Roma 6 - Vakavakadewa Makawa

Era sa sega ni valavala ca tiko ko ira na tamata era sa veivinakati tale kei na Kalou; eda sa via muri koya ga e na vuku ni nona loloma vei keda, 1-23.

¹ A cava me da qai kaya? me da sai valavala ca tiko li, me tubu vakalevu kina na loloma?

² E segai sara. Oi keda sa mate ki nai valavala ca, eda na kitaka tiko vakaevei nai valavala ca?

³ Dou sa sega beka ni kila, koi keda kece sa papitaisotaki vei Jisu Karisito, eda sa papitaisotaki ki na nona mate?

⁴ O koya eda sa bulu vata kaya kina, ni da sa papitaisotaki ki na nona mate: me vaka sa vakaturi cake tale mai na mate na Karisito e na kaukauwa nei Tamana, me da sai valavala vaka talega kina e na bula vou.

⁵ Ia kevaka eda sa dua vata me da vakataki koya e na nona mate, eda na vakataki koya talega e na nona tu cake tale mai na mate:

⁶ ni da sa kila oqo, ni rau sa lauvako vata kaya ki na kauveilatai na noda tamata makawa, me takali kina na yago ni valavala ca, me da kakua tale ni bobula ki nai valavala ca.

⁷ Ni sa sereki mai nai valavala ca ko koya sa mate tu.

⁸ Ia kevaka eda sa mate vata kei Karisito, eda vakadinata ni da na bula vata kaya talega:

⁹ ni da sa kila ni sa vakaturi cake tale mai na mate na Karisito, ena sega ni mate tale; sa sega tale ni rawai koya na mate.

¹⁰ Ni sa mate ko koya, sa mate vakadua e na vuku ni valavala ca; ia ni sa qai bula sa bula vua na Kalou.

¹¹ Mo dou vaka talega kina ni dou sa vakasami kemudou mo dou sa mate sara ki nai valavala ca ka bula vua na Kalou e na vuku i Jisu Karisito.

¹² O koya me qai kakua ni gumatua nai valavala ca e na yagomudou sa mate rawa, mo dou muria na kena gagadre ca.

¹³ Kakua talega ni solia na veitikimudou ki nai valavala ca me caka kina na ka ca: dou soli kemudou ga vua na Kalou, me vaka dou sa bula mai na mate, kei na veitikimudou vua na Kalou me caka kina na ka e dodonu.

¹⁴ Ni na sega ni veitaliataki kemudou nai valavala ca: ni dou sa sega ni lewai e na vunau, e na loloma ga.

¹⁵ Ia ka vakaevei? me da sai valavala ca tiko li, ni da sa sega ni lewai e na vunau, ka e na loloma ga? E segai sara.

¹⁶ Dou sa sega beka ni kila, o koya yadua dou sa soli kemudou vua mo dou nona tamata mo dou talairawarawa vua, dou sa nona tamata ga dou sa talairawarawa kina; se ki na caka cala mo dou mate kina, se ki na caka dodonu mo dou vakadonui kina?

¹⁷ Ia me ia na vakavinavinaka vua na Kalou, ni dou sa muria, mai na vu ni yalomudou, koi kemudou ka bobula ki nai valavala ca, nai vakarau ni vakavuvuli dou sa vakatavulici kina.

¹⁸ Ia ni dou sa qai sereki mai nai valavala ca, dou sa qai qarava nai valavala dodonu.

¹⁹ Au sa vosa vakatamata ga, ni sa malumalumu na yagomudou: ia me vaka dou a solia eliu na veitikimudou me ra qarava na ka dukadukali, kei nai valavala ca me levu kina na ca; mo dou qai solia vakakina na veitikimudou me ra qarava na ka dodonu me caka kina na ka savasava.

²⁰ Ni dou a bobula tiko ki nai valavala ca, dou a yawa tu ki nai valavala dodonu.

²¹ Ia ka cava na vuana dou sa rawata, e na gauna ko ya, mai na veika dou sa qai madua kina? ni sa kenai otioti ni veika oqori na mate.

²² Ia ni dou sa qai sereki mai nai valavala ca, ka yaco me tamata ni Kalou, dou sa qai rawata na vuana e nai valavala savasava; kei nai otioti, na bula tawa mudu.

²³ Ni sa kenai sau ni valavala ca na mate: ia sai solisoli walega ni Kalou na bula tawa mudu, e na vuku i Jisu Karisito na noda Turaga.