Sakaraia 10 - Vakavakadewa Makawa

Ko Jiova ga me qaravi ka me kakua na kalou lasu; ni sa cudruvi ira na Isireli, ena vakabulai ira talega ko koya, 1-12.

¹ Dou kerea vei Jiova na uca e na vula ni uca emuri; sa cakava na livaliva, ko Jiova, ia ena solia vei ira na uca tau bi, kei na co ki na tamata yadua e na vanua veico.

² Ia sa cavuta na ka wale na matakau, ko ira na rairai talega era sa raica na ka lasu, ka ra sa tukuna na tadra vakailasu; sa sega ni yaga na nodra veivakacegui: o koya oqo era lako sese kina me vaka na qele ni sipi, era sa rarawa, ni sa sega nai vakatawa.

³ Sa waqa na noqu cudru vei ira nai vakatawa, ka'u sa cudruva talega na me: ni sa lako mai ko Jiova ni lewe vuqa vei ira na nona qele-ni-sipi na mataqali i Juta, ka sa cakavi ira me ra vaka na nona ose vakaiukuuku e nai valu.

⁴ Ia maivei koya ena yaco mai na vatu ni tutu, ka maivei koya nai vako, ka maivei koya na dakai ni valu, ka maivei koya talega ko ira kecega era lewa.

⁵ Ia era na vakataki ira na qaqa, era na buturaka sobu na meca e na oruoru e na saqata e nai valu: ka ra na ia nai valu, ni sa tiko vata kei ira ko Jiova, ka ra na vakamaduataki ko ira era vodo ose.

⁶ Ia ka'u na vakaukauwataka na mataqali i Juta, ka vakabula talega na mataqali i Josefa, ka kauti ira tale mai; ni'u sa lomani ira: ia na nodra tiko oqo ena tautauvata kei na nodra tiko eliu ni'u a sega ni biuti ira tani: ni sai au ko Jiova na nodra Kalou, ia ka'u na rogoci ira.

⁷ A ra na vaka na qaqa ko ira na Ifireimi, ka na marau na yalodra me vaka ni ra gunu waini; ia na luvedra ena raica, ka marau; ia na yalodra ena rekitaki Jiova.

⁸ Au na kaluvi ira mai, ka vakasoqoni ira; ni'u a voli ira: ka ra na tubu me lewe vuqa me vaka na nodra tubu eliu.

⁹ Ke'u a duibiubiuti ira ki na veimataqali, era na vakananumi au mai na veivanua vakayawa, ka ra na bula vata kei na luvedra, ka lesu tale mai.

¹⁰ Ia ka'u na kauti ira tale mai na vanua ko Ijipita, ka vakasoqoni ira mai Asiria; ia ka'u na kauti ira ki na vanua ko Kiliati kei Lepanoni, ena sega talega na yasana e kune me na rauti ira.

¹¹ Ia ena lako yani ko koya e na loma ni wasawasa ni veivakararawataki, ena yavita talega na biau ni wasawasa, ena di kece talega na tikina titobu ni uciwai: ena vakasivoi talega na viavialevu ni Asiria, ia na toko ni sau nei Ijipita ena takali tani.

¹² Ia ka'u na vakaukauwataki ira vei Jiova; ia na yacana era na lako voli kina, sa kaya ko Jiova.