Sakaraia 3 - Vakavakadewa Makawa

O Josua na bete levu, sa vakaraitaki mai mei vakatakarakara ni cakacaka ni Kalou mai Jerusalemi, me na vakataudeitaki tale, kevaka e talairawarawa, 1-7. O Karisito na Coke sa yalataki mai, 8-10.

¹ Ia sa vakatakilai Josua na bete levu vei au, sa wavu tu ko koya e na mata ni agilose i Jiova, ia ko Setani sa wavu tu ki ligana i matau me nona meca.

² A sa kaya vei Setani ko Jiova, Me vunauci iko, Setani, ko Jiova; io, me vunauci iko ko Jiova, o koya sa digitaki Jerusalemi: sa sega beka ni dua na tiki ni buka oqo sa kaliraki mai na bukawaqa?

³ Ia ko Josua sa vakaisulu e nai sulu dukadukali, a sa wavu tu e na mata ni agilose.

⁴ A sa kaya ko koya vei ira era wavu tu e matana, Dou luvata tani vua nai sulu dukadukali. A sa kaya vua, Raica, au sa vakaseavutaka tani vei iko na nomu caka cala, ia ka'u na vakaisulutaki iko e nai sulu vou.

⁵ Au sa qai kaya, Me ra vakaisalataki koya e nai sala vakabete sa savasava. A ra sa vakaisalataki koya e nai sala vakabete sa savasava, ka vakaisulutaki koya e nai sulu. Ia na agilose i Jiova, sa wavu tu mai.

⁶ A sa vakadinadina vei Josua na agilose i Jiova, ka vaka,

⁷ Sa kaya vakaoqo ko Jiova ni lewe vuqa; Kevaka ko na muria na noqu sala, ka vakabauta na noqu i lesilesi, ko na qai lewa na noqu vale, ka vakatawa talega na noqu lomanibai, ia ka'u na solia vei iko na yasana mo lako voli vata kina kei ira era wavu tu oqo.

⁸ Mo rogoca mada, Josua na bete levu, o iko, kei ira na nomu i tokani era tiko e matamu; (ni ra sai vakatakarakara ko ira oqo) ni sai au, raica, ka'u na kauti koya mai na noqu tamata na COKE.

⁹ Ka raica, na vatu ka'u a viritaka e na mata i Josua; e na dua ga na vatu ena vitu na mata na: raica, oi au ka'u na ceuta na kenai ceuceu, sa kaya ko Jiova ni lewe vuqa, ia ka'u na kauta tani na caka cala ni vanua ko ya e na dua bauga na siga.

¹⁰ E na siga ko ya, sa kaya ko Jiova ni lewe vuqa, dou na dui kaciva na kai nomudou, me mai tiko e na ruku ni vaini, kei na ruku ni lolo.