Roma 9 - Vakavakadewa Makawa

Sa tukuna ko koya na nona loloma vei ira na kai nona, 1-5. Sa qai tukuni ira ni ra sai valavala ca, ka sa biuti ira kina na Kalou, ka vakabauti ira na veimatanitu tani me ra nona tamata; a sa vakatakila ni sa dodonu sara na Kalou e na nona lewa, 6-33.

¹ Au sa vosa dina e na mata i Karisito, au sa sega ni vosa lasu, sa vakadinadina talega vei au na noqu lewa-eloma e na Yalo Tabu,

² ni'u sa rarawa vakalevu, a sa yaluma tikoga na lomaqu.

³ Ni ka'u sa daugadreva me'u tawase tani vei Karisito, e na vukudra na wekaqu, o ira era sa wekaqu dina vakayago:

⁴ era sa luve i Isireli; sa nodra talega na vakabau me ra gone, kei nai ukuuku, kei na veiyalayalati, kei na soli vunau, kei nai valavala ni soro vua na Kalou, kei na vosa ni yalayala:

⁵ sa nodra ko ira na qase, a sa tubu maivei ira na Karisito me vaka na yagona, o koya sa lewa na ka kecega, na Kalou sa vakarokorokotaki ka tawa mudu. Emeni.

⁶ Ia sa sega ni vaka sa sega ni yaco na vosa ni Kalou. Ni ra sa sega ni Isireli dina ko ira kece sa maivei ira na Isireli:

⁷ era sa sega talega ni luvena ko ira kecega na kawa i Eparaama: ia Na kawa i Aisake ga ena vakatokai me nomu kawa.

⁸ Sa kenai balebale oqo, O ira na luvena vakayago, era sa sega ni luve ni Kalou; ia na luve ni yalayala ga era sa vakabau me kawa.

⁹ Ni sa vakaoqo na vosa ni yalayala, E na gauna vakaoqo ka'u na lako mai, ka na sucu vei Sera e dua na gonetagane.

¹⁰ A sa sega ni koya walega; ia ko Repeka talega ni sa kunekune mai vua e dua, a tamada ko Aisake;

¹¹ ni rau sa bera ni sucu, se rau cakava na ka vinaka se na ka ca, me tu dei kina na ka sa lesia eliu ka digitaka na Kalou, sa sega ga e na vuku ni cakacaka, e na vukuna ga sa kaciva,

¹² sa kainaki vua na yalewa ko ya, O koya sa qase vei rau ena qaravi koya sa gone.

¹³ Sa vakakina na ka sa volai, Au sa vinakati Jekope, ia ka'u sa cati Iso.

¹⁴ A cava me da qai kaya? Sa tu beka vua na Kalou nai valavala tawa-dodonu? E segai sara.

¹⁵ Ni sa kaya vei Mosese ko koya, Au na lomani koya ka'u sa lomana, ia ka'u na yalovinaka vua ka'u sa yalovinaka kina.

¹⁶ Sa qai sega ni yaco e na vukuna sa gadreva, se na vukuna sa cici, ia e na vukuna ga na Kalou sa yalovinaka mai.

¹⁷ Ni sa kaya vei Fero nai Vola Tabu, E na vuku ni ka oqo ka'u sa vakaturi iko cake kina, me'u vakatakila vei iko na noqu kaukauwa, me tukuni talega na yacaqu ki vuravura taucoko.

¹⁸ O koya oqo sa yalovinaka kina ko koya vua sa yalona kina, a sa vakadomoqataki koya sa yalona kina.

¹⁹ O na qai kaya vei au, E na vuku ni cava sa ia tiko kina na veibeitaki ko koya? ia ko cei sa vorata na nona lewa?

²⁰ Kakua ni vakaoqo, o iko na tamata; ko cei ko iko mo veileti kaya na Kalou? Ena kaya beka na ka sa caka vei koya sa cakava, O sa cakavi au vakaoqo e na vuku ni cava?

²¹ E sega beka ni veitaliataka na tete ko koya sa dautuli kuro, me cakava kina e na dua bauga nai buli tete, e dua na bilo me talei, ka dua tale me sega ni talei.

²² Ia ka vakaevei ke sa vinakata na Kalou, me vakaraitaka na nona cudru, me vakatakila talega na nona kaukauwa, a sa vosota vakadede sara kina na veibilo ena cudruvi sa vakarau tu me rusa:

²³ me vakatakila talega na kena levu ni nona vinaka ki na veibilo sa lomani, o koya sa vakarautaka eliu ko koya ki nai ukuuku,

²⁴ io vei keda ga, sa kacivi keda ko koya, sa sega walega maivei ira na Jiu, maivei ira talega sa matanitu tani.

²⁵ Me vaka talega na ka sa kaya ko koya e nai vola i Osea, Au na vakatokai ira era sa sega ni noqu tamata eliu, me ra noqu tamata; Ko koya talega ka sega ni lomani eliu, me qai lomani:

²⁶ Ena yaco talega e na vanua sa kainaki kina eliu vei ira, Sa sega ni noqu tamata koi kemudou; Era na qai vakatokai kina me ra luve ni Kalou bula.

²⁷ Sa kacivaki ira na Isireli ko Aisea talega, Kevaka sa tautauvata na kedrai wiliwili na Isireli kei na nuku ni waitui, ia ena bula ga na kena vo:

²⁸ ni na vakayacora na nona vosa ko Jiova e vuravura, ka na vakaotia ka vakalekalekataka.

²⁹ Me vaka talega na ka sa kaya eliu ko Aisea, Kevaka ka sega ni dua na kawa sa vakalaiva vei keda ko Jiova ni lewe vuqa, Eda sa vakataki Sotoma, eda sa tautauvata talega kei Komora.

³⁰ A cava me da qai kaya? O ira na veimatanitu tani, ko ira era sa sega ni muria na veivakadonui, era sa yaco me ra vakadonui, ni ra sa vakadonui e na vakabauta.

³¹ Ia ko ira ga na Isireli, o ira era sa muria na vunau me ra vakadonui kina, era sa sega ni yaco ki na vunau ko ya.

³² E na vuku ni cava? ni ra sa sega ni muria e na vakabauta, e na cakacaka ga ni vunau: ni ra sa tarabe e na vatu e dauveivakatarabetaki;

³³ me vaka na ka sa volai, Raica, au sa tauca mai Saioni na vatu e dauveivakatarabetaki kei na vatu ni veivakalomacataki: Ia ko koya yadua sa vakabauta ena sega ni vakamaduataki.