Roma 12 - Vakavakadewa Makawa

Sa vakatavulici ko ira na tamata lotu me ra soli ira vua na Kalou, 1,2. Me ra yalomalumalumu ka gumatua me ra kitaka na nodra i tavi, 3-8. Me ra veilomani sara vakai ira, me ra lomani ira talega na tamata kecega, 9-21.

¹ O koya oqo, au sa vakamamasu vei kemudou, na veiwekani, e na vuku ni loloma vakavuqa ni Kalou, mo dou solia na yagomudou mei madrali bula, me savasava, me vinaka vua na Kalou, me nomudou i soro vakayalo.

² Ia dou kakua ni vakatauvatani kemudou kei ira era sa vakavuravura: ia dou mataliataki ga ni sa vakavoui na yalomudou, mo dou kila rawa kina na loma ni Kalou, sa yaga, ka vinaka, ka dodonu sara.

³ Ia e na loloma sa soli mai vei au, au sa kaya vei ira na tamata yadua vei kemudou, me kakua e dua me dokai koya me vaka sa sega ni dodonu me dokai koya; me yalomatua ga na nona nanuma, me vaka nai vakarau ni vakabauta sa vota na Kalou vei ira yadua.

⁴ Me vaka sa dua bauga na yagoda, ka vuqa na tikida, ia ka sa sega ni vakaitavi vata na tikida kecega;

⁵ sa vakakina koi keda, na lewe vuqa, eda sa yago vata ni da tu vata kei Karisito, eda sa veitikina vaka talega vakai keda.

⁶ Ni da sa rawata na veisolisoli sa duidui me vaka na loloma sa soli vei keda: kevaka sa parofisai, me da parofisai me vaka nai vakarau ni noda vakabauta;

⁷ se na dauveivota, me da ia na veivota; se ko koya sa dauvakatavuvuli, me vakavuvuli tiko;

⁸ se ko koya sa dauvunau, me vunau tiko; o koya sa ia na dausolisoli, me dina na lomana; o koya sa daulewa, me gumatua kina; o koya sa dauloloma, me ia e na reki.

⁹ Me kakua ni vakailasu na loloma. Mo dou cata sara na ka ca; mo dou kabita sara na ka vinaka.

¹⁰ Dou veilomani sara e na veilomani ni veitacini; dou veiuasiviti e na veivakarokorokotaki;

¹¹ e na gumatua mo dou kakua ni vucesa mai: me katakata na yalomudou; mo dou qarava na Turaga;

¹² dou reki e nai nuinui; vosota na ka rarawa; ia tikoga na masu:

¹³ veivotayaka vei ira na dravudravua era sa lotu; dauvakacegui ira na vulagi.

¹⁴ Dou vosavakalougatataki ira era sa vakacacani kemudou: vosavakalougatataka ga, ka kakua ni rukaka.

¹⁵ Dou reki vata kei ira era sa reki, ka tagi vata kei ira era sa tagi.

¹⁶ Dou lomavata tiko vakai kemudou. Kakua ni nanuma na veika vakaturaga, ia mo dou veiriti kei ira na tamata lalai. Dou kakua ni vakasami kemudou ni dou sa vuku.

¹⁷ Kakua ni veisausaumitaka na nona ca e dua. Nakita eliu na veika sa dodonu e na matadra na tamata kecega.

¹⁸ Kevaka sa rawa, mo dou vakatovolea me veilomani kei ira na tamata kecega.

¹⁹ Oi kemudou sa lomani dou kakua ni sauma na ca sa caka vei kemudou, ia mo dou laiva vua na Kalou me sauma; ni sa volai; A noqu i tavi me'u cudruvaka; au na sauma koi au, sa kaya na Turaga.

²⁰ O koya mo qai vakania na nomu meca, kevaka sa viakana; kevaka sa viagunu, mo vagunuvi koya: ko na binia kina ki na uluna na qilaiso sa waqa tu ni ko sa kitaka vakaoqo.

²¹ Me kakua ni rawai iko na ca, mo rawa ga na ca e na vinaka.