Sakaraia 4 - Vakavakadewa Makawa

Sa votu mai nai tutu-ni-cina koula, nai vakatakarakara ni soqosoqo lewe ni soro, ni sa vakabulai tale, 1-10. Na olive e rua sa kedrau i vakatakarakara na bete levu kei na turaga levu, 11-14.

¹ Ia na agilose keirau sa veivosaki kaya, sa mai vakayadrati au tale, me vaka na tamata sa vakayadrati mai na moce,

² ka kaya vei au, A cava ko sa raica? Au a kaya, Au sa raica e dua nai tutu-ni-cina sa koula taucoko, kei na kena bilo e delana, kei na kena cina e vitu e delana, kei na paipo ni waiwai e vitu ki na cina yadua, e tu e delana:

³ ka rua na vu ni olive sa tu voleka, e dua e nai matau ni bilo, ka dua e na kenai mawi.

⁴ Ia ka'u a kaya vua na agilose keirau sa veivosaki kaya, A cava na ka oqori, noqu turaga?

⁵ A sa kaya na agilose keirau sa veivosaki kaya, Sa sega li ni ko kila se cava na ka oqori? Au a kaya, E segai, noqu turaga.

⁶ A sa kaya vei au ko koya, Sa vakaoqo na vosa i Jiova vei Serupapeli, Sa segai e na qaqa, se na kaukauwa, e na Yaloqu ga, sa kaya ko Jiova ni lewe vuqa.

⁷ O cei ko iko, na ulu-ni-vanua levu? e na mata i Serupapeli ko na vakalolovirataki mo buca: ia ena kauta mai ko Koya na vatu sa kenai vakadei e na tutu ni vale ni sa kailavaki kina, Me kalougata! me kalougata!

⁸ A sa yaco tale mai vei au na vosa i Jiova, ka vaka,

⁹ A liga i Serupapeli sa tauyavutaka na vale oqo; a ligana talega ena vakaotia: ia dou na kila ni sa talai au mai vei kemudou ko Jiova ni lewe vuqa.

¹⁰ Ia ko cei me sa beca na siga ni ka lalai? ni ra na reki, ka ra na raica na vatu i vakarau e na liga i Serupapeli io na mata i Jiova vituvitu oqori sa veiciciyaki tu e vuravura taucoko.

¹¹ Au a vosa tale, ka kaya vua, A cava na vu ni olive ruarua oqo e nai matau ni tutu-ni-cina kei na kenai mawi?

¹² Au a baci vosa tale, ka kaya vua, A cava na taba ni olive ruarua oqo sa drodro maikina na waiwai koula ki na paipo ni cina koula ruarua?

¹³ A sa kaya tale vei au ko koya, Ko sa sega li ni kila se cava na ka oqo? Au a kaya, Io, au sega ni kila noqu turaga.

¹⁴ Sa qai kaya ko koya, Koi rau oqo na lewe rua sa lumuti, erau tu e na mata i koya na Turaga ni vuravura taucoko.