Ruci 3 - Vakavakadewa Makawa

Sa vakavulici Ruci ko Neomai, 1-5. Sa lomani Ruci ko Poasa, a sa nanuma me watina, 6-18.

¹ Sa qai kaya vua ko Neomai na vugona, Na luvequ, me'u sega li ni qara me nomu e dua nai vakavakacegu, mo vinaka kina?

² Ia oqo, sa sega li ni wekadaru ko Poasa, ko a tiko vata kei ira na nona yalewa? Raica, sa irivi parile ko koya e na bogi edaidai e na rara ni buturaki sila.

³ Mo sili mada, ka lumuti iko, ka vakasulumi iko e na nomu i sulu, ka lako sobu ki na rara; mo kakua ni vakatakilai iko vua na tamata, ka me kana ka gunu oti mada ko koya.

⁴ Ia ni sa la'ki davo ko koya, mo raica na tikina sa davo kina ko koya, ia mo lako kina, ka cega nai tutuvi sa ubi kina na yavana, ia mo koto sobu; ka na qai tukuna vei iko ko koya na ka mo cakava.

⁵ A sa kaya vua ko koya, A ka kecega ko sa kaya vei au ka'u na kitaka.

⁶ A sa lako sobu ko koya ki na rara, a sa cakava na ka kecega ka vakarota vua na vugona.

⁷ Ia ni sa kana ka gunu oti ko Poasa, a sa marau na yalona, sa la'ki koto mai na mua ni binibini sila: a sa lako vakamalua ko koya, ka cega nai tutuvi sa ubi kina na yavana, a sa koto sobu.

⁸ Ia ni sa lomaloma-ni-bogi, sa rere ko koya na tagane, a sa vuki, ka raica, sa dua na yalewa sa koto ki yavana.

⁹ A sa taroga ko koya, O cei ko iko? A sa kaya ko koya, Oi au ko Ruci, na nomuni vada: mo ni tevuka na nomuni tutuvi me ubia na nomuni vada: ni daru sa veiwekani.

¹⁰ A sa kaya koya, Mo kalougata maivei Jiova, na luvequ: sa levu na loloma ko sa cakava emuri oqo ka lailai eliu, ni ko sa sega ni muri ira na cauravou, se ra dravudravua se vutuniyau.

¹¹ Ia oqo, na luvequ, mo kakua ni rere; au na cakava vei iko na ka kecega ko sa kaya: ni ra sa kila ko ira kecega na kai noqu mai na koro, ni ko sa yalewa yalododonu.

¹² Sa dina ga ni'u sa wekamu dina; ia sa dua ga na wekamu sa voleka ka'u sa yawa koi au.

¹³ Mo tiko ga e na bogi oqo, ia e na mataka, kevaka ena cakava vei iko ko koya nai valavala ni veiwekani dina, sa vinaka; me cakava ga ko koya na cakacaka ni veiwekani: ia kevaka sa bese ni cakava vei iko na cakacaka ni veiwekani dina, me vaka sa bula ko Jiova, ka'u na cakava vei iko na cakacaka ni veiwekani: mo koto ga me sa mataka mai.

¹⁴ A sa koto voleka ki na yavana ko koya ka mataka mai: A sa tu cake ko koya ni ra sa sega ni veikune rawa na tamata. A sa kaya ko koya, Me kakua mada ni kilai ni sa lako mai e dua na yalewa ki na rara.

¹⁵ Sa kaya talega ko koya, Mo kauta mai nai tutuvi ko sa vakaisulu kina, ka taura. Ia ni sa taura tiko ko koya, sa vakarauta ko koya e ono na i vakarau parile, a sa tauca vua: a sa lako ko koya ki na koro.

¹⁶ Ia ni sa lako mai ko koya vua na vugona, sa kaya ko koya, O sa vakaevei, na luvequ? A sa tukuna vua ko koya na ka kecega ka cakava vua ko koya na tamata.

¹⁷ A sa kaya talega ko koya, Sa solia mai vei au ko koya nai vakarau parile oqo e ono; ni sa kaya vei au, Mo kakua ni lesu lala vua na vugomu.

¹⁸ A sa kaya ko koya, Mo wawa, na luvequ, mo kila mada se na vakaevei nai otioti ni ka oqo: ni na sega ni vakacegu na tamata, sa na vakaotia mada na ka oqo edaidai.