Roma 5 - Vakavakadewa Makawa

A veika vinaka sa yaco vei keda ni da sa vakadonui, 1-5. A ka dina sara na loloma ni Kalou, ni sa lomani keda ni da sa tamata ca, 6-11. Eda sa ca vakalevu e na vuku i Atama e na vukuda talega, a sa rawarawa me da vinaka vakalevu sara e na vuku i Jisu, 12-21.

¹ O koya oqo, ni da sa vakadonui e na vakabauta, me da sa qai veivinakati kei na Kalou e na vuku ni noda Turaga ko Jisu Karisito:

² e na vukuna talega eda sa torova rawa kina, e na vakabauta na loloma oqo eda sa qai tu kina; me da sa reki talega ni da sa nuitaka na veivakalougatataki ni Kalou.

³ A sa sega ni koya walega, me da sa daureki talega e na vuku ni veika rarawa: ni da sa kila sa tubu na dauvosota mai na ka rarawa;

⁴ ia na dauveivakatovolei mai na dauvosota; ia nai nuinui mai na dauveivakatovolei.

⁵ Ia sa sega na madua e na vuku ni nuinui; ni sa sovaraki ki na yaloda na loloma ni Kalou ni sa soli vei keda na Yalo Tabu.

⁶ Ni sa mate na Karisito me nodra i sosomi na tamata i valavala ca e na gauna sa lokuci eliu, ni da sa malumalumu tiko.

⁷ Ni sa sega beka e dua me mate mei sosomi ni tamata yalododonu: ia ka sa dua beka sa doudou me mate mei sosomi ni tamata dauloloma.

⁸ Ia na Kalou sa vakatakila na nona loloma vei keda, ni sa mate na Karisito me nodai sosomi ni da sa tamata ca.

⁹ Ia ni da sa qai vakadonui e na vuku ni nona dra, ena qai rawarawa cake me da vakabulai mai na cudru e na vukuna.

¹⁰ Io, kevaka eda sa veivinakati kei na Kalou e na vuku ni nona mate na Luvena, ni da sa veimecaki, ena qai rawarawa cake, ni da sa veivinakati tu, me da vakabulai tiko e na vuku ni nona bula.

¹¹ A sa sega ni koya walega, ia eda sa daureki talega e na Kalou e na vuku ni noda Turaga ko Jisu Karisito, o koya eda sa yaco kina me da veivinakati tu.

¹² Ia me vaka sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega:

¹³ Sa tu eliu e vuravura nai valavala ca, sa yaco emuri na vunau: a sa sega ni okati nai valavala ca ni sa sega na vunau.

¹⁴ Ia mai na gauna i Atama ka yacova na gauna i Mosese sa dauveitalia ko mate vei ira talega era sa sega ni valavala ca me vaka na talaidredre i Atama, o koya sa nonai vakatakarakara sa lako mai emuri.

¹⁵ Ia erau sa sega ni tautauvata sara na talaidredre, kei nai solisoli walega. Ia kevaka sa mate na lewe vuqa e na vuku ni nona talaidredre na lewe dua, sa qai rawarawa cake sara me yaco vakalevu vei ira na lewe vuqa na loloma ni Kalou, kei nai solisoli ni loloma, e na vukuna ga na tamata e le dua, ko Jisu Karisito.

¹⁶ Erau sa sega ni tautauvata na ka sa yaco e na vuku ni nona cala e dua bau, kei nai solisoli: ni sa dua bauga sa yaco kina na lewa me da cala, ia nai solisoli walega sa yaco vei ira sa vuqa na nodra i valavala ca me ra vakadonui kina.

¹⁷ Ia kevaka sa gumatua na mate e na vukuna na lewe dua, e na talaidredre ni le dua; ena qai rawarawa vakalevu cake vei ira sa yacovi ira na loloma levu kei nai solisoli ni veivakadonui, me ra gumatua e na bula e na vukuna na le dua, ko Jisu Karisito.

¹⁸ O koya oqo, me vaka sa lewai me cudruvi na tamata kecega e na vuku ni dua bauga na cala; sa vaka talega kina e na vuku ni dua bauga nai valavala dodonu sa rawa me ra vakadonui na tamata kecega me ra bula:

¹⁹ ka me vaka sa vakacalai na lewe vuqa e na nona talaidredre e dua bau na tamata, sa vakadonui vaka talega kina na lewe vuqa e na vuku ni nona talairawarawa na le dua.

²⁰ A sa qai kau mai na vunau, me uasivi kina nai valavala ca. Ia ni sa uasivi mai nai valavala ca sa qai uasivi cake vakalevu sara na loloma:

²¹ me vaka ni sa gumatua nai valavala ca ki na mate, me gumatua vaka talega kina na loloma, e na vakadonui, ki na bula tawa mudu, e na vuku i Jisu Karisito na noda Turaga.