Roma 13 - Vakavakadewa Makawa

Sa vakarota vei ira na tamata lotu ko koya me ra talairawarawa vei ira na nodra turaga vakavuravura, 1-7. Me ra lomani ira na tamata kecega me vaka na nodra lomani ira vakai ira, 8-14.

¹ Me ra talairawarawa vei ira na turaga levu ko ira na tamata kecega. Ni sa sega na turaga sa tubu wale, mai vua ga na Kalou: ko ira era sa turaga tu, sa lesi ira na Kalou.

² Ia ko koya sa vorata na turaga, sa vorata nai lesilesi ni Kalou: ia ena cudruvi ko ira era sa vorata.

³ Ko ira na turaga era sa sega ni vu ni rere vei ira sa caka vinaka, vei ira ga sa caka ca: o sa qai gadreva li mo sega ni rerevaka na turaga? mo kitaka na ka e vinaka, ena qai dokai iko kina ko koya:

⁴ ni sa nona talai na Kalou ko koya vei iko mo vinaka kina. Ia kevaka ko sa caka ca, mo rere ga; ni sa sega ni taura walega nai seleiwau ko koya: ni sa nona talai na Kalou, me cudruvi koya sa caka ca.

⁵ O koya oqo e dodonu kina mo dou talairawarawa, e segai walega e na vuku ni cudru, e na vuku ni lewa-eloma talega.

⁶ O koya mo dou qai ia talega na soli: ni ra sa nona talai na Kalou, era sa qarava tiko na ka oqo.

⁷ O koya mo dou qai solia vei ira kecega na ka e dodonu: na soli vei ira sa nodra nai solisoli; ai sigana vei ira sa nodra nai sigana; dou rerevaki ira e dodonu me ra rerevaki: vakarokorokotaki ira e dodonu me ra vakarokorokotaki.

⁸ Me kakua na nona ka e dua ko sa sega ni sauma, na dauveilomani ga me ia tiko; ni sa muria na vunau taucoko ko koya sa daulomana na tani.

⁹ Io, oqo: Mo kakua ni ia na veibutakoci, Mo kakua ni laba, Mo kakua ni butako, Mo kakua ni kocokoco; ia kevaka sa dua tale nai vakaro, sa tu vata kecega e na vosa oqo, Mo lomana na kai nomu me vaka ko sa lomani iko.

¹⁰ O koya sa dauloloma sa sega ni caka ca vua na kai nona: o koya oqo sa cakava kina na vunau taucoko ko koya sa dauloloma.

¹¹ Ia oqo, ni da kila na gauna, ni sa gauna oqo mo dou yadra kina mai na moce; ni sa qai voleka na noda bula, ka yawa e na gauna ni noda vakabauta.

¹² Sa vakarau oti na bogi, a sa voleka na siga: o koya me da qai luvata tani nai valavala ni butobuto, ka me da vakaiyaragi tu e na rarama.

¹³ Me da lako voli me vaka e kilikili, me vaka e na siga; me kakua nai soqosoqo lialia, se na mateni, me kakua na daudara se nai valavala velavela, me kakua na veileti se na vuvu.

¹⁴ Ia dou vakaisulu e na Turaga ko Jisu Karisito, ka kakua ni ia me vakarau ki na gagadre ca ni yago.