Osea 4 - Vakavakadewa Makawa

Ai valavala ca sa ra cudruvi kina na lewe ni vanua, 1-5, kei ira na bete, 6-10. Sa ka ni veivakalialiai sara na qarava na kalou lasu, 11-14. Sa ra vakasalataki kina na Juta, ni ra sa kunea na nodra cudruvi na Isireli, 15-19.

¹ Dou rogoca na vosa i Jiova, koi kemudou na Isireli: ni sa dua na veileti i Jiova kei ira na lewe ni vanua, ni sa sega na vosa dina, se na loloma, ka sa sega ni kilai na Kalou e na vanua.

² A ruru, kei na vosa lasu, kei na laba, kei na butako, kei na veibutakoci, sa ia tiko, ia na vakadave dra sa veitaravi tiko.

³ O koya oqo ena tagi kina na vanua, a ra na dui ceguoca kecega ko ira era tiko kina, kei na manumanu ni vanua, kei na manumanu vuka; io, na ika talega ni waitui ena kau tani.

⁴ Ia me kakua e dua vei kemudou me ia na veileti, se me ia na veivunauci kaya e dua; ko ira na kai nomu era vakataki ira era sa ia na veileti kei na bete.

⁵ O koya oqo ko na toqi kina e na siga, ia drau na toqi vata talega kei na parofita e na bogi, ia ka'u na vakarusai koya talega na tinamu.

⁶ Era sa rusa ko ira na noqu tamata ni sa yali vei ira na vuku: ni ko sa biuta na vuku, au na biuti iko talega, mo kakua ni bete tiko vei au: ni ko sa guilecava na vunau ni nomu Kalou, koi au talega, ka'u na guilecavi ira na luvemu.

⁷ Ni ra sa tubu me lewe levu, sa tubu talega na nodra i valavala ca vei au: ka'u na vukica me ka ni madua na nodra lagilagi.

⁸ Era sa kania nai soro ni nodra i valavala ca na noqu tamata ka ra sa gadreva e na vu ni yalodra na nodra caka cala.

⁹ Ia, me vakataki ira na tamata, ena vaka talega kina ko koya na bete: ia ka'u na cudruvi ira e na vuku ni nodra i valavala, ka'u na sauma vei ira na nodra i valavala.

¹⁰ Ni ra na kana, ka sega ni mamau; era na ia na veibutakoci, ka sega ni tubu: ni ra sa mudu ni qaravi Jiova.

¹¹ A dauyalewa kei na waini kei na waini vou sa kauta vakatani na loma ni tamata.

¹² A noqu tamata era sa taroga na nodra kau, ia na nodra i titoko sa tukuna vei ira: ni sa vakacalai ira na yalo ni veibutakoci, ia na nodra dauyalewa, sa ra vuki tani kina mai na lewa ni nodra Kalou.

¹³ Era sa daucakai soro e dela ni veiulu-ni-vanua, ka ra sa dauvakama nai madrali boi vinaka e na veiulu-ni-koro kei na ruku ni oki kei na ivi kei na paini, ni sa vinaka na kena rugurugua: o koya oqo era na ia kina na dautagane ko ira na luvemudou yalewa, kei ira na vugomudou na veibutakoci.

¹⁴ Au na sega ni cudruvi ira na luvemudou yalewa ni ra ia na dautagane, se na vugomudou ni ra ia na veibutakoci: ni ra sa tawase dina vata kei ira na dautagane, ka ra cakai soro vata kei ira talega na dauveitau; ia ko ira sa sega ni yalomatua era na bale sobu.

¹⁵ Kevaka dou sa ia na veibutakoci, na Isireli, me kakua ga ni caka cala ko ira na Juta; ia kakua ni dou cabe cake ki Kilikali, se lako cake ki Peci-aveni, se bubului, ka kaya, Me vaka sa bula ko Jiova.

¹⁶ Me vaka sa daubese na pulumokau, sa ra daubese vakakina na Isireli: Ia oqo ena vakani ira ko Jiova me vaka na lami e na yasana rabailevu.

¹⁷ Sa veikabiti vata kei na matakau ko ira na Ifireimi: laivi ira ga.

¹⁸ Ni sa gunuvi na medra, era sa qai dauia na veibutakoci: ko ira na nodra turaga era sa vinakata na ka e veivakamaduataki.

¹⁹ Sa vauci ira na cagi e na tabana, ka ra na madua e na vuku ni nodra vakacaboi soro.