Sakaraia 5 - Vakavakadewa Makawa

E dua nai vola vivigi e vuka, sai vakatakarakara ni nodra cudruvi na daubutako kei na daururu, 1-4. E dua na yalewa e bikai sobu e na loma ni efa, sai vakatakarakara ni cakacaka vakatevoro me na biu laivi tu ki Papiloni, 5-11.

¹ Au a qai ta cake tale, ka raica, sa dua nai vola vivigi sa vuka tiko.

² A sa kaya vei au ko koya, A cava ko sa raica? Au a kaya, Au sa raica e dua nai vola vivigi ka vuka tiko; a kena balavu sa ruasagavulu na kiupiti, kei na kena raraba e tini na kiupiti.

³ Sa qai kaya vei au ko koya, Oqo na vosa ni dauveivakarusai sa lako yani e dela ni vanua taucoko; io, ko ira kece era butako era na bokoci laivi vakakina me vaka e na tabana oqo; kei ira kece era bubului vakailasu era na bokoci laivi vakakina me vaka e na tabana ko ya.

⁴ Au na vakayacora yani, sa kaya ko Jiova ni lewe vuqa, ka na curuma na vale ni daubutako, kei na nona vale sa bubului vakailasu e na yacaqu; ena tiko talega e nona loma ni vale, ka vakayavuna vata kei na kena kau kei na kena veivatu.

⁵ Sa qai lako mai na agilose keirau sa veivosaki kaya, ka vaka vei au, Mo ta cake mada, ka raica se cava sa qai lako mai.

⁶ Au a kaya, A cava mada oqo? A sa kaya ko koya, Oqo na efa sa lako tu mai. Sa kaya talega, Sa vakaoqo na kedrai rairai e vuravura taucoko.

⁷ Ka raica, sa dua na uma bibi, ka sa dua na yalewa sa tiko e na loma ni efa.

⁸ A sa kaya ko koya, Sa vu ni ca oqo. A sa biuta ki na loma ni efa; ka sa tauca na uma bibi ki na gusu ni efa.

⁹ Au a qai ta cake; ka vakaraica, ka raica, sa le rua na yalewa erau lako mai, ia na cagi sa tiko e na tabadrau; ni rau sa vakatabana vakabelo; a rau sa laveta cake na efa ki na kedrau maliwa ko vuravura kei lomalagi.

¹⁰ Au a qai vaka vua na agilose keirau sa veivosaki kaya, Erau sa kauta kivei na efa?

¹¹ A sa kaya vei au ko koya, Me tara na kena vale e na vanua ko Saina: ni na vakaduri ka viritu maikea e na kenai tutu.