Roma 14 - Vakavakadewa Makawa

Sa vakavulici ira ko koya me ra kakua ni beci ira sa lailai na nodra vakabauta, 1-4. Me ra kakua ni veileti e na ka ni lotu sa vakarairai; me ra veilomani ga; me ra kakua ni dauveivakalewai, 5-23.

¹ O koya sa malumalumu na nona vakabauta dou kauta vei kemudou, ia me kakua ga me sa lewai tiko na veika e dauveiletitaki.

² E dua sa doudou me kania loa na ka kecega: ia ko koya sa malumalumu, sa daukania na rourou ga.

³ Me kakua ni beci koya sa sega ni kana ko koya sa kana: ia me kakua ni lewai koya sa kana ko koya sa sega ni kana: ni sa vinakati koya na Kalou.

⁴ O cei ko iko mo lewa na tamata ni turaga tani? ena tu ko koya, se bale, vua na nona turaga. Io, ena tu dei ga: ni sa rawarawa vua na Kalou me vakataudeitaki koya.

⁵ E dua sa doka e dua na siga ka segai nai kadua: ka dua tani sa doka na siga kecega. Me dui lewa deivaka na tamata yadua e na lomana.

⁶ O koya sa nanuma na siga, sa ka ga vua na Turaga na nona nanuma; ia ko koya sa kana, sa ka ga vua na Turaga na nona kana, ni sa vakavinavinaka ko koya vua na Kalou; ia ko koya sa sega ni kana, sa ka talega vua na Turaga na nona sega ni kana, a sa vakavinavinaka ko koya vua na Kalou.

⁷ Ni sa sega e dua vei keda sa bula e na vukuna ga, se dua sa mate e na vukuna ga.

⁸ Io, kevaka eda sa bula, eda sa bula e na vuku ni Turaga; se da mate, eda sa mate e na vuku ni Turaga: o koya oqo eda sa nona kina na Turaga, se da bula se da mate.

⁹ O koya oqo sa mate kina na Karisito, ka sa bula tale, me nodra Turaga era sa mate kei ira era sa bula.

¹⁰ Ia ko iko, ko sa lewai koya na wekamu e na vuku ni cava? se ko iko tale, ko sa beci koya na wekamu e na vuku ni cava? ni da na tu kecega e na mata ni tikotiko ni veilewai ni Kalou.

¹¹ Ni sa volai, Sa kaya na Turaga, me vaka ka'u sa bula, ena tekiduru vei au ko ira na tamata kecega, Ia ena vakatusa vua na Kalou na yame kecega.

¹² O koya oqo eda na dui vakatusai keda kecega vua na Kalou.

¹³ O koya me da qai kakua tale ni dauveivakalewai tiko; oqo ga, mo dou lewa, me kakua e dua me cakava e dua na ka me tarabe kina se bale kina na wekana.

¹⁴ Au sa kila, ka sa vakadinadinataka vei au na Turaga ko Jisu, ni sa sega na ka e dukadukali vakai koya ga; ia vua sa nanuma sa dukadukali na ka, sa qai dukadukali vei koya.

¹⁵ Ia kevaka sa rarawa na lomana na wekamu e na vuku ni kakana, o sa qai sega ni valavala me vaka na loloma. Kakua ni vakarusai koya e na kemu kakana, o koya sa mate e na vukuna na Karisito.

¹⁶ O koya me kakua kina ni vosavakacacataki na nomudou ka vinaka:

¹⁷ ni sa sega ni kakana se ka-ni-gunu na matanitu ni Kalou; na yalododonu ga, kei na vakacegu, kei na reki e na Yalo Tabu.

¹⁸ Ni sai koya sa qaravi Karisito e na veika oqo, sa vinaka vua na Kalou, a sa vinakati koya talega ko ira na tamata.

¹⁹ O koya oqo me da muria kina na veika ni veivinakati, kei na veika eda na dui veivakatavulici kina.

²⁰ Kakua ni vakarusa na cakacaka ni Kalou e na vuku ni kakana. E dina ga sa savasava na ka kecega; ia sa ca vua na tamata sa kana ka sa tarabe kina eso.

²¹ E vinaka mo kakua ni kania na lewe ni manumanu, se gunu waini, se kitaka e dua na ka sa bale kina na wekamu.

²² Na vakabauta sa tu vei iko, me tu vei iko ga e na mata ni Kalou. Sa kalougata na tamata sa sega ni beitaki koya e na ka sa vakatara ko koya.

²³ Ia ko koya sa sega ni dinata ni sa tara vua, sa lewai me cudruvi kevaka sa kana, e na vuku ni sa kana ka sega ni dinata: ia na ka kecega eda sa sega ni dinata ni tara vei keda, sai valavala ca oqori.