Osea 13 - Vakavakadewa Makawa

Ni sa oti rawarawa na nodra vinaka, sa na oti rawarawa talega na nodra tiko vinaka; ka sa bula ga na loloma ni Kalou, 1-16.

¹ Ni sa vosa ko Ifireimi, ni sa rere tiko, sa vakalevulevui ko koya e Isireli; ia ni sa caka cala ko koya e na vuku i Peali, sa qai mate.

² Ia oqo, sa ra gumatua tikoga e nai valavala ca, ka ra sa cakava me nodra eso na matakau e vakawaicalataki e na nodra siliva, me vaka na nodra vuku, io na matakau, sa nodra cakacaka kece sara ga na matai: era kaya e na vukudra, O ira na tamata sa soro me ra reguca na luve ni pulumokau.

³ O koya oqo era na vaka na o e na mataka ka vaka na tegu e na mataka caca sa yali totolo, me vaka na qa ni sila sa cagina tani sara e na rara ni sila, ka vaka na kubou e na kenai kuvukuvu.

⁴ Ia koi au ga ko Jiova na nomu Kalou mai na vanua ko Ijipita, ia dou na sega ni kila e dua tale na kalou, koi au duaduaga, ni sa sega tale nai vakabula, koi au ga.

⁵ Oi au ka'u a kilai iko mai na veikau, na vanua dravuisiga sara.

⁶ Me vaka na nodra vakani, sa ra mamau vakakina; sa ra mamau, ka ra yaloviavialevu mai; o koya oqo sa ra guilecavi au kina.

⁷ O koya oqo ka'u na tautauvata kina vei ira kei na dua na laioni: ka me vaka na lepate e na sala ka'u na yadravi ira:

⁸ au na tavaki ira me vaka na pera sa yali na luvena, ia ka'u na dresulaka na taga ni utodra, ka kani ira sara maikea me vaka na laioni: a manumanu kila ena dresulaki ira.

⁹ Ko iko ga Isireli, ko sa vu ni nomu rusa; ia sa vu ga vei au na nomu i vukevuke.

¹⁰ Sa qai tiko evei na nomu tui, me na vakabulai iko e na nomu veikoro kecega; kei ira na nomu turaga ni lewa, ko a cavuta, ka vaka, Bulia mada vei au e dua na tui ka so na turaga?

¹¹ Au sa solia vei iko e dua na tui, e na noqu rarawa; ka kauti koya tani, ni'u sa cudru.

¹² Sa tugani tu na caka cala i Ifireimi; sa maroroi tu na nonai valavala ca.

¹³ A rarawa ni yalewa ni sa taratara ena yacovi koya: sa gone lialia ko koya, ke sega, ke sa sega ni tiko vakadede e na tikina e basuki maikina na gone.

¹⁴ Ka'u na sereki ira mai na kaukauwa ni bulubulu; ka'u na vakabulai ira mai na mate: Ko iko mate, sa evei na nomu dauveivakararawataki? Ko iko bulubulu, sa evei na nomu dauveivakarusai? ena tabonaki ga mai na mataqu na veivutuni.

¹⁵ Ke sa luvea ko koya e na kedra maliwa na tacina, ke na liwa ga na cagi mai na tu-i-cake, na cagi i Jiova mai na veikau, ka sa na maca na nonai keli-wai, ka na vakamacataki na nona mata-ni-wai: ena vakacacana ko koya na vale ni yaya kecega sa daudomoni.

¹⁶ Ena vakalalataki ko Samaria, ni sa talaidredre vua na nona Kalou: era na bale e nai seleiwau: a nodra gone lalai era na viritaki ki na vatu; a nodra yalewa talega sa bukete, era na tavalaki.