Roma 15 - Vakavakadewa Makawa

Sa vakavulici ira me ra yalovinaka vei ira na tamata era sa malumalumu ga e na lotu, 1-7. Sa tukuna ni sa vinakata na Kalou me bula ko ira talega na veimatanitu era sega ni Jiu, 8-21. Sa via raici ira mai Roma, a sa kaya me ra masulaka me lako rawa kina vei ira ko koya, 22-33.

¹ Sa kilikili talega kei keda, oi keda sa kaukauwa, me da vosota na nodra malumalumu era sa sega ni kaukauwa, me da kakua talega ni kitaka na ka sa vinaka vei keda ga.

² Me da kitaka yadua na ka e vinaka vua na kai noda, na ka e yaga me vakatavulici kina ko koya.

³ Ia na Karisito talega sa sega ni kitaka na ka sa vinakata ga ko koya; ia me vaka ga sa volai, Sa tau vei au na nodra vosa ca era sa vosavakacacataki iko.

⁴ Io, na ka kecega sa volai eliu sa volai me da vakatavulici kina, me noda na vosota kei na vakacegui sa vu mai nai Vola Tabu, me rawa kina nai nuinui.

⁵ Ia me solia mada vei kemudou na Kalou, o koya na vu ni vosota kei na veivakacegui, mo dou lomavata vakai kemudou me vakataki Karisito Jisu:

⁶ mo dou lomavata ka domovata ni dou sa vakarokorokotaka na Kalou, o koya na Tama i Jisu Karisito na noda Turaga.

⁷ O koya mo dou qai veivakacegui vakai kemudou, me vaka sa vakacegui kemudou na Karisito, me vakarokorokotaki na Kalou.

⁸ Ia ka'u sa kaya ni sai talatala ko Jisu Karisito vei ira era sa cili, me vakatakila ni sa dina na Kalou, me vakadinadinataka na vosa ni yalayala vei ira na qase:

⁹ me ra vakarokorokotaka na Kalou ko ira talega na veimatanitu tani e na vuku ni nona loloma; me vaka sa volai, E na vuku ni ka oqo ka'u na vakatusai iko kina e na kedra maliwa na veimatanitu tani, Ka sere ki na yacamuni.

¹⁰ A sa kaya tale, Dou reki vata na veimatanitu tani, kei ira na nona tamata.

¹¹ Sa dua tale. Dou vakarokorokotaki Jiova, na veimatanitu kecega: Ia dou vakarokorokotaki koya vakalevu, oi kemudou na veivanua kecega.

¹² O Aisea talega sa kaya, Ena tubu na waka i Jese, Kei koya ena tu cake me lewa na veimatanitu tani; Era na vakararavi vei koya ko ira na veimatanitu tani.

¹³ Ia me vakasinaiti kemudou mada na Kalou, o koya na vu ni nuinui, e na reki kecega kei na vakacegu ni dou sa vakabauta, me levu sara na nomudou i nuinui e na vuku ni nona kaukauwa na Yalo Tabu.

¹⁴ Ia koi au talega, au sa vakasami kemudou, na wekaqu, ni dou sa sinai e na yalololoma, ni dou sa sinai e na vuku kecega, ni dou sa rawata talega me dui veivakatavulici vakai kemudou.

¹⁵ Ia ka'u sa doudou ga, me'u volavola vakalailai yani vei kemudou, na veiwekani, me'u vakananumi kemudou tale, e na vuku ni loloma sa solia mai vei au na Kalou,

¹⁶ me'u yaco mei talatala i Jisu Karisito vei ira na veimatanitu tani, me'u kitaka na cakacaka e nai tukutuku-vinaka ni Kalou, me vinakati nai cabocabo ni veimatanitu tani, ni sa vakasavasavataki ira na Yalo Tabu.

¹⁷ O koya sa tu kina vei au na ka me'u vakalevulevui au kina e na vuku i Jisu Karisito e na veika ni Kalou.

¹⁸ Ni'u na sega ni doudou walega me'u cavuta na ka tani; na ka ga sa vakayagataki au kina na Karisito, me vakatalairawarawataki ira na veimatanitu tani, e na vosa kei nai valavala,

¹⁹ e na vuku ni sa kaukauwa na veika-mana kei na veika e veivakurabuitaki, sa caka e na kaukauwa ni Yalo Tabu, ia ka'u a vakatekivu kina mai Jerusalemi, ka lako voli ka yaco ki Iliriko, ni'u sa vunautaka kece nai tukutuku-vinaka kei Karisito.

²⁰ Ia ka'u sa gumatua sara vakakina, me'u vunautaka nai tukutuku-vinaka, ia ka sega ga e na vanua sa tukuni oti kina na yaca i Karisito de'u tara walega na ka e dela ni yavu ni tamata tani:

²¹ ia me vaka ga sa volai, O ira sa sega ni tukuni mada vei ira ko koya, era na raica: Ia ko ira era sa sega ni rogoca, era na kila,

²² O koya oqo sa tarovi vakavuqa kina na noqu lako vei kemudou.

²³ Ia ni sa qai sega na ka me'u tiko kina e na yasana oqo, ka sa yabaki vuqa ka'u a gadreva kina me'u lako vei kemudou;

²⁴ ni na yaco na noqu lako ki Sipeini: ni'u sa nanuma me'u raici kemudou e na noqu lako, ka mo dou kauti au e na noqu i lakolako kina, ni sa oti mada na nomudou vakacegui au vakalailai ni da tiko vata.

²⁵ Ia ka'u sa qai lako ki Jerusalemi, me'u kauta na soli vei ira era sa lotu.

²⁶ Ni ra sa vinakata ko ira na kai Masitonia kei Akaia, me ra ia e dua nai solisoli loloma me nodra na dravudravua era sa lotu mai Jerusalemi:

²⁷ io, era sa vinakata; a sa dodonu me ra soli ka vei ira. Io, kevaka era sa rawata maivei ira na nodra veika vakayalo ko ira na veimatanitu tani, sa qai dodonu kina vei ira me ra solia vei ira na veika vakayago.

²⁸ Ia ni'u sa cakava oti mada na ka oqo, ka solia vei ira na ka-ni-loloma oqo me ra taura, au na qai taka vei kemudou ka lakani ki Sipeini.

²⁹ Ia ka'u sa kila, ni'u na lako yani vei kemudou, au na lako kei na veivakalougatataki taucoko kei Karisito.

³⁰ Ia ka'u sa vakamasuti kemudou, na veiwekani, e na vuku ni noda Turaga ko Jisu Karisito, e na vuku talega ni loloma ni Yalo Tabu, me da gumatua vata e na masu vua na Kalou e na vukuqu;

³¹ me'u vakabulai maivei ira mai Jutia era sa sega ni talairawarawa; me ra vinakata talega ko ira era sa lotu na noqu cakacaka ena caka mai Jerusalemi;

³² me'u lako kina vei kemudou e na reki e na lewa ni Kalou, ka me'u vakacegui vata kei kemudou.

³³ Ia me tiko vata kei kemudou kecega na Kalou ni veivakacegui. Emeni.