Sakaraia 8 - Vakavakadewa Makawa

Ena lomani tale ko Jerusalemi, 1-6. O ira na bobula era na kau tale mai, 7-17. Sa tukuni nai valavala ni siga ni lolo e vinakata na Kalou; kei na kena lewe vuqa ni tamata ena lotu mai, 18-23.

¹ A sa yaco tale vei au na vosa i Jiova ni lewe vuqa, ka vaka,

² Sa kaya vakaoqo ko Jiova ni lewe vuqa; Au a vuvu e na vuku i Saioni e na vuvu levu, io, au a vuvu e na vukuna e na cudru levu.

³ Sa kaya vakaoqo ko Jiova; Au sa qai lesu mai ki Saioni, ia ka'u na tiko ga e na loma i Jerusalemi: ena vakatokai talega ko Jerusalemi, me koro daudina; kei na ulu-ni-vanua i Jiova ni lewe vuqa, me ulu-ni-vanua tabu.

⁴ Sa kaya vakaoqo ko Jiova ni lewe vuqa; Ena tiko tale e na saqata mai Jerusalemi na tagane qase kei na yalewa qase ia era na dui vakaititoko voli e na vuku ni ra sa qase sara:

⁵ ia na saqata ni koro ena oso e na gonetagane kei na goneyalewa era qito voli e na kena saqata.

⁶ Sa kaya vakaoqo ko Jiova ni lewe vuqa; Kevaka ena ka ni veivakurabui ki na matadra na kena vo ni mataqali oqo e na gauna ko ya, ena sa ka ni veivakurabui talega beka ki mataqu? sa kaya ko Jiova ni lewe vuqa.

⁷ Sa kaya vakaoqo ko Jiova ni lewe vuqa; Raica, au na vakabulai ira na noqu tamata mai na vanua e cadra kina na siga, kei na vanua e dromu kina na siga;

⁸ ia ka'u na kauti ira mai, ka ra na tiko e loma i Jerusalemi: ka ra na vakabau me noqu tamata, ia koi au, ka'u na nodra Kalou, e na yalodina kei na yalododonu.

⁹ Sa kaya vakaoqo ko Jiova ni lewe vuqa; Me kaukauwa na ligamudou, oi kemudou sa rogoca e na gauna oqo na vosa oqo mai na gusudra na parofita, sa ra tukuna e na siga ka tauyavutaki kina na vale i Jiova ni lewe vuqa, io, na vale tabu me sa tara rawa.

¹⁰ Ia eliu, ni sa bera ni yaco na gauna ko ya, sa sega na kenai voli na tamata, se na kenai voli na manumanu; ia sa sega ga na vakacegu vua sa curu yani se vua sa curu mai e na vuku ni meca: ni'u a vakavuna na nodra dui veimecaki kece na tamata yadua.

¹¹ Ia e na gauna oqo ena sega ni vaka e na gauna eliu na noqu i valavala ki na kena vo ni mataqali oqo, sa kaya ko Jiova ni lewe vuqa.

¹² Ni na yaco na gauna ni sautu: na vaini ena vua tiko, ia na qele ena vuataka na vuana, ko lomalagi talega ena solia na kena tegu; ia ka'u na solia vei ira na kena vo ni mataqali oqo me ra taukena na ka kecega oqo.

¹³ Ia ena yaco, me vaka dou a vu ni veivakarusai vei ira na veimatanitu, oi kemudou na mataqali i Juta, kei na mataqali i Isireli; au na vakabulai kemudou, ka dou na yaco vaka talega kina, mo dou vu ni veivakalougatataki; dou kakua ni rere, me kaukauwa ga na ligamudou.

¹⁴ Ni sa kaya vakaoqo ko Jiova ni lewe vuqa; Me vaka ka'u a nakita me'u cudruvi kemudou, ni ra sa vakacudrui au ko ira na nomudou qase, sa kaya ko Jiova ni lewe vuqa, ia ka'u a sega ni veivutuni:

¹⁵ sa vaka talega kina ka'u sa nakita e na gauna oqo me'u caka vinaka ki Jerusalemi kei Juta: dou kakua ni rere.

¹⁶ Oqo na ka mo dou cakava; Dou dui vosa dina yadua vua na kai nona; ka mo dou ia e na nomudou veimatamata-ni-koro na lewa dina kei na lewa ni veivinakati;

¹⁷ ia mo dou kakua ni dui nanuma ca e na lomamudou vua na kai nona; ka mo dou kakua ni vinakata na bubului vakailasu: ni ka'u sa cata na ka kecega oqo sa kaya ko Jiova.

¹⁸ A sa yaco vei au na vosa i Jiova ni lewe vuqa, ka vaka,

¹⁹ Sa kaya vakaoqo ko Jiova ni lewe vuqa; A lolo e nai kava ni vula, kei na lolo e nai kalima, kei na lolo e nai kavitu, kei na lolo e nai katini ni vula, ena ka ni reki ga vei ira na mataqali i Juta, io, ena ka ni marau, ka so levu vinaka; ia mo dou vinakata ga na ka dina kei na veilomani.

²⁰ Sa kaya vakaoqo ko Jiova ni lewe vuqa; Ena lako mai na veimataqali, kei na lewe ni veikoro e vuqa;

²¹ ka ra na lako mai na lewe ni koro e dua ki na lewe ni koro e dua, ka kaya, Me da mai lako kusarawa me kere loloma vei Jiova, ia me da qaravi Jiova ni lewe vuqa: au na lako talega koi au.

²² Io, ena lako mai na veimataqali e vuqa kei na veimatanitu kaukauwa, me mai qaravi Jiova ni lewe vuqa e Jerusalemi, ka me kere loloma vei Jiova.

²³ Sa kaya vakaoqo ko Jiova ni lewe vuqa; E na gauna ko ya, era na mai taura na tutu ni nonai sulu e dua na Jiu, e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.