Roma 10 - Vakavakadewa Makawa

Sa tukuna ko koya ni sa biuti ira na Jiu na Kalou ni ra sa sega ni vakabauti Jisu; ia na tamata kece sa vakabauti koya dina, era sa veivinakati kina kei na Kalou, 1-21.

¹ O kemudou na veiwekani, au sa gadreva e na vu ni yaloqu, au sa masu talega vua na Kalou e na vukudra na Isireli, me ra bula.

² Ni'u sa tukuni ira ni ra sa lomakatakata vua na Kalou, ia era sa sega ni yalomatua.

³ Ni ra sa sega ni kila na veivakadonui sa vu mai vua na Kalou, a ra sa qara me dua na veivakadonui vakataki ira, a ra sa sega kina ni vakamalumalumutaki ira me ra vakadonui mai vua na Kalou.

⁴ Ni sa vakayacora na Karisito na ka sa nakiti e na vunau, me vakadonui ko ira kece era sa vakabauta.

⁵ Ni sa tukuna ko Mosese na veivakadonui sa yaco e na vuku ni vunau, Na tamata sa cakava, ena bula kina.

⁶ Ia na veivakadonui sa yaco e na vakabauta sa tukuna vakaoqo, Mo kakua ni vosa e na yalomu, O cei me lako cake ki lomalagi? [ka me kauti Karisito sobu mai:]

⁷ se vaka ne, O cei me lako sobu ki na Yasana-vuni? [ka me kauti Karisito cake mai na mate.]

⁸ Ia ka cava e kaya? Sa voleka vei iko na vosa, io e na gusumu, kei na yalomu: a vosa ni vakabauta, o koya keitou sa vunautaka.

⁹ Kevaka ko na vakatusa e na gusumu na Turaga ko Jisu, ka vakadinata e na vu ni yalomu ni sa vakaturi koya cake tale mai na mate na Kalou, ko na bula.

¹⁰ Ni sa vakadinata na tamata e na vu ni yalona me sa vakadonui kina, ia na gusuna sa vakatusa kina me bula.

¹¹ Ni sa kaya nai Vola Tabu, O koya yadua sa vakabauti koya ena sega ni vakamaduataki.

¹² Ni sa tautauvata na Jiu kei koya sa matanitu tani: ni sa dua bauga na Turaga vei ira kecega, o koya sa vutu ni ka vinaka vei ira kecega era sa masuti koya.

¹³ Ni na bula ko ira vakaaduaga era sa masuta na yaca i Jiova.

¹⁴ Era na qai masu vakacava vua era sa sega ni vakabauta? a ra na vakabauti koya vakacava era sa sega ni rogoca kina? a ra na rogoca vakacava, kevaka e sega e dua me tukuna?

¹⁵ Ia era na tukuna vakacava, kevaka era sa sega ni talai? me vaka na ka sa volai, Sa lagilagi sara na yavadra era sa tukuna nai tukutuku-vinaka ni veika vinaka!

¹⁶ A ra sa sega ni vakabauta kecega nai tukutuku-vinaka; ni sa kaya ko Aisea. I Jiova, ko cei sa vakabauta na neitou i tukutuku?

¹⁷ Eda sa kila kina ni sa rawa na vakabauta e na vakarorogo, kei na vakarorogo e na vosa i Karisito.

¹⁸ Ia ka'u sa taroga, Era sa sega li ni rogoca? E dina sa vakakina, Sa lako na kedrai rogorogo ki vuravura taucoko, Kei na nodra vosa ki nai yalayala kei vuravura.

¹⁹ Ia ka'u sa taroga, Sa sega beka ni kila ko ira na Isireli? Sa tukuna eliu ko Mosese, Au na vakavuvutaki kemudou e na vukudra era sega ni noqu tamata: Au na vakacudrui kemudou e na matanitu sesewa.

²⁰ A sa doudou sara ko Aisea, ka sa tukuna, Era sa kunei au ko ira era a sega ni qarai au: Au sa vakarairaitaki vei ira era a sega ni tarogi au.

²¹ Ia ka sa kaya vei ira na Isireli, E na veisiga kecega ka'u sa dodoka yani na ligaqu kivei ira na tamata dautalaidredre ka dauvakatitiqa.