Sakaraia 11 - Vakavakadewa Makawa

Ena vakacacani ko Jerusalemi. Ni ra biuti koya na Mesaia, ena biuti ira ko koya, 1-17.

¹ Dolava na nomu katuba ko iko Lepanoni, me kania na nomu sitari na bukawaqa.

² Mo qoqolou, na damanu, ni sa bale na vu ni sitari: ni ra sa vakacacani ko ira na lagilagi: dou qoqolou, na oki ni Pasani; ni sa bale sobu na veikau kaukauwa.

³ Sa rogo mai na nodra qoqolou nai vakatawa; ni sa vakacacani na nodra lagilagi: sa rogo mai na nodra tagi na luve ni laioni: ni sa vakacacani na kena vinaka kei Joritani.

⁴ Sa kaya vakaoqo ko Jiova na noqu Kalou; Mo vakania na qele ni sipi sa vakamatei tiko;

⁵ o ira sa nodra i taukei era vakamatei ira, ka ra sega ni nanuma ni ra cala kina: o ira talega era volitaki ira era sa dui kaya, Me vakavinavinakataki ko Jiova; ni'u sa vutuniyau mai: ia na nodra i vakatawa era sa sega ni lomani ira.

⁶ Ni'u na sega ni lomani ira tale na lewe ni vanua, sa kaya ko Jiova, ia raica, ka'u na soli ira na tamata yadua ki na liga ni kai nona, ki na ligana talega na nona tui: ka ra na vakacacana na vanua, ia ka'u na sega ni vakabulai ira mai na ligadra.

⁷ Ia ka'u na vakania na qele ni sipi e dauvakamatei, na sipi ka vakaloloma sara. Ia ka'u a taura e rua nai titoko; e dua ka'u a vakatoka na Loloma, ka dua ka'u a vakatoka nai Vau; au a qai vakania na qele ni sipi.

⁸ Ia ka'u a muduki ira tani nai vakatawa e lewe tolu e na dua ga na vula; ia na yaloqu sa rarawa vei ira, a yalodra talega sa cati au.

⁹ Au a qai kaya, Au na sega ni vakani kemudou: na ka sa mate, me mate ga; na ka talega sa muduki tani, me muduki tani ga; ia na kena vo me ra dui veikanikani vakataki ira ga.

¹⁰ Au a qai taura na noqu i titoko na Loloma, ka tamusuka rua, me'u musuka kina na noqu veiyalayalati ka'u a cakava vata kei ira kece na veimataqali.

¹¹ A sa musuki e na siga ko ya: ka ra sa qai kila kina ko ira na qele ni sipi vakaloloma ko ira era sa vakarorogo vei au ni sa vosa i Jiova oqo.

¹² Au a qai kaya vei ira, Ke sa vinaka vei kemudou, mo dou solia mai na qau i voli; ia ke segai, me sa kakua ga. A ra sa vakarautaka na qau i voli e tolusagavulu na tiki ni siliva.

¹³ A sa kaya vei au ko Jiova, Mo biuta ga vua na dautuli kuro: nai voli vinaka era a vakatautauvatataki au kina. Au a qai taura na tiki ni siliva e tolusagavulu, ka biuta vua na dautuli kuro e na vale i Jiova.

¹⁴ Au a qai tamusuka rua na noqu i titoko kadua, nai Vau, me'u muduka kina na nodra veiwekani tiko na Juta kei na Isireli.

¹⁵ A sa kaya vei au ko Jiova, Mo ia tale, ka mani taura vei iko nai yaya ni vakatawa lialia.

¹⁶ Ia raica, ka'u na vakatubura e dua nai vakatawa e na vanua, o koya ena sega ni la'ki raici ira era sa yali, ena sega talega ni vakasaqarai ira era sa sese tiko, ena sega talega ni vauca na ka sa ramusu, ka na sega ni vakania na ka sa bula tu; ia ena kania na lewe ni sipi sa uro, ka basuraka na nodra ququ.

¹⁷ Ena ca nai vakatawa sa sega ni yaga sa biuta na qele ni sipi! nai seleiwau ena tauca na ligana, kei na matana i matau: a ligana ena wamalai sara, kei na matana i matau ena vakabutobutotaki sara.