Osea 9 - Vakavakadewa Makawa

Era na vakararawataki ka vakabobulataki na Isireli e na vuku ni nodra i valavala ca kei na nodra dauqarava na kalou lasu, 1-17.

¹ Dou kakua ni marau, na Isireli, e na reki levu, me vakataki ira na veimataqali: ni dou sa la'ki dautagane ka sa laiva na nomudou Kalou, dou a vinakata na kemui sau e na rara ni sila kecega.

² A rara kei nai keli-ni-waini ena sega ni vakani ira, ia na waini vou ena sega ni yaga vei ira.

³ Era na sega ni tiko e na vanua nei Jiova; era na lesu ga ki Ijipita ko ira na Ifireimi, mai Asiria talega era na kania na ka dukadukali.

⁴ Era na sega ni livia nai sevu waini vei Jiova, ka ra na sega ni vinaka vua: a nodra i soro ena tautauvata vei ira kei na kedra madrai era ia na so mate; ko ira kece sa kana kina era na vakadukadukalitaki: ia na nodra madrai sa na kedra ga, ena sega ni kau ki na vale i Jiova.

⁵ A cava mo dou qai cakava e na siga ni so tabu, kei na siga ni so levu i Jiova?

⁶ Ni ra sa lako tani mai na veivakacacani: ko Ijipita, ena kumuni ira: ko Memifise, ena buluti ira: a nodra i yau siliva ka domoni, ena taukena na salato: ena tiko e na nodra vale laca na soni.

⁷ Sa yaco mai na siga ni veicudruvi, sa yaco mai na siga ni veisausaumi; era na kila ko ira na Isireli: sa sesewa na parofita, sa kudru na tamata sa curumi, e na vuku ni levu ni nomudou caka cala, kei na veicati levu.

⁸ O ira na Ifireimi erai vakatawa era sa tovata kaya na noqu Kalou: ia ko koya na parofita sa nonai cori na daubiri dai e na nonai valavala kecega, na vu ni veicati e na vale ni nona kalou.

⁹ Sa ra la'ki vakavelavelataki ira vakalevu e na ca, me vaka e na gauna i Kipea: ena nanuma ko koya na nodra caka cala, ena sauma na nodra i valavala ca.

¹⁰ Ni ka'u a kunei ira na Isireli era vaka na vua-ni-vaini mai veikau: ka'u a raici ira na tamamudou me vaka nai sevu ni lolo, ni sa vuavuai: sa ra yaco ki Peali-piori, ka tawasei ira ki na ka e veivakamaduataki; ka ra yaco me ra vakasisila me vaka na ka ko ya era domona.

¹¹ Ena vuka tani na nodra i ukuuku na Ifireimi me vaka na manumanu, ena sega na sucu, se na bukete, se na kunekune.

¹² Ni ra susuga na luvedra, ka'u na vakayali ira, me kakua na tamata e vo; io, ena ca talega ko ira, ni'u sa lako tani vei ira!

¹³ Ko Ifireimi, me vaka ni'u a raici Taia, sa tei e na yasana vinaka; ia ko Ifireimi, era na vakasucuma na luvedra me nona na dauveivakamatei.

¹⁴ Mo solia vei ira, Jiova! a cava beka mo ni solia? solia vei ira na kete dauvakalutu gone kei na sucu daudi.

¹⁵ Sa vu ga na nodra ca kece mai Kilikali; ni ka'u a cati ira maikea: e na vuku ni ca ni nodra i valavala ka'u na vakasavi ira tani kina mai na noqu vale, ka'u na sega ni lomani ira tale: sa ra dauvuki tani o ira kece na nodra turaga.

¹⁶ Sa yaviti ko ira na Ifireimi, sa malai na wakadra, sa na sega ni vua tale: io, ke ra vakasucuma na gone, ke'u na vakamatea na ka domoni ni ketedra.

¹⁷ Ena biuti ira tani na noqu Kalou, ni ra sa sega ni vakarorogo vua: ka ra na dui veiseyaki ki na veivanua.