Roma 7 - Vakavakadewa Makawa

A tamata sa vakabauti Jisu sa sereki mai na vunau, ka veiwatini kei Jisu, 1-6. Nai valavala ni tamata sa via muria na vunau ni Kalou, a sa kunea ni sa dredre, 7-25.

¹ Dou sa sega li ni kila, kemudou na veiwekani, (ni'u sa vosa vei ira ga era sa kila na vunau,) ni sa vauca na tamata na vunau e na veisiga ni nona bula?

² Ia na yalewa sa vakawati, sa vauci koya na vunau vua na watina, ni sa bula tiko ko koya; ia kevaka sa mate na watina; sa qai sereki kina na yalewa mai na vunau ni veiwatini.

³ O koya ena vakatokai kina me dautagane, kevaka sa laki vakawati kei na dua na tagane tani, ni sa bula tiko na watina: ia kevaka sa mate na watina, sa qai sereki ga mai na vunau ko ya; ka na sega kina ni dautagane, kevaka ena laki vakawati kei na dua na tagane tani.

⁴ Dou sa vakakina, na veiwekani ni dou sa qai sereki mai na vunau e na vuku ni yago i Karisito; me dua tani mo dou veiwatini kaya, io ko koya sa vakaturi cake tale mai na mate me da vua kina vua na Kalou.

⁵ Ni da sa tiko vakayago ga, sa dautubu vakaukauwa e na veitikida na gagadre ca, sa tubu mai na vunau, me vuataki kina na mate.

⁶ Ia eda sa qai sereki mai na vunau, ni da sa qai mate ki na ka sa vauci keda; me da ia na veiqaravi e nai tovo vou ni yalo, ka segai e nai tovo makawa ni vunau.

⁷ A cava me da qai kaya? Sa ca li na vunau? E segai sara. Au a sega dina ni kila se cava nai valavala ca, ke'u sega ni kila na vunau: ni'u sa sega ni kila se cava na daukocokoco, kevaka sa sega ni kaya na vunau, Kakua ni kocokoco.

⁸ Ia na ca, ni sa kaukauwa e na vuku ni vunau, sa vakatubura e lomaqu na gagadre ca kecega. Ni sa mate na ca ni sa sega na vunau.

⁹ Ia ka'u a bula ga eliu ni sa sega na vunau; ia ni sa lako mai na vosa ni vunau, sa bula tale na ca, ka'u sa qai mate kina.

¹⁰ Ia na vosa ni vunau, o koya sa yaco rawa kina na bula, ka'u sa kunea sa yaco kina na mate.

¹¹ Ni sa kaukauwa na ca, e na vuku ni vosa ni vunau, a sa temaki au kina, ka vakamatei au.

¹² Ia sa savasava na vunau, sa savasava talega nai vakaro, sa dodonu talega, ka vinaka.

¹³ Sa qai yaco beka na ka vinaka me ka me'u mate kina? E segai sara. A ca ga, me rairai kina ni sa ca, sa taura na ka vinaka me kitaki au kina me'u mate; me rairai kina na ca me ca dina sara e na vuku ni vosa ni vunau.

¹⁴ Ni da sa kila sa ka vakayalo na vunau: ia koi au, au sa vakayago walega, ka'u sa volitaki ki na ca.

¹⁵ A ka ka'u sa kitaka tiko, au sa sega ni vinakata: ia na ka ka'u sa vinakata, au sa sega ni kitaka; ia na ka ka'u sa cata, au sa kitaka tiko.

¹⁶ Ia kevaka ka'u sa kitaka na ka ka'u sa sega ni vinakata, au sa kaya kina ni sa vinaka na vunau.

¹⁷ A sa sega ni koi au dina sa kitaka, a ca ga sa tiko vei au.

¹⁸ Ni'u sa kila sa sega sara ni tiko vei au e na noqu i tovo vakayago e dua na ka vinaka; ni sa tiko ga vei au na vinakata na ka vinaka; ia na kaukauwa me'u kitaka kina, ka'u sa sega ni kunea.

¹⁹ Ia na ka vinaka ka'u sa vinakata, au sa sega ni kitaka; ia na ka ca ka'u sa sega ni vinakata, au sa kitaka ga.

²⁰ Ia kevaka ka'u sa kitaka na ka ka'u sa sega ni vinakata, sa qai sega ni koi au dina ka kitaka, na ca ga sa tiko vei au.

²¹ Ia ka'u sa kunea kina e dua na vunau, sa tiko kina vei au na ca ni'u sa via kitaka na vinaka.

²² Ni'u sa vinakata na vunau ni Kalou e na lomaqu dina:

²³ ia ka'u sa kunea e dua tani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni ca, o koya sa tiko e na veitikiqu.

²⁴ A tamata vakaloloma koi au! o cei ena sereki au mai na yago ni mate oqo?

²⁵ Au sa vakavinavinaka vua na Kalou e na vuku ni noda Turaga ko Jisu Karisito. Ia sa qai vakaoqo, au sa qarava na vunau ni Kalou e na lomaqu dina, ia na vunau ni valavala ca e na noqu i tovo vakayago.