale ni nodra turaga e nai yau ni veivakayanaki kei na veivakaisini.

¹⁰ Ia ena yaco e na siga ko ya, sa kaya ko Jiova, ena rorogo na domo ni tagi mai na matamata-ni-koro ni ika, kei na qoqolou mai na kenai karua ni yasa ni koro, kei na veivakacacataki levu mai na veiulu-ni-koro.

¹¹ Dou qoqolou, na lewe i Makitesa, ni ra sa vakarusai kece na mataqali dauveivoli; sa ra muduki kece tani na daucola siliva.

¹² Ia ena yaco e na gauna ko ya, ka'u na kauta eso na cina ka qara voli e Jerusalemi, ka cudruvi ira na tamata era vaka na waini sa cevata tu e na kena soko, era kaya e lomadra, Ena sega ni cakava na ka vinaka ko Jiova, ena sega talega ni cakava na ka ca.

¹³ Ia na nodra i yau ena tauri mei toki ni valu, kei na nodra veivale sa na rusa: ka ra na tara vale, ka ra na sega ni tiko kina; ka ra na tea na veiwere-ni-vaini, ka ra na sega ni gunuva na kena waini.

¹⁴ Sa voleka mai na siga i Jiova na siga ka uasivi, sa voleka mai, io sa kusa sara mai; a domo ni siga i Jiova, sa ka rarawa na nona tagi kina na tamata qaqa.

¹⁵ A siga ni cudru na siga ko ya, na siga ni ca kei na rarawa, a siga ni veivakacacani kei na veivakarusai, a siga butobuto ka loaloa, a siga ni o kei na butobuto levu,

¹⁶ a siga ni davui kei na kaila ni valu, ki na veikoro vakabai, kei na veivale ni valu e cecere.

¹⁷ Ia ka'u na vakararawataki ira na tamata, a ra na lako voli me vakataki ira na mataboko, ni ra sai valavala ca vei Jiova: ia na kedra dra ena sovaraki me vaka na kuvu-ni-soso, kei na lewedra me vaka na de-ni-manumanu.

¹⁸ Io, na nodra siliva kei na nodra koula ena sega ni vakabulai ira rawa e na siga ni cudru i Jiova; ia ena kania na vanua taucoko na bukawaqa ni nona vuvu: ni na vakidacala sara na nona vakaoti ira laivi na lewe ni vanua.