Sakaraia 9 - Vakavakadewa Makawa

Ena vakarurugi ira na nona tamata na Kalou, 1-8. Ko Saioni, sa vakavulici me rekitaka na nona lako mai na Mesaia, kei na nona lewa loloma, 9-11. Ena gumatua ka tiko vinaka ko ira na nona tamata dina, 12-17.

¹ Na vosa ni parofisai bibi maivei Jiova me tau ki na vanua ko Ateraka, ia ko Tamasiko ena tau kina: ni na sa rai vei Jiova na mata ni tamata, kei na matadra na veimataqali i Isireli kecega.

² Ia ko Emaci talega, sa voleka kina; ko Taia, ni sa qaseqase sara, kei Saitoni.

³ A sa tara ko Taia na koro ni valu me nona, ka sa binia vata na siliva me vaka na kuvu-ni-soso, kei na koula dina me vaka na oruoru e na saqata.

⁴ Raica, ena biuti koya tani na Turaga, ka yavita mai waitui na nona kaukauwa; io, ena vakamai ko koya e na bukawaqa,

⁵ Ena raica ko Asikiloni, ka na rere: ko Kesa talega, ka na rarawa sara kina; ko Ekironi talega, ni na vakamaduataki e na ka sa vakararavi kina; ni na rusa na tui mai Kesa, ia ko Asikiloni, ena sega ni tawa;

⁶ ena tiko talega e dua na kai tani mai Asitoti, au na muduka talega na nodra viavialevu na kai Filisitia.

⁷ Ia ka'u na kauta tani na kena dra mai na gusuna, kei na kena ka vakasisila sa covuta tiko: ia ko koya talega sa vo tiko, ena nona na noda Kalou, ka na vaka e dua na turaga e Juta, ko Ekironi talega, me vaka e dua na Jepusaiti.

⁸ Ia ka'u na tiko vakavolivolita na noqu vale e na vuku ni valu, e na vuku i koya sa lako voli tu, kei koya talega ka lesu tiko mai: ia ena sega ni lako voli tale vei ira e dua na dauveivakasaurarataki: ni'u sa qai raica e na mataqu.

⁹ Mo reki vakalevu, na goneyalewa ni Saioni; mo kaikaila, na goneyalewa ni Jerusalemi: raica, ena lako mai vei iko na nomu Tui, sa yalododonu, a sa ia na veivakabulai ko koya, sa yalomalua, ka sa vodo lako e na asa, io, e na luve ni asa.

¹⁰ Ia ka'u na muduka tani na qiqi-ni-valu mai Ifireimi, kei na ose mai Jerusalemi; ena muduki tani talega na dakai ni valu; ena tukuna ko koya na veivinakati ki na lewe ni veivanua; ia ena lewa ko koya mai na wasawasa e dua ki na wasawasa e dua, mai na Uciwai talega ka yaco ki nai yalayala kei vuravura.

¹¹ Ia ko iko, e na vuku ni dra ni nomu veiyalayalati ka'u sa sereki ira kina na kai nomu era vesuki, mai nai keli sa sega kina na wai.

¹² Dou lesu mai ki na koro vakabai, oi kemudou sa vesuki ka nuinui tiko: io, e na siga oqo ka'u sa tukuna ni ka'u na solia vei iko e rua nai votavota;

¹³ ni'u sa qai yavi Juta me noqu dakai, ka vakataqari Ifireimi me kena gasau ka vakauqeti ira na luvemu, ko iko Saioni, me veivala kei ira na luvemu, ko iko Kirisi, ka sa cakavi iko mo vaka nai seleiwau ni qaqa.

¹⁴ Ia ko Jiova ena kilai ni sa nodra i to, ena lako talega yani na nona gasau me vaka na liva; ia na Turaga ko Jiova ena uvuca na davui, ka na lako vata kei na covulaca ni mata ni ceva.

¹⁵ Ena vakarurugi ira ko Jiova ni lewe vuqa, a ra na kana voli, ka butuka sobu na vatu e rabotaki; ka ra na gunu, ka kaila, me vaka ni ra gunu waini; ka ra na vakamamautaki me vaka na bilo e tawa, ka vaka na tutu ni cabocabo-ni-soro.

¹⁶ Ia ena vakabulai ira ko Jiova na nodra Kalou e na siga ko ya me vaka na qele ni sipi, io, na nona tamata: ni ra na vaka na vatu talei e nai sala vakaturaga sa laveti ki cake e na nona vanua.

¹⁷ Ia na kena levu ni nona loloma! kei na kena levu ni nona vinaka! era na bula na cauravou e na sila, kei ira na goneyalewa, e na waini vou.