Sakaraia 7 - Vakavakadewa Makawa

Ko ira sa vakabobulataki era sa taroga na siga ni lolo eso, 1-3. Sa vunauca ko Sakaraia na nodra lolo vakaca, 4-7. Sa tukuni ni sa vu ni nodra vakabobulataki na nodra i valavala ca, 8-14.

¹ Ia e nai kava ni yabaki i Taraiase na tui, sa yaco na vosa i Jiova vei Sakaraia e nai kava ni siga e nai kaciwa ni vula, ko ya ko Kisiliu;

² ia ko ira na kai Peceli era sa talai rau ko Saresa kei Rekemi-meleki, kei na nodrau tamata, me ra vakamamasu vei Jiova,

³ ka vosa talega vei ira na bete era tiko e na vale i Jiova ni lewe vuqa, kei ira na parofita, ka kaya, Me keitou ia tiko li na tagi e nai kalima ni vula, ka tawasei keitou, me vaka na ka keitou sa dui cakava e na veiyabaki e vuqa oqo?

⁴ Sa qai yaco vei au na vosa i Jiova ni lewe vuqa, ka vaka,

⁵ Mo kaya vei ira kece na lewe ni vanua, kei ira na bete, ka vaka, Ni dou a lolo ka tagi e nai kalima ni vula kei na kenai kavitu, e na yabaki e vitusagavulu ko ya, dou sa lolo li vei au, io vei au?

⁶ Ia ni dou a kana, ka ni dou a gunu talega, dou sa sega li ni kana ka gunu me yaga walega vei kemudou?

⁷ Sa sega li ni kena vosa oqo ka vunautaka ko Jiova e na gusudra na parofita eliu, ni sa tawa tiko ka sa sautu ko Jerusalemi, kei na kena veikoro e vakavolivolita, ka ni sa tawa tiko na yasayasa vakaceva kei na buca?

⁸ A sa yaco na vosa i Jiova vei Sakaraia, ka vaka,

⁹ Sa kaya vakaoqo ko Jiova ni lewe vuqa, Dou ia ga na veilewai dodonu, ka mo dou dui ia nai valavala vakayalovinaka ka loloma vua na kai nona:

¹⁰ ia dou kakua ni vakasaurarataka na yada, kei na luveniyali, kei na kai tani, kei na dravudravua; ia mo dou kakua ni dui nanuma ca e na lomamudou vua na kai nona.

¹¹ A ra sa bese ga ni vakarorogo, ka ra vuki vakanadaku, ka ra sogota na daligadra, me ra kakua ni rogoca.

¹² Io, era sa vakaukauwataka na lomadra me vaka na vatu qiwa, me ra kakua ni rogoca na vunau, se na vosa sa solia ko Jiova ni lewe vuqa e na nona Yalo Tabu vei ira na parofita eliu me ra tukuna: ka sa yaco kina na cudru levu maivei Jiova ni lewe vuqa.

¹³ A sa yaco, me vaka ni sa kaci ko koya, ka ra bese ni rogoca; sa ra kaci vaka talega kina ko ira, ia ka'u a bese ga ni rogoca, sa kaya ko Jiova ni lewe vuqa:

¹⁴ ia ka'u a caginataki ira tani yani ki na veimatanitu kece era a sega ni kila: ia sa lala laivi tu na vanua, me sega ni veilakovi, ni ra sa vakavuna na kena lala tu na vanua sa vinakati sara.