Ruci 4 - Vakavakadewa Makawa

Erau sa veivosaki ko Poasa kei na wekana me volia na vanua i Neomai kei Ruci, ka me watina ko Ruci, a sa bese, 1-12. Sa vakawati ko Poasa kei Ruci, a sa tubu vei rau ko Jese kei Tevita, 13-22.

¹ A sa lako cake ko Poasa ki na matamata-ni-koro, a sa tiko sobu maikea: ka raica, sa lako voli na wekana ka vosa kina ko Poasa, a sa kaya ko koya, Ie, ko iko! mo gole mai, mo mai tiko eke. A sa gole mai ko koya, ka tiko sobu.

² A sa kacivi ira mai ko koya e le tini na qase e na koro ko ya, ka kaya, Dou mai tiko sobu eke. A ratou sa tiko sobu.

³ A sa kaya ko koya vua na wekana dina, Ko Neomai, o koya ka lesu mai na vanua ko Moapi, sa via volitaka e dua na tiki ni vanua, ka nei Elimeleki na wekadaru:

⁴ ia ka'u a kaya me'u tukuna vei iko, Mo volia e matadra na lewe ni koro, kei na matadra na qase ni kai noqu. Kevaka ko via volia, mo volia ga; ia kevaka ko na sega ni via volia, mo tukuna mai vei au, me'u kila: ni sa sega e dua tale me volia, ko iko ga; ia ka'u sa taravi iko. A sa kaya ko koya, Au na volia.

⁵ A sa kaya ko Poasa, E na siga ko sa volia kina na tiki ni vanua maivei Neomai, e dodonu mo volia maivei Ruci talega na yalewa ni Moapi, na wati i koya sa mate, ka vakatubura na yacana sa mate ki na nonai votavota.

⁶ A sa kaya ko koya na wekana, Au sa sega ni volia rawa me noqu, de'u sa vakacacana na noqu i votavota: mo volia ga ko iko na ka sa dodonu me'u volia; ni'u sa sega ni volia rawa.

⁷ Ia sa dauvakaoqo na kenai valavala eliu e Isireli, ni sa ia na veivoli kei na veisau, me vakataudeitaka na ka kecega: sa luvata na nonai vava na tamata, ka solia vua na kai nona: ia oqo sa kenai vakadinadina vei ira na Isireli.

⁸ A sa kaya kina vei Poasa ko koya na wekana, Mo volia me nomu. A sa qai luvata na nonai vava.

⁹ A sa kaya ko Poasa vei ira na qase, kei ira kecega na tamata, Dou sa kila edaidai ni ka'u sa volia maivei Neomai na ka kecega ka nei Elimeleki, kei na ka kecega ka nei Kilioni kei Maloni:

¹⁰ ia ko Ruci talega na yalewa ni Moapi, na wati i Maloni, ka'u sa volia me watiqu, me'u vakatubura na yacana sa mate ki na nonai votavota, ka me kakua ni yali na yaca ni mate vei ira na wekana, kei na matamata-ni-koro ni nona tikina: dou sa kenai vakadinadina e na siga oqo.

¹¹ Era sa qai kaya ko ira na tamata kecega ka tiko mai na matamata-ni-koro, kei ira na qase, Keimami sa kenai vakadinadina. Me lewa ko Jiova na yalewa oqo sa lako mai ki na nomu vale me tautauvata kei Rejeli, ka tautauvata kei Lia, oi rau erau a tara na vale i Isireli: ia me ka talei na nomu cakacaka mai Efiraca, ka me rogo na yacamu e Pecileema:

¹² ia na nomu vale me vaka na vale i Feresi, o koya ka vakasucuma ko Tema vei Juta, me vakakina na kawa ena solia vei iko ko Jiova maivua na yalewa oqo.

¹³ A sa kauti Ruci ko Poasa me watina: a sa curu vua ko koya, a sa solia vua ko Jiova me kunekune, a sa vakasucuma e dua na luvena tagane.

¹⁴ A ra sa kaya vei Neomai ko ira na yalewa, Me vakavinavinakataki ko Jiova, o koya sa sega ni biuti iko me sega na wekamu e na siga edaidai, ia ena rogo na yacana e Isireli:

¹⁵ ia ena nomu i vakavakacegu ko koya, ka na vakani iko ni ko sa sika mai: ni sa vakasucumi koya na vugomu, o koya ka lomani iko, ka sa yaga cake vei iko, ka yaga vakalailai ke le vitu na luvemu tagane.

¹⁶ A sa kauta na gone ko Neomai, ka roqota ki na lomaserena, ka sa susugi koya.

¹⁷ A sa vakayacani koya ko ira na yalewa era kai nona, ka kaya, Sa sucu e dua na gone tagane vei Neomai; a ra sa vakatoka na yacana ko Opeti: o koya na tama i Jese, na tama i Tevita.

¹⁸ Ia oqo nai tabatamata nei Feresi: sa sucu ko Esironi na luve i Feresi,

¹⁹ a sa sucu ko Rami na luve i Esironi, sa sucu ko Aminatapi na luve i Rami,

²⁰ a sa sucu ko Nasoni na luve i Aminatapi, a sa sucu ko Salimoni na luve i Nasoni,

²¹ a sa sucu ko Poasa na luve i Salimoni, a sa sucu ko Opeti na luvei Poasa,

²² a sa sucu ko Jese na luve i Opeti, a sa sucu ko Tevita na luve i Jese.