Osea 8 - Vakavakadewa Makawa

Era na cudruvi e na vuku ni nodra dautalaidredre vua na Kalou, kei na nodra dauqarava na kalou lasu, 1-14.

¹ Me toka ki na gusumu na davui, ka kaya, Ena lako mai ko koya, me vaka na ikeli, ki na vale i Jiova, ni ra sa vakacataka na noqu veiyalayalati, ka ra sa talaidredre ki na noqu vunau.

² Era na dui tagi vei au na Isireli, ka kaya, Kemuni na Noqu Kalou, keitou sa kilai kemuni.

³ Sa ra biuta na ka vinaka ko ira na Isireli: ena vakasavi ira kina na meca.

⁴ Era sa bulia eso na tui, ka sega ni vu vei au: era sa lesia na turaga, ia ka'u sa sega ni kilai ira: e na nodra siliva kei na nodra koula era sa cakava na nodra matakau, ka me ra muduki laivi kina.

⁵ Sa biuti iko na nomu luve ni pulumokau, ko iko Samaria, sa waqa mai na noqu cudru vei ira: e bogi vica mada me ra qai savasava mai?

⁶ Ni sa vu vei ira na Isireli na ka oqo: na matai ga sa cakava; ka sa sega ni Kalou: ia ena vorolaki ga na luve ni pulumokau ni Samaria.

⁷ Ni ra sa kaburaka na cagi, ka ra na tamusuka na covulaca: sa sega na tolona: ena sega ni vuataka na madrai droka: ke vuataka mai, era na tiloma ko ira ga na kai tani.

⁸ Sa tilomi ko ira na Isireli: era sa qai yaco oqo e na veimatanitu me ra vaka nai yaya e sega ni vinakati.

⁹ Ni ra sa qai lako cake ki Asiria, me vaka na asa kila ka tiko duaduaga: ko ira na Ifireimi sa ra volia na veitau.

¹⁰ Ia ke ra sa tautauri vei ira na veimatanitu eso, ka'u na qai vakasoqoni ira ka ra na rarawa vakalailai mada, e na vuku ni colacola bibi vua na nodra tui na turaga.

¹¹ Ni ra sa vakavuqataka nai cabocabo-ni-soro ko ira na Ifireimi me ia kina na ka ca, ena yaco nai cabocabo-ni-soro vei ira me vu ni valavala ca.

¹² Au sa vola vei ira e vuqa na ka e na noqu vunau, ia sa nanumi ga me ka tani.

¹³ Era sa vakacabora na lewe ni manumanu mei soro vei au, ka ra kania; ia sa sega ni vakadonui ira ko Jiova; sa na qai nanuma ko koya na nodra caka cala, ka cudruva na nodra i valavala ca: io era na lesu tale ki Ijipita.

¹⁴ Ia ko ira na Isireli, era sa guilecavi Koya ka Buli ira, ka ra sa tara bure kalou; kei ira na Juta, era sa vakavuqataka na koro vakabai: ia ka'u na biuta kina na bukawaqa ki na nodra veikoro, ka'u na vakama talega na nodra vale vakaturaga.