Osea 7 - Vakavakadewa Makawa

Sa tukuna tiko ko Osea na nodra i valavala ca na Isireli, kei na nodra cudruvi kina, 1-16.

¹ Ni'u a via vakabulai ira na Isireli, sa qai vakavotui mai na caka cala i Ifireimi, kei na ca i Samaria: ni ra sa cakacaka vakailasu; ia sa curu mai na daubutako, ka ra ia na veivakacacani mai tautuba na matadaubutako.

² A ra sa sega ni kaya e lomadra ni ka'u sa nanuma tiko na nodra ca kece: sa qai vakavolivoliti ira na nodra i valavala: sa tu ga e mataqu.

³ Era sa vakamarautaki koya na tui e na nodra ca, kei ira na turaga e na nodra vosa lasu.

⁴ O ira kece era sa ia na veibutakoci, era sa vaka na lovo sa vakatakatataka na dauvavi madrai, o koya sa cegu ni vakatakatataka ni sa natuka oti na madrai, ka me vakalevenitaki mada.

⁵ E na siga ni noda tui era sa tauvi mate kina na turaga ni ra katakata e na waini; sa dodoka na ligana ko koya kei ira na dauveivakalialiai.

⁶ Ni ra sa vakarautaka na lomadra me vaka na lovo, ni ra sa lawavaka tiko: sa moce na nodra dauvavi madrai ka sigavaka; e na mataka sa waqa mai ko koya me vaka na bukawaqa caucaudre.

⁷ Era sa katakata kece me vaka na lovo, a ra sa kani ira na nodra turaga ni lewa; sa bale ko ira kece na nodra tui: sa sega e dua vei ira e masu vei au.

⁸ O ira na Ifireimi, sa ra vakaduavatataki ira kei ira na veimataqali; ko ira na Ifireimi, sa ra keki e sega ni vukici.

⁹ O ira na kai tani era sa kania na nodra kaukauwa, ka ra sa sega ni kila ko ira: io, sa sikasika mai eso na drau ni uludra, a ra sa sega ni kila ko ira.

¹⁰ Ia na nodra viavialevu na Isireli sa tukuni ira e na matanavotu: a ra sa sega ni lesu vei Jiova na nodra Kalou, se vakasaqarai koya e na vuku ni ka kecega oqo.

¹¹ Ia ko ira na Ifireimi era sa vaka na ruve sesewa e sega ni vakayalo: era tagi ga ki Ijipita, era lakovi Asiria.

¹² Ni ra lako, au na tevuka na noqu lawa me rawai ira; au na kauti ira sobu me vaka na manumanu vuka; au na vakanakuitataki ira, me vaka ni sa rogoci e na nodra i soqosoqo.

¹³ E ca vei ira! ni ra sa dro tani vei au: na ca ga ena rawai ira! ni ra sa talaidredre vei au: e dina, ka'u a vakabulai ira, ia era sa lasutaki au ga.

¹⁴ Ka ra sa sega ni tagi vei au mai na vu ni lomadra, ni ra qoqolou koto e na nodra i davodavo: e na vuku ga ni sila kei na waini era sa soqoni vata kina, ka ra sa vuki tani vei au.

¹⁵ Ia koi au, ka'u a vakavulici ira ka vakaukauwataka na ligadra, ia era sa vakananuma na vere ca vei au.

¹⁶ Era lesu, ka segai vua sa Cecere sara: era sa vaka na dakai daulasu: ena bale e nai seleiwau ko ira na nodra turaga e na vuku ni cudru ni yamedra: a ka oqo era na vakalialiai kina e na vanua ko Ijipita.