Ruci 2 - Vakavakadewa Makawa

Sa caka vinaka sara vei Ruci ko Poasa.

¹ A sa dua na weka i na wati i Neomai, sa mataqali vata kei Elimeleki, a tamata vutuniyau sara, na yacana ko Poasa.

² A sa kaya vei Neomai ko Ruci na yalewa ni Moapi, Me'u lako mada ki na were, me'u tomitomika na sola ni sila ni ka'u sa muria e dua sa na lomani au. A sa kaya vua ko koya, Mo lako ga, na luvequ.

³ A sa lako yani ko koya, ka vakatotomi e na were ka muri ira era tamusuki sila: ia sa lako vakailoa ki na tiki ni were sa nei Poasa, o koya ka mataqali vata kei Elimeleki.

⁴ Ka raica, sa lako mai Pecileema ko Poasa, a sa kaya vei ira na tamata sa tamusuki sila, Me tiko vata kei kemudou ko Jiova. A ra sa kaya vua, Me vakalougatataki kemuni ko Jiova.

⁵ A sa kaya ko Poasa vua na nona tamata sa lesi me vakaraici ira era tamusuki sila, Ko cei beka na yalewa oqo?

⁶ A sa vosa na tamata sa lesi me vakaraici ira era tamusuki sila, ka kaya, Oqo na yalewa ni Moapi, o koya ka lesu mai kei Neomai mai na vanua ko Moapi:

⁷ a sa kaya ko koya, Me'u vakatotomi mada ka kumukumuna na sila e na maliwa ni veivau sila, ka muri ira era tamusuki sila: a sa lako mai ko koya, a sa tiko ga mai na mataka ka yacova na tiki-ni-siga oqo; sa tiko vakalailai walega mai vale ko koya.

⁸ Sa qai kaya vei Ruci ko Poasa, Mo rogoci au mada, na luvequ, Mo kakua ni la'ki tomitomika na sila e na were tani, ia mo kakua ni lako tani eke, mo tikotiko ga eke kei ira na noqu goneyalewa:

⁹ mo raica tiko na were era sa tamusuki sila kina, ka muri ira tiko: au sa sega li ni vakaroti ira na cauravou, me ra kakua ni tarai iko? ia ni ko sa viagunu, mo la'ki gunu mai na saqa, mai na ka era sa takiva na cauravou.

¹⁰ A sa cuva e matana ko koya, ka cuva vaka ki na qele, a sa kaya vua, E na vuku ni cava ka'u sa kune loloma kina e matamuni, mo ni nanumi au kina, ni'u sa yalewa ni vanua tani?

¹¹ A sa vosa ko Poasa, ka kaya vua, Sa tukuni vakavinaka vei au na ka kecega ko sa cakava vua na vugomu ni sa mate na watimu: ka ni ko sa biuta na tamamu kei na tinamu kei na vanua ko a sucu kina, ia ko sa lako mai vei ira na tamata ko a sega ni kila eliu:

¹² me sauma na nomu cakacaka ko Jiova, ia me vakayacori sara na kemui sau maivei Jiova na Kalou ni Isireli, o koya ko sa mai vakararavi e ruku ni tabana.

¹³ Sa qai kaya ko koya, Me'u kune loloma mada e matamuni, na noqu turaga; ni kemuni sa vakacegui au, ka vosa vakayalololoma vei au na nomuni vada, ia ka'u sa sega ni tautauvata kei na dua na nomuni vada.

¹⁴ A sa kaya vua ko Poasa, E na gauna sa ia kina na kana mo toro mai ki ke, ka kania eso na kakana, ka tokoca na kemu e na wai wiwi. A sa tiko vata ko koya kei ira era tamusuka na sila: a sa solia vua ko koya na sila tavu, a sa kania ko koya, a sa mamau, ka vakacauna.

¹⁵ Ia ni sa tu cake ko koya me vakatotomi, sa vakaroti ira na nona cauravou ko Poasa, ka kaya, Me vakatotomi ko koya e na maliwa ni veivau sila, ka dou kakua ni vakatatabuya:

¹⁶ ia mo dou cavuta talega eso, mai na veivau sila, ka vakalutuma me tomika ko koya, ia dou kakua ni vunauca.

¹⁷ A sa vakatotomi tiko e na were ko koya, ka yakavi mai, a sa samuta na ka ka tomika: a sa dua beka na efa parile.

¹⁸ A sa taura ko koya, ka lako ki na koro: a sa raica ko vugona na ka ka tomika: a sa kauta mai, ka solia vua na ka sa vo ni sa mamau ko koya.

¹⁹ A sa kaya vua ko vugona, O a vakatotomi maivei edaidai? ia ko a cakacaka maivei? me kalougata ko koya ka lomani iko. A sa tukuna ko koya vei vugona se ko cei sa cakacaka kaya ko koya, a sa kaya, Na yacana na tamata ka'u a cakacaka kaya edaidai, ko Poasa.

²⁰ A sa kaya vua na vugona ko Neomai, Me kalougata maivei Jiova ko koya sa ia tiko na nona loloma vei kedaru sa bula tiko, vei iratou talega eratou sa mate. A sa kaya vua ko Neomai, Sa wekadatou na tamata ko ya, sa dua vei ira na wekadatou dina.

²¹ A sa kaya ko Ruci na yalewa ni Moapi, Sa kaya talega vei au ko koya, Mo tiko ga kei ira na noqu cauravou, me tamusuki oti mada na noqu sila kecega.

²² A sa kaya vei Ruci na vugona ko Neomai, Sa vinaka, na luvequ, mo dou lako vata kei ira na nona yalewa, ka me ra kakua ni tavaki iko e na were tani.

²³ A sa tikotiko ga kei ira na yalewa nei Poasa ko koya me tomitomi me yacova nai otioti ni tamusuki ni parile, kei na tamusuki witi; a rau sa tiko ko koya kei na vugona.