Sakaraia 6 - Vakavakadewa Makawa

A raivotu ni qiqi-ni-valu e va, 1-8. A Mesaia, sa parofisaitaki me Bete levu ka Turaga levu, 9-15.

¹ Au a ta cake tale, ka vakaraica, ka sa va na qiqi-ni-valu sa lako mai na tadrua ni ulu-ni-vanua e rua: ia na ulu-ni-vanua sa ulu-ni-vanua parasa.

² Sa yarataka nai matai ni qiqi-ni-valu na ose damudamu; a sa yarataka nai karua ni qiqi-ni-valu na ose loaloa;

³ a sa yarataka nai katolu ni qiqi-ni-valu na ose vulavula; a sa yarataka nai kava ni qiqi-ni-valu na ose veivolavolai ka kaukauwa.

⁴ Au a qai kaya vua na agilose keirau sa veivosaki kaya, A cava na ka oqo, noqu turaga?

⁵ A sa kaya vei au, na agilose, Ko iratou oqo na yalo vakalomalagi vava, eratou sa lako mai na nodratou tiko e na mata ni Turaga ni vuravura taucoko.

⁶ Ko ya e loaloa na kena ose sa lako yani ki na vanua mai na tokalau; na ka vulavula talega sa muria; ia na ka veivolavolai sa lako yani ki na vanua ki na mata ni ceva.

⁷ Na ka kaukauwa talega sa lako yani, a sa segata me veilakoyaki voli e vuravura: ka sa kaya ko koya, Dou lako, dou veilakoyaki voli e vuravura. A ra sa veilakoyaki voli e vuravura.

⁸ Sa qai kacivaka vei au ko koya, ka kaya, Raica, oqori ka lako yani ki na vanua ki na tokalau sa vakaceguya na yaloqu e na vanua vakatokalau.

⁹ A sa yaco vei au na vosa i Jiova, ka vaka,

¹⁰ Mo kauta maivei iratou ka vakabobulataki, ko Elitai, kei Topaija, kei Jitaia, eratou sa lako mai Papiloni, ia mo lako talega mai ko iko e na siga ko ya, ka mo curu ki na valu i Josaia na luve i Sefanaia,

¹¹ ka kauta na siliva kei na koula, ka cakava nai sala vakaturaga, ka vakaisalataki Josua na luve i Jiosataki, na bete levu;

¹² ka kaya vua, Sa kaya vakaoqo ko Jiova ni lewe vuqa, Raica na tamata, na yacana na COKE; ia ena tubu mai ko koya mai na nona yasana, ena tara na vale i Jiova ko koya:

¹³ io, ena tara ko koya na vale i Jiova, ena tu talega vua na kenai ukuuku; ia ena tiko e na nonai tikotiko vakaturaga ka lewa ko koya; ena bete talega ko koya e na nonai tikotiko vakaturaga: ia na lewa ni veivinakati erau na ia vata ruarua.

¹⁴ Ia nai sala vakaturaga ena nodratou ko Elimi, kei Topaija, kei Jitaia, kei Eni na luve i Sefanaia, me kenai vakananumi e na vale i Jiova.

¹⁵ Ia ko ira sa tiko vakayawa era na mai veivuke me tara na vale i Jiova; ia dou na kila ni sa talai au mai vei kemudou ko Jiova ni lewe vuqa. Ia ena yaco na ka oqo, kevaka dou na gu ni talairawarawa ki na vosa i Jiova na nomudou Kalou.