Sakaraia 2 - Vakavakadewa Makawa

A Kalou, ni sa lomani Jerusalemi, sa tala e dua me vakarauta, 1-5. A nodra veivakabulai na kai Saioni, 6-9. Sa yalayala na Kalou me tiko kei ira, 10-13.

¹ Au a qai ta cake, me'u vakaraica, ka raica, sa dua na tamata, sa taura e dua na wa i vakarau.

² Au a qai kaya, O sa lako kivei? A sa kaya vei au ko koya, Me'u vakarauti Jerusalemi, me'u kila na kena raraba, kei na kena balavu.

³ Ka raica, sa lako yani na agilose keirau sa veivosaki kaya, ka sa dua tale na agilose sa mai tavaki koya,

⁴ ka kaya vua, Mo cici, ka vosa vua na cauravou oqori, ka kaya, Ena tawa ko Jerusalemi ka na sivia sara na kena bai, e na vuku ni kena levu ni tamata kei na manumanu ena tiko kina:

⁵ ia sa kaya ko Jiova, koi au ka'u na yaco me'u kena bai bukawaqa e vakavolivolita, me'u kenai ukuuku talega kina.

⁶ Ie, Ie, koi kemudou, dou dui dro mai na vanua ni tokalau, sa kaya ko Jiova: ka ni ka'u a vakasevi kemudou vaka na cagi vava kei lomalagi sa kaya ko Jiova.

⁷ I Saioni, ka tiko kaya na goneyalewa ni Papiloni mo vakabulai iko.

⁸ Ni sa kaya vakaoqo ko Jiova ni lewe vuqa; Sa liu mai nai ukuuku sa qai talai au emuri ko koya ki na veimatanitu sa vakacacani kemudou: ia ko koya sa tarai kemudou sa tara na loa ni matana.

⁹ Io, raica, au na dulaka na ligaqu vei ira, a ra na kau mei toki ni valu vei ira ka nodra bobula: ia dou na kila ni sa talai au mai ko Jiova ni lewe vuqa.

¹⁰ Mo sere ka marau, na goneyalewa ni Saioni: raica, koi au, ka lako mai, ia ka'u na tiko e na kemudou maliwa, sa kaya ko Jiova.

¹¹ Ia na lewe ni veimatanitu e vuqa ena musuki ira vei Jiova e na siga ko ya, ka yaco me noqu tamata: au na tiko talega e na kemudou maliwa, ia dou na kila ni sai Jiova ni lewe vuqa sa talai au mai vei kemudou.

¹² Ia ko Jiova ena taukeni Juta me sa nonai votavota e na vanua tabu, ka na digitaki Jerusalemi tale.

¹³ Dou tiko lo na tamata kecega e na mata i Jiova: ni sa tu cake ko koya mai na nonai tikotiko tabu.