Roma 11 - Vakavakadewa Makawa

Sa tukuna ko koya ni sa sega ni biuti ira kecega na Jiu na Kalou, a sa sega ni biuti ira vakadua; ena vakabauti ira tale me ra nona tamata, me lotu kina ko vuravura kecega, 1-32. Sa qai vakarokorokotaka na Kalou, 33-36.

¹ Au sa qai taroga, Sa biuta tani na nona tamata na Kalou, se segai? E segai sara. Oi au na luve i Isireli, a kawa i Eparaama, mai na yavusa i Penijamini.

² Sa sega ni biuta na nona tamata na Kalou, o ira sa kila eliu ko koya. Dou sa sega li ni kila na ka sa kaya nai Vola Tabu ni sa tukuni Ilaija? ni sa beitaki ira na Isireli ko koya vua na Kalou, a sa kaya,

³ I Jiova, era sa vakamatei ira na nomuni parofita, a ra sa kelirukuta sobu na nomuni veicabocabo-ni-soro; ia koi au duaduaga, au sa bula, ka ra sa qarai au me'u mate?

⁴ Ia ka cava sa kaya vua na vosa ni Kalou? Au sa maroroya me noqu e le vitu na udolu na tamata, era sa sega ni tekiduru vei Peali.

⁵ Sa vaka talega kina e na gauna oqo, sa tu ga na kena vo era sa digitaki e na loloma.

⁶ Ia kevaka sa ka-ni-loloma, sa qai sega ni ka-ni-cakacaka: ke sa sega ni vakaoqo, sa sega ni loloma na loloma.

⁷ Sa qai vakaevei? Sa sega ni rawata na ka era sa vakasaqara ko ira na Isireli; ia ko ira na digitaki era sa rawata; a sa vakadomoqataki na kena vo,

⁸ me vaka na ka sa volai, Sa solia vei ira na Kalou na yalo sa daumoce, na mata sa sega ni rai rawa, kei na daliga sa sega ni rogo rawa; ka yacova na siga oqo.

⁹ Sa kaya talega ko Tevita, Me yaco na nodra tepeli me kedrai cori, kei na tudai, Kei na ka me ra tarabe kina, me kedrai sau talega ni ca.

¹⁰ Me vakabutobutotaki na matadra, me ra kakua ni rai rawa, Ka mo vakalairorotaka tikoga na dakudra.

¹¹ Au sa qai taroga, Era sa tarabe me ra bale sara, se segai? E segai sara: ia e na nodra bale, sa rawa na bula vei ira na veimatanitu tani, me vakavuvutaki ira.

¹² Ia kevaka sa vutuniyau mai ko vuravura e na vuku ni nodra bale, a sa vutuniyau mai na veimatanitu tani ni sa vakalailaitaki ko ira oqori; ena qai vakatanievei ni ra sa vakalevui mai?

¹³ Ni'u sa qai vosa vei kemudou sa matanitu tani; ni'u sa nodra i apositolo na veimatanitu tani, au sa doka na cakacaka ka'u sa lesi kina:

¹⁴ de ka'u vakavuvutaki ira na wekaqu vakayago, ka me'u vakabulai ira kina eso.

¹⁵ Ia kevaka sa vinakati mai ko vuravura ni sa biu tani ko ira oqori, ena sega li ni vaka na bula mai na mate na nodra lomani tale?

¹⁶ Ia kevaka sa savasava nai sevu, ena vaka talega kina na kena taucoko; ia kevaka sa savasava na vuna, ena vaka talega kina na veitabana.

¹⁷ Ia kevaka sa musuki laivi eso na tabana ia ko iko, na taba ni olive ni veikau, sa mai sema vata kei ira, mo bula vata kei ira e na vu ni olive sa uro;

¹⁸ mo kakua ni vakalevulevui iko cake vei ira na tabana dina. Ia kevaka ko sa vakalevulevui iko, sa sega ni bula na vuna e na vukumu, o iko ga sa bula e na vuku ni vuna.

¹⁹ O na qai kaya, Sa musuki laivi na veitabana dina, me'u sema kina.

²⁰ E dina; sa musuki laivi ko ira ni ra sa sega ni vakabuta, ia ko iko ko sa tu dei ga ni ko sa vakabauta. Kakua ni yalolevu, mo rere ga.

²¹ Kevaka sa sega ni vosota na veitabana dina na Kalou, de qai sega talega ni vosoti iko.

²² O koya mo qai raica ruarua, na loloma, kei na cudru, ni Kalou: a cudru vei ira sa bale: kei na loloma vei iko, kevaka ko sa tu dei e na nona loloma: ia kevaka e segai ko na musuki laivi talega ko iko.

²³ O ira talega, kevaka era sa sega ni tawa vakabauta tiko, era na sema vata: ni sa rawarawa vua na Kalou me vakasemai ira vata tale.

²⁴ Ia kevaka ko sa musuki mai na olive sa ka ga ni veikau, ia ko sa sema vata kei na olive vinaka drau sa sega ni tovo vata kaya: ena qai rawarawa cake, me sema vata kei na nodra vu ni olive dina ko ira sai tovo vata kaya.

²⁵ Ni'u sa sega ni vinakata, na veiwekani, mo dou lecava na ka vuni oqo, de dou vakasami kemudou ni dou sa vuku; ni ra sa yaco na Isireli eso me ra domoqa, ka malua me curu mada na lewe vuqa maivei ira na veimatanitu tani.

²⁶ Ia sa vakaoqo, era na vakabulai ko ira kecega na Isireli: me vaka na ka sa volai, Ena lako mai Saioni ko koya nai Vakabula, Ka na kauta tani nai valavala ca maivei ira na Jekope;

²⁷ Ia sa noqu veiyalayalati oqo vei ira, Ni'u sa kauta tani na nodra i valavala ca.

²⁸ E nai tukutuku-vinaka, era sa veimecaki ko ira e na vukumudou: ia e nai lesilesi ga, era sa vinakati e na vukudra na qase.

²⁹ Ni sa sega ni veivutuni tale na Kalou e na vuku ni nonai solisoli se nona kacivi ira.

³⁰ Me vaka ni dou a sega ni vakabauta na Kalou eliu, a sa qai yaco vei kemudou na loloma e na vuku ni nodra vakatitiqa:

³¹ sa na vaka talega kina ko ira era sa sega ni vakabauta e na vuku ni sa yaco vei kemudou na loloma me yaco kina vei ira talega na loloma.

³² Ni sa sogolati ira vata na Kalou e na vakatitiqa, me lomani ira kecega ko koya.

³³ A ka vakaidina na kena titobu ni nona vutu ni vuku kei na nona yalomatua na Kalou! sa sega ni kilai rawa na nona lewa, a sa sega ni kune na nonai valavala!

³⁴ O cei sa kila na loma ni Turaga? se ko cei me nonai vakavuvuli?

³⁵ se ko cei sa solia mada vua, me na qai saumi tale vua?

³⁶ Ni sa vu mai vua na ka kecega, e na vukuna talega, ka me nona talega; me vakarokorokotaki ko koya ka sega ni mudu. Emeni.