Osea 6 - Vakavakadewa Makawa

Ai vakaro me ra veivutuni, 1-3. Era sa vunauci ko ira na Isireli kei ira na Juta, e na vuku ni nodra lomalomarua, kei na nodra i valavala dauveivakaisini ka ca sara, 4-11.

¹ Me da mai lesu vei Jiova: ni sa ia na veidresulaki, ka sa na vakabulai keda talega ko koya; sa ia oti na veiyaviti, ia ena vauca talega ko koya na noda mavoa.

² Ena vakabulai keda e na bogi rua: e na bogi tolu ena vakaturi keda tale, eda na qai bula e matana.

³ Eda na qai kila, kevaka eda na gumatua me kilai Jiova: sa vakarau tu na nona lako mai me vaka na mataka; io, ena lako mai vei keda me vaka na uca, me vaka sa tau na uca, io, na uca taumuri sa vakasuasuataka na vuravura.

⁴ A cava me'u cakava vei kemudou, na Ifireimi? a cava me'u cakava vei kemudou, na Juta? ni sa vaka na o ni mataka na nomudou yalololoma ka vaka na tegu sa yali sara e na mataka caca.

⁵ O koya oqo ka'u sa tamusuki ira kina vei ira na parofita; ka'u sa vakamatei ira e na vosa ni gusuqu: ia na nomudou cudruvi sa vaka na rarama sa lako voli yani.

⁶ Na yalololoma ga ka'u sa vinakata, ka segai nai madrali; kei na kila na Kalou, ka segai nai soro kama.

⁷ Ia ko ira, era sa vaka na tamata sa vakacacataka na veiyalayalati: ia maikea era sa ia na veivakaisini vei au.

⁸ Ko Kiliati, na koro ni tamata daucaka cala, sa vakadukadukalitaki ki na dra.

⁹ Ia me vaka era sa lawavaka na tamata na matadaubutako, sa vakakina era sa ia na veilabati ko ira nai lawalawa bete, e na sala vaka ki Sikemi: io, era sa cakava na ka vakasisila.

¹⁰ Ka'u a raica e dua na ka velavela vei ira na mataqali i Isireli: sa tu maikina na nodra veibutakoci na Ifireimi, sa vakadukadukalitaki ko ira na Isireli.

¹¹ Oi kemudou talega na Juta, sa lesi oti vei kemudou na vula i matua, ni'u a kauti ira tale mai na noqu tamata era sa vakabobulataki.